ءماجىلىستىڭ جالپى وتىرىسىندا دەپۋتاتتار «قازاقستان رەسپۋبليكاسىنىڭ مەملەكەتتىك رامىزدەرى تۋرالى» زاڭىنا وزگەرىستەر مەن تولىقتىرۋلار ەنگىزەتىن زاڭ جوباسىن ماقۇلدادى.
زاڭعا مەملەكەتتىك رامىزدەردى قورلاعاندار ءۇشىن شارانى قاتاڭداتۋ, سپورتشىلاردىڭ مەملەكەتتىك ءانۇراننىڭ ءانى مەن ءماتىنىن مىندەتتى تۇردە ءبىلۋى كەرەكتىگى جايىندا وزگەرىستەر ەنگىزىلدى.
ءسىز ءانۇران ءماتىنىن جاتقا بىلەسىز بە؟
داۋرەن جۇماعازيەۆ,
ەركىن كۇرەستەن لوندون وليمپياداسىنا قاتىسۋشى:
– ارينە, بىلەمىن. ونى بىلمەۋ مۇمكىن بە؟ ءانۇران ءماتىنىن جاتتاۋ ءار سپورتشى ءۇشىن ماڭىزدى بولۋى شارت. مەنىڭشە, قازاقستاننىڭ وليمپيادالىق قۇراماسىنىڭ مۇشەسى بولا تۇرا, ءانۇراندى بىلمەۋ دەگەن وتە ۇيات. ءتىپتى, وليمپياداعا بارسىن, بارماسىن, ءبارىبىر ءبىلۋى ءتيىس. كەيبىرەۋلەر «بۇعان دەيىنگى ءانۇرانىمىزدىڭ ءماتىنى اۋىر ەدى», – دەپ ايتىپ جاتادى. بىراق, ءوز باسىم ونى دا جاتقا ايتاتىنمىن. بالا كۇنىمىزدەن مەكتەپتە جاتتاپ وستىك ەمەس پە.
سوڭعى كەزدەرى ءانۇران ءماتىنىن سپورتشىلاردىڭ ءبىلۋى كەرەكتىگى ۇلكەن ماسەلە بوپ كوتەرىلىپ ءجۇر. دۇرىس. ويتكەنى, الدا لوندون وليمپياداسى, سپورتشىلارىمىزدىڭ كوك بايراقتى جەلبىرەتەر كۇنى كەلە جاتىر. وسى تاريحي كۇندەردى ابىرويمەن وتكەرۋىمىز كەرەك.
يراك ەلەكەەۆ,
قوعام قايراتكەرى, «حابار» ارناسىنداعى «كوزقاراس» باعدارلاماسىنىڭ جۇرگىزۋشىسى:
– بىلەمىن. باياعىدان بەرى قۇلاعىمىزدا جاتتالىپ قالعان ءان عوي. ءانۇراندى ءاربىر قازاقستاندىقتىڭ ءبىلۋ كەرەكتىگى اتا زاڭىمىزدا جازىلعان. قازىر وسى تاقىرىپ توڭىرەگىندە باعدارلاما دايىنداپ جاتىرمىن. ەستەرىڭىزدە بولسا, كەزىندە پارلامەنتتە ءانۇراندى اۋىستىرۋ تۋرالى ماسەلەنى كوتەرگەندەردىڭ ءبىرى مەن ەدىم. سول كەزدە تاڭداۋ ەكى انگە ءتۇستى. ءبىرىنشىسى ەلباسى نۇرسۇلتان نازارباەۆتىڭ سوزىنە جازىلعان بەكبولات تىلەۋحاننىڭ «ەلىم مەنىڭ» ءانى بولسا, ەكىنشىسى ءشامشى قالداياقوۆتىڭ «مەنىڭ قازاقستانىم» ءانى ەدى. تالداي كەلە ەكى ءاننىڭ سوڭعىسىن ءبىراۋىزدان قولدادىق. قاي جاعىنان الىپ قاراساڭىز دا – ءانۇران بولۋعا لايىقتى ءان – بۇل. ءسوزى جاتتاۋعا جەڭىل, اۋەنى دەنەڭدى ءدىر ەتكىزەتىندەي قۇدىرەتتى.
بۇعان دەيىنگى ءانۇرانىمىزدىڭ مازمۇنى تەرەڭ بولدى. جاتتاۋعا اۋىر ءتيىپ جاتاتىن. سوندىقتان, جاڭا ءانۇراندى تاڭداۋ دۇرىس جاسالدى دەپ ويلايمىن. ءانۇراندى بىلمەيتىندەر جاتتاسىن! ويتكەنى, جاتتاۋعا ءتيىس!
