ەڭ قۇدىرەتتى دە قاستەرلى – ءوزىمنىڭ انا ءتىلىم. انا ءتىلى ارقىلى العاشقى الىپپەنى تانىدىم. ءوز تاريحىمدى تانىپ ءبىلدىم. تۋعان ءتىلىنىڭ ابىرويىن اسقاقتاتۋ – ءاربىر ازاماتتىڭ بورىشى. سەبەبى ءبىزدىڭ بولمىسىمىز, سالت-ءداستۇرىمىز, ءدىنىمىز, مادەنيەتىمىز وسى تىلىمىزدە جاتىر. تاۋەلسىز ەلدىڭ جاس ۇرپاعىن پاراساتتى, ءبىلىمدى, ىسكەر, قابىلەتتى, ۇلتجاندى ەتىپ قالىپتاستىرۋدا مەملەكەتتىك ءتىلدىڭ ءرولى وتە جوعارى. سوندىقتان ونى ارقايسىمىز بىلۋگە مىندەتتىمىز.
ءتىل – اتا-بابامىزدان قالعان اماناتى. اتالار مۇراسىن جالعاستىرۋ, ونىڭ مارتەبەسىن كوتەرۋ – مىنا بارشامىزدىڭ پارىزىمىز. «ونەر الدى – قىزىل ءتىل». ەلىنىڭ بولاشاعىن ويلاعان, وعان قۇرمەتپەن قاراعان ءاربىر ازامات انا ءتىلىن ساقتاپ قالۋى ءۇشىن قولىنان كەلگەن كومەگىن اياماۋى ءتيىس. اسىل قازىنامىزعا اينالعان قازاق ءتىلىنىڭ قۇندىلىعىنىڭ ارتا بەرۋىنە ءاردايىم ءوز ۇلەسىمدى قوسۋىمىز اسا ماڭىزدى. تاۋەلسىز قازاقستاننىڭ كوگىندە كوك بايراعىمىز جەلبىرەدى, ءار قازاقتىڭ جۇرەگىندە ءانۇرانىمىز ايتىلدى. قازاقستان رەسپۋبليكاسىنىڭ ءتىل تۋرالى زاڭى قابىلداندى.
باۋىرجان مومىشۇلى «انامىزدىڭ اق سۇتىمەن بويىمىزعا دارىعان ءتىلىمىزدى ۇمىتۋ – بۇكىل اتا-بابامىزدى, تاريحىمىزدى ۇمىتۋ» دەگەن بولاتىن. سوندىقتان ءتىلىمىزدى ۇمىتپاي, الەمدەگى ەڭ مىقتى, باسەكەگە قابىلەتتى 50 ەلدىڭ قاتارىنا ەنۋ ءۇشىن قازاق ءتىلىن جوعارى مارتەبەدە ۇستاۋ كەرەكپىز دەپ ويلايمىن. ءتىل بايلىعى – ءاربىر ۇلتتىڭ ماقتانىشى, ءار ازامات ءوزىنىڭ انا تىلىنە كوزىنىڭ قاراشىعىنداي قورعاپ, ورىنسىز شۇبارلانۋىنا قارسى تۇرۋى كەرەك.
ءتىل – وتكەننىڭ ۇرپاققا قالدىرعان اماناتى, بۇگىنگى كۇننىڭ ابىرويى, ەرتەڭگى كۇننىڭ كەپىلى. سوندىقتان دا ءوز انا ءتىلىمىزدىڭ قادىرىن ءبىلىپ, ءوز تىلىمىزدە دۇرىس سويلەسە ءبىلۋ ءار قازاق بالاسىنىڭ بىردەن-ءبىر مىندەتى بولىپ تابىلادى. ءبىز, بولاشاق جاستار, ءتىلىمىزدىڭ ابىرويىن اسقاقتاتامىز, بيىككە كوتەرەمىز دەپ نىق سەنىممەن ايتقىم كەلەدى.
انا ءتىلىم – اتا-بابامىزدان ميراس بولىپ كەلە جاتقان باعا جەتپەس مۇرا. دەمەك, ءار ادام انا ءتىلىن كوزىنىڭ قاراشىعىنداي قورعاۋعا, ونىڭ تازالىعىن ساقتاۋعا ءتيىس. امال نە, تۋعان ءتىلىمىزدى شۇبارلاپ, باسقا ءتىلدى ارالاستىرىپ سويلەيتىندەر دە بار. ءتىپتى, تۋعان تىلىنەن بەزەتىن سوراقىلاردى, قازاقشا سويلەۋگە ۇيالاتىنداردى كورگەندە, «تۋعان تىلىنە جانى اشىماعان ادام – جاندىك» دەگەن ءسوز ويىما ەرىكسىز ورالادى. انا ءتىلى – ار ولشەمى. ولاي بولسا, ءتىلدى شۇبارلاۋ – اردى شۇبارلاۋ, كوڭىل تۇنىعىن مايلاۋ. ەڭ جاقسى ادام – انا ءتىلىن قۇرمەتتەگەن ادام. بۇل سەنىڭ باسقا ءتىلدى مەڭگەرۋىڭە بوگەت بولمايدى, قايتا سەنى ادامگەرشىلىككە, شىن پاتريوت بولۋعا جەتەلەيدى.
انا ءتىلدىڭ تەرەڭ يىرىمدەرىنە بويلاي ءبىلۋ – سانالى ادام بولعىسى كەلەتىن جاس ادامنىڭ ءبىرىنشى پارىزى. ول – تۋعان جەرىڭدى, ەلىڭدى, سۇيىكتى وتانىڭدى سۇيە ءبىلۋ دەگەن ءسوز. اقىن م.ماقاتاەۆ «وتان» اتتى ولەڭىندە:
«مەن ونىڭ ءتۇنىن
سۇيەم, كۇنىن سۇيەم
اعىندى وزەن, اسقار
تاۋ, گۇلىن سۇيەم.
مەن ونىڭ قاسيەتتى
ءتىلىن سۇيەم,
مەن ونىڭ قۇدىرەتتى ءۇنىن سۇيەم» دەپ وتاندى ءسۇيۋدىڭ, انا ءتىلىن ءسۇيۋدىڭ قۇدىرەتتى بيىك سەزىم ەكەندىگىن بىلدىرگەن. بۇل ماسەلەنى داۋدىڭ تاقىرىبى ەمەس, ۇلتتىڭ ۇيىتقىسى ەتە بىلگەنىمىز ءجون. ءتىلىمىز مەملەكەتتىڭ بارلىق جۇيەسىندە قولدانىلۋى ءۇشىن ءبىز ءوزىمىزدى ءوزىمىز قامشىلاپ, وسىعان ءوزىمىز اتسالىسۋىمىز قاجەت.
گۇلجازيرا قايىربەكوۆا,
استانا قالاسى مامانداندىرىلعان اۋدانارالىق تەرگەۋ سوتىنىڭ باس
مامانى-سوت وتىرىسىنىڭ حاتشىسى
