ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى اقسەلەۋ سەيدىمبەكتى ەسكە الۋعا ارنالعان ءداستۇرلى اقسەلەۋ وقۋلارى ءوتتى.
قازاقتىڭ ماڭدايىنا بىتكەن ءبىرتۋار تۇلعانىڭ ولشەۋسىز ەڭبەگىن جان-جاقتى زەردەلەپ, ناسيحاتتاۋ ماقساتىندا قولعا الىنعان اقسەلەۋ وقۋلارى جىل سايىن كورنەكتى تۇلعانىڭ تۋعان كۇنىندە, ياعني 22 جەلتوقسان كۇنى ءوتۋى ءداستۇر بولعالى قاشان. بۇل شارانى جىل سايىن ۋنيۆەرسيتەتتىڭ جۋرناليستيكا جانە ساياساتتانۋ فاكۋلتەتى وتكىزەدى. كەزىندە اقسەلەۋ سلانۇلى وسى فاكۋلتەتتىڭ كافەدرا مەڭگەرۋشىسى بولعانى بەلگىلى. سول كەزەڭدەردەگى ءباسپاسوز جانە باسپا ءىسى كافەدراسىنىڭ عانا ەمەس, كۇللى ۋنيۆەرسيتەتتىڭ قالىپتاسۋى مەن ءوسىپ-وركەندەۋىنە اقسەلەۋ سەيدىمبەكتىڭ ۇلەسى ۇشان-تەڭىز. سوندىقتان فاكۋلتەت ۇجىمى اقسەلەۋدەي اردا ازاماتتى ەرەكشە قادىر تۇتىپ, اسپەتتەۋدى وزدەرىنە پارىز سانايدى.
تۋعان حالقىنىڭ كەم-كەتىگىن تۇگەندەپ, ۇلت رۋحانياتىنا ولشەۋسىز ۇلەس قوسقان ازاماتتى ارداقتاعان رۋحاني جيىندى جۋرناليستيكا جانە ساياساتتانۋ فاكۋلتەتىنىڭ دەكانى, دوتسەنت قايرات ساق اشىپ, اقسەلەۋدەي دارا بولمىس يەسىنىڭ ەسىمىن ۇرپاق جادىندا جاڭعىرتىپ وتىرۋ ماقساتىنداعى شارانىڭ ءمان-ماڭىزىنا توقتالدى. «اقسەلەۋ سەيدىمبەك – تۋعان ەلىنىڭ يگىلىگى ءۇشىن بار كۇش-جىگەرىن جۇمساعان ەرەكشە دارىن يەسى. قارىمدى قالامگەردىڭ شوقتىعى بيىك تۋىندىلارىن تەرەڭ زەرتتەپ, كەڭىنەن ناسيحاتتاۋ – بۇگىنگى ۇرپاققا امانات. ۋنيۆەرسيتەت احاڭنىڭ جارقىن بەينەسىن جادىمىزدا ماڭگى ساقتاۋ ءۇشىن ونىڭ تۋعان كۇنى مەن ومىردەن وزعان كۇنىنە وراي ءتۇرلى شارالار وتكىزۋدى داستۇرگە اينالدىردى. سونىڭ ءبىرى – بۇگىنگى اقسەلەۋ وقۋلارى» دەدى ول.
ال جازۋشى-عالىمنىڭ ۇزەڭگىلەس جولداسى, مەملەكەتتىك سىيلىقتىڭ يەگەرى قويشىعارا سالعاراۇلى زامانداسىنىڭ ەشكىمگە ۇقسامايتىن ەرەكشە ءبىتىم-بولمىسى مەن ادامگەرشىلىك تۇلعاسى تۋرالى ءسوز قوزعاي كەلە, قوعام قايراتكەرى الاش زيالىلارىنىڭ الەمىن زەرتتەگەننەن كەيىن شىعارماشىلىعىن ۇلتتىق مۇددەگە ءبىرجولا بۇرعانىن جەتكىزدى.
جالپى اقسەلەۋ سەيدىمبەكتىڭ كوپ ەرەكشەلىگىنىڭ ءبىرى – شەشەندىگى. ونىڭ الدىن كورگەن شاكىرتتەرى تەكتى تۇلعانىڭ شەشەندىگىنە, تەلەگەي تەڭىز بىلىمىنە ءتانتى بولىپ, ءالى كۇنگە دەيىن قۇرمەتپەن ەسكە الىپ وتىرادى. جيىندا ءسوز سويلەگەن قالامگەر مىرزاگەلدى كەمەل, «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ كورنەكتى قايراتكەردىڭ وسى ايرىقشا قاسيەتىنە توقتالىپ, ونىڭ اۋىزەكى اڭگىمەنىڭ عاجايىپ شەبەرى بولعانىن ەسكە الدى.
ال پروفەسسور ديحان قامزابەك ءوز سوزىندە اقسەلەۋ سلانۇلىنىڭ قانداي كۇردەلى كەزەڭدەردە دە ۇلتىنىڭ ءسوزىن سويلەگەن, ۇلت مۇددەسىنە قىزمەت ەتكەن ارداقتى ازامات بولعانىن ايتا كەلىپ, ونىڭ ەل رۋحانياتىن دامىتۋعا قوسقان ەڭبەگىن, ارتىنا قالدىرعان ولشەۋسىز مۇرالارىن دارىپتەۋ ەشقاشان تولاستاماۋ كەرەكتىگىن جەتكىزدى.
اقسەلەۋ سەيدىمبەك ەل ىشىنە كەڭ تاراعان «سارىارقا», «داۋرەن-اي» سىندى كوپتەگەن اندەردىڭ اۆتورى ەكەنى بەلگىلى. شىعارماشىلىق جيىندا سول اندەردىڭ بىرقاتارى اۋەلەپ, جۇرتشىلىقتى اقسەلەۋ الەمىنە جەتەلەي ءتۇستى.
قازاق رۋحانياتىنىڭ قابىرعالى وكىلى ءابىش كەكىلباي «مەن قازاق حالقىنا اقسەلەۋدى بەرگەنى ءۇشىن ريزامىن. قازاق قانداي بولدى دەسە, مىناداي بولدى دەپ اقسەلەۋدى كورسەتەر ەدىم, قازاق ۇلتى كەلەشەكتە قانداي بولۋى كەرەك دەسە, مىناداي بولادى دەپ, تاعى سول اقسەلەۋدى كورسەتەر ەدىم. اقسەلەۋ سەيدىمبەكتى بۇگىندە ءاربىر قازاق بالاسى ۇمتىلاتىن ەتالونى, ءاربىر قازاق بالاسى ءپىر تۇتاتىن يدەالى دەپ تۇسىنەمىن» دەگەنى ەسىمىزدە. ەندەشە, وسىنداي شارالار ارقىلى ءار قازاقتىڭ جادىندا اقسەلەۋدەي اردا ازامات ماڭگى ساقتالارى ءسوزسىز.
قىمبات نۇرعالي
