مىنە, قۇرلىقتىق حوككەي ليگاسىندا ونەر كورسەتىپ جۇرگەن ەلوردالىق «بارىس» حوككەي كومانداسى بيىل دا جىلداعى بەلەسىنەن اسا الماي, ەكىنشى كەزەڭنىڭ العاشقى ساتىسىندا سۇرىندى.
بىرنەشە جىل قاتارىنان ءبىر ناتيجەنىڭ تىركەلۋى قانداي دا بىر وڭتايسىز قارسىلاستىڭ كەزدەسىپ قالۋىنان عانا بولماسا كەرەك. چەمپيونات بارىسىندا جاقسى دەڭگەيدە ويىن ورنەگىن كورسەتىپ جۇرگەن كوماندامىز «play off» كەزەڭىندە جەڭىستەرگە جەتۋگە باستار جولدى تاپپاي-اق ءجۇر. مىسالعا, چەليابىنىڭ «تراكتور» كومانداسىمەن بولعان كەزدەسۋلەرگە توقتالساق, قارسىلاستارىمىزدىڭ بىزدەن ءبىر ساتى جوعارى تۇرعاندىعى بايقالىپ تۇردى. جىلدامدىقتارى دا, ءبىر-ءبىرىن ءدال پاسپەن تابا الۋى دا جاقسى جولعا قويىلعان. نەبىر ازۋلى ۇجىمدارمەن تەرەزەسى تەڭ ونەر كورسەتىپ جۇرگەن «بارىس» وسى كەزەڭگە پسيحولوگيالىق تۇرعىدان دايىن بولمادى ما, جۇيەلى ويىنىمەن قۋانتا المادى. كاسىبي حوككەيشى بولماعاندىقتان ساراپ جاساۋ قيىن دا شىعار, بىراق كوماندامىزدا قورعانىستان شابۋىلعا كوشۋ دۇرىس جولعا قويىلماعان دەپ سانايمىن. شايبانى قارسى قاقپاعا قاراي بوس اسىرا سالۋ كوپ ورىن الادى, قۇددى ءبىر قارسىلاستارىمىز بۇكىل ويىن بارىسىندا سان باسىمدىعىنا يە سياقتى. ءبىر عانا كەزدەسۋ ەمەس, بىرنەشە كەزدەسۋدە ويىننان قورىتىندى شىعارۋعا بولادى عوي.
ارينە, بۇل سپورت, ويىن, جارىس. باپ شابا ما, باق شابا ما دەگەن. ايتسە دە وسى سالاداعى ماماندارىمىزدىڭ ويلانۋىنا جەتەرلىك سەبەپتەر بار. جانكۇيەر رەتىندە, ەلىمىزدىڭ نامىسى ءۇشىن جەڭىستەرگە مۇقتاج بىزدەرگە ەڭسەمىزدىڭ بيىك بولعانى ماڭىزدى.
امانگەلدى قىرمانشين
