قالالىق ادىلەت دەپارتامەنتى استانا قالاسى بويىنشا جەكە سوت ورىنداۋشىلار وڭىرلىك پالاتاسىمەن جانە پوليتسيا دەپارتامەنتىمەن بىرلەسە وتىرىپ «بورىشكەر» رەيدتىك شاراسىن وتكىزۋدە.
ادىلەت دەپارتامەنتى ءباسپاسوز قىزمەتىنىڭ حابارلاعانىنداي, اتالعان رەيدتىك شارا بارىسىندا, 4 ناۋرىزدان 14 ناۋرىز ارالىعىندا اليمەنت بويىنشا بەرەشەگى بار بورىشكەرلەردىڭ اۆتوكولىكتەرىن ايىپ تۇراعىنا قويۋ بويىنشا شارالار قابىلدانىپ, ناتيجەسىندە كۇنى بۇگىنگە جالپى سوماسى 23 075 219 تەڭگە اليمەنت بەرەشەكتەرى بار بورىشكەرلەردىڭ 10 اۆتوكولىگى ۇستالىپ, ايىپ تۇراعىنا قويىلدى.
«جەكە سوت ورىنداۋشىلارمەن اتالعان اۆتوكولىكتەردى باعالاۋ, ساۋدا-ساتتىققا شىعارۋ جۇمىستارى جۇرگىزىلەتىن بولادى. اتالعان رەيدتىك شارا بويىنشا الداعى ۋاقىتتا دا بورىشكەرلەردىڭ مۇلكىنەن ءوندىرىپ الۋ بويىنشا شارالار ودان ءارى جالعاساتىن بولادى» دەلىنگەن ادىلەت دەپارتامەنتى تاراتقان حابارلامادا.
2024 جىلدىڭ باسىنان بەرى ادىلەت دەپارتامەنتىنىڭ مەملەكەتتىك سوت ورىنداۋشىلارىنىڭ اكىمشىلىك حاتتامالار نەگىزىندە استانا قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنىڭ قاۋلىسىمەن اليمەنت ساناتتارى بويىنشا 38 بورىشكەر قر اقبتك 669-بابىنا سايكەس اكىمشىلىك جاۋاپكەرشىلىككە تارتىلدى, ونىڭ ىشىندە 8 بورىشكەر 2-دەن 5 تاۋلىككە دەيىن قاماۋعا الىنىپ, قالعاندارىنا 5 اەك مولشەرىندە ايىپپۇل سالىندى.
سونىمەن قاتار, استانا قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ ۇكىمىمەن اليمەنت تولەمدەرىنەن قاساقانا جالتارعان 2 بورىشكەر قر قك 139-بابى بويىنشا قىلمىستىق جاۋاپكەرشىلىككە تارتىلدى.
قالالىق ادىلەت دەپارتامەنتى استانا قالاسىنىڭ جەكە سوت ورىنداۋشىلارىنىڭ وڭىرلىك پالاتاسىمەن جانە «استانا قالاسى اكىمدىگىنىڭ ەڭبەك موبيلدىلىگى ورتالىعى» كمم-مەن بىرلەسىپ «بوس ورىندار جارمەڭكەسى» ءىس-شاراسىن وتكىزۋدە. مۇنداي ءىس-شارالار اليمەنت تولەمدەرى بويىنشا بورىشكەرلەردى بەلسەندى الەۋمەتتىك ومىرگە يكەمدەۋگە باعىتتالعان.
دينارا ورداباەۆا
