استانا ماڭىزدى كولىك حابىنا اينالادى
كەشە ەلوردا اكىمى ادىلبەك جاقسىبەكوۆ كەزەكتى اپپارات جيىنىن وتكىزدى دەپ حابارلايدى استانا قالاسى اكىمدىگىنىڭ ءباسپاسوز قىزمەتى.
جيىندا مەملەكەت باسشىسىنىڭ بەس ينستيتۋتسيونالدىق رەفورماسىن ورىنداۋ اياسىنداعى «100 ناقتى قادام» جوسپارىن جۇزەگە اسىرۋ ماسەلەسى تالقىلاندى.
اكىمنىڭ ايتۋىنشا, بۇل ماقساتتارعا جەتۋ ءۇشىن ءىس-شارالاردىڭ كەشەندى جوسپارىن ازىرلەۋ قاجەت. نەگىزگى جۇمىستار استانانى ەۋرازيانىڭ مادەني, عىلىمي جانە ىسكەرلىك ورتالىعىنا اينالدىرۋعا جۇمىلدىرىلۋى كەرەك.
قارجى ورتالىعىنىڭ ەرەكشە زاڭدى مارتەبەسى كونستيتۋتسيادا بەكىتىلمەك. كەلەشەكتە ول الەمنىڭ الدىڭعى قاتارلى 20 قارجى ورتالىعىنىڭ بىرىنە اينالىپ, ەلوردانىڭ ىسكەرلىك الەۋەتىن ەسەلەي تۇسەدى دەپ كۇتىلۋدە.
– بىزگە بارلىق ىقتيمال جاعدايلاردى, اتاپ ايتقاندا, ورتالىق جۇمىسىنىڭ ترانسپورتتىق جۇيەگە, باسپانا مەن قوناق ۇيلەر نارىعىنا, ەڭبەك نارىعىنا, كوشى-قون مەن تۋريستىك اعىمدارعا اسەرىن ەسكەرۋ قاجەت. ول ءۇشىن جەرگىلىكتى مەملەكەتتىك ورگاندارمەن بىرلەسە جۇمىس ىستەگەنىمىز ءجون, – دەپ تاپسىردى اكىم.
قالا باسشىسى قارجى ورتالىعىنىڭ حالىقارالىق كولىك قاتىناسىنا اسەرىن دە ءسوز ەتتى. وسى ماقساتتا «100 ناقتى قادامنىڭ» 73-تارماعىندا الدىڭعى قاتارلى قارجى ورتالىقتارىمەن
بايلانىستىراتىن اۆياقاتىناستاردىڭ تۇراقتى جانە قولايلى جۇيەسى قۇرىلاتىنى ايتىلعان. بۇل ءوز كەزەگىندە ىشكى جانە قالاارالىق كولىك اعىمدارىمەن تىعىز بايلانىستا بولۋىن كوزدەيدى.
– ەلوردا ازيا مەن ەۋروپانىڭ اراسىن بايلانىستىراتىن بارشا قۇرلىقتىڭ ەڭ ماڭىزدى كولىك حابىنا اينالۋى ءتيىس, – دەدى اكىم. – بۇل تۇرعىدا جولاۋشىلار كولىگى جانە اۆتوموبيل جولدارى باسقارماسىنا, «استانا لرت» جشس قالانىڭ كەشەندى كولىك جۇيەسىنە قالىپتاستىرۋعا جۇيەلى تۇردە كىرىسۋدى, حالىقارالىق, ۇلتتىق جانە قالاىشىلىك قاتىناستاردىڭ بارلىعىن قاراستىرۋدى تاپسىرامىن.
ورتالىق ينفراقۇرىلىمىنىڭ تاعى ءبىر ماڭىزدى بولىگى – ساپالى اقپاراتتىق-كوممۋنيكاتسيالىق جۇيە. الداعى ۋاقىتتا ورتالىق قاتىسۋشىلارى عانا ەمەس, استانانىڭ بارلىق تۇرعىندارى دا ساپالى, جىلدام جانە قىمبات ەمەس بايلانىس تۇرىنە قول جەتكىزەدى دەپ جوسپارلانعان.
اكىم ورتالىققا شەتەلدىكتەردىڭ كوپ كەلەتىنىن, بۇل رەتتە اعىلشىن ءتىلىن بارلىق جەردە قولدانۋ قاجەتتىلىگى تۋىندايتىنىن اتاپ ءوتتى. اعىلشىن ءتىلى قارجى ورتالىعىنىڭ اۋماعىندا رەسمي ءتىل بولماق.
– ءبىز قازىردىڭ وزىندە اعىلشىن ءتىلىن وقىتۋ جانە ونى جاستار اراسىندا ناسيحاتتاۋ بويىنشا جۇمىستاردى قولعا الدىق. قوناق ۇيلەر, مەيرامحانالار, باسقا دا قىزمەت كورسەتۋ مەكەمەلەرىنىڭ قىزمەتكەرلەرىنە اعىلشىن ءتىلىن ۇيرەتە باستاۋىمىز كەرەك. مەملەكەتتىك جانە جەكە اعىلشىن ءتىلىن ۇيرەتۋ كۋرستارىن اشۋ ماسەلەسىن قاراستىرىپ, ونى ماتەريالدىق-تەحنيكالىق, كادرلىق جانە ادىستەمەلىك بازامەن قامتاماسىز ەتۋىمىز قاجەت, – دەدى قالا باسشىسى.
ەلوردا اكىمى, سونداي-اق, تۋريزم سالاسىنداعى جۇمىستى جاڭعىرتۋ قاجەتتىلىگىن اتاپ ءوتتى. اكىمنىڭ پىكىرىنشە, استانا قالاسىنا كەلۋشىلەر سانىن ارتتىرۋدىڭ باستى تەتىگى – مەرەكەلىك شارالار مەن ءتۋريزمدى دامىتۋ.
جيىندى قورىتىندىلاعان اكىم العا قويىلعان ماقساتتاردىڭ ماڭىزدى ەكەندىگىنە تاعى دا ەكپىن ءتۇسىرىپ, جۇمىسقا جاۋاپكەرشىلىكپەن قاراۋدى تاپسىردى.
– اۋقىمدى ماقساتتاردى ءتۇيتكىلدى ماسەلە رەتىندە ەمەس, ءوزىمىزدى كورسەتۋدىڭ مۇمكىندىگى, ءال-اۋقاتىمىزدى جۇزەگە اسىرۋدىڭ امالى دەپ قاراۋ قاجەت. استانانىڭ دامۋىنا سۇبەلى ۇلەس قوسۋ ارقايسىمىزدىڭ مىندەتتى بورىشىمىز ەكەنىن ەستەن شىعارماعانىمىز ابزال, – دەدى ەلوردا باسشىسى.