«استانا ارەنا» ستاديونىندا ەلوردالىق «استانا» كلۋبى چەمپيوندار ليگاسىنىڭ ءۇشىنشى ىرىكتەۋ كەزەڭى اياسىندا شوتلانديالىق «سەلتيك» كلۋبىن قابىلدادى. 29 مىڭ جانكۇيەر جينالعان العاشقى ويىن 1:1 ەسەبىمەن اياقتالدى.
ماتچ باسىن ەكى كلۋب شابۋىل جاساپ, ويىندى بەلسەندى باستادى. ويىننىڭ 18-ءشى مينۋتىندا پاتريك ءتۆۋماسيدىڭ بۇرىشتامادان اۋەلەتە اسىرعان دوبىنا ءبىرىنشى بولىپ «استانا» كلۋبىنىڭ قورعاۋشىسى يۋري لوگۆينەنكو جەتىپ, قارسىلاس كوماندانىڭ قاقپاسىنا گول سالىپ, ەسەپ اشتى. گولدان كەيىن رۋحتانعان ەلوردالىق كوماندا بىرنەشە رەت شابۋىلعا شىعىپ, جاقسى ويىن كورسەتكەنىمەن ءبىرىنشى تايمدا ەسەپ وزگەرگەن جوق.
ال, ەكىنشى تايمدى جەڭىلىپ جاتقان شوتلانديالىق كوماندا قارقىنمەن باستادى. كەزدەسۋدىڭ 77-ءشى مينۋتىندا «سەلتيك» شابۋىلداۋشىسى لي گريففيتس دوپتى قاقپاعا ءدال باعىتتادى. ەسەپ 1:1. وسىدان كەيىن قوناقتار ۋاقىت سوزۋدى باستادى. ويتكەنى ولارعا تەڭ ناتيجەنىڭ ءوزى جەتكىلىكتى بولدى.
– بۇگىن ءبىزدىڭ كوماندا جاقسى ويىن كورسەتتى. كوزدەگەن ماقساتىمىزعا جەتە الماعان كەزدەر بولدى. شىنىمدى ايتسام, بۇل ماتچتى وڭاي جەڭۋگە بولاتىن ەدى. الايدا, ەۋروكۋبوك ويىندارىنداعى قاتەلەر قىمباتقا تۇسەدى. جانكۇيەرلەرىمىزدى قۋانتىپ, جاقسى فۋتبول كورسەتكەنىمىزگە قۋانىشتىمىن. «سەلتيك» فاۆوريت, بىراق گلازگودا وتەتىن كەزدەسۋدە ەكى كوماندانىڭ دا مۇمكىندىكتەرى تەڭ», – دەيدى «استانا» كلۋبىنڭ باس باپكەرى ستانيمير ستويلوۆ.
– «استانا» – وتە مىقتى كوماندا ەكەن. بۇعان ءبىز كوز جەتكىزدىك. قازىر سىزدەردە ەل چەمپيوناتى قىزىپ تۇر. بىراق, سوعان قاراماستان ءبىزدىڭ جىگىتتەر جارادى. «استانانىڭ» شابۋىلدارى ۆەرتيكالدى ءوربيدى ەكەن. مەن بۇل كوماندا تۋرالى ويىنعا دەيىن دە ءبىراز زەرتتەگەنمىن. مىقتىلىعىن سول كەزدە-اق بىلگەن ەدىم. ال, بۇگىن كوز جەتكىزدىم», – دەيدى «سەلتيك» كلۋبىنڭ باس باپكەرى برەندان رودجەرس.
«استانا» مەن «سەلتيك» كومانداسىنىڭ اراسىنداعى قارىمتا كەزدەسۋ 3 تامىزدا شوتلانديانىڭ گلازگو قالاسىندا وتەدى. ويىن استانا ۋاقىتى بويىنشا ساعات 00:45 (بەيسەنبىگە قاراعان ءتۇنى) باستالادى.
فوتو: www.fca.kz
