ەرتەڭنەن باستاپ استانا-دەلي-استانا باعىتىندا اپتاسىنا 3 رەت اۋە كەمەلەرى ۇشا باستايدى. ەكى ەل اراسىنداعى جولاۋشىلار تاسىمالىن مىندەتىنە العان «ەير استانا» كومپانياسى بيىل التىنشى رەت ورتا ازيا مەن ءۇندىستاننىڭ ۇزدىك اۆياكومپانياسى اتانىپ وتىر.
جاڭا باعىتتىڭ اشىلۋ سالتاناتىندا ءسوز العان قازاقستاننىڭ ۇندىستانداعى توتەنشە جانە وكىلەتتى ەلشىسى بولات سارسەنباەۆ بۇل شارانى ەكى ەلدىڭ ديپلوماتيالىق قارىم-قاتىناسىنىڭ 25 جىل تولعان مەرەيلى جىلى جەمىسىنىڭ ءبىرى دەپ باعالادى. «قوس تاراپتان دا جاڭا باعىتتى ىسكە قوسۋعا قولداۋ بولىپ, استانالار اراسىن جاقىنداتۋعا ماڭىزدى قادام جاسالدى» دەدى.
«ەير استانا» كومپانياسىنىڭ پرەزيدەنتى پيتەر فوستەر استانا-دەلي-استانا باعىتىنىڭ تيىمدىلىگىنە توقتالدى. سوڭعى ەكى جىلدا جولاۋشىلار لەگى 7 مىڭنان 11 مىڭعا كوبەيگەن. قازاقستاندىقتاردىڭ ۇندىستانعا ساپارى 20 پايىزعا ارتىپ, 15 مىڭدى قۇراپ وتىر. بۇگىندە ەلوردادا ەكى مىڭنان استام ۇندىستاندىق ازامات تۇرادى. جاڭا باعىت رەسەي مەن ۋكراينادا تۇرىپ جاتقان ۇندىلىكتەر ءۇشىن ەڭ قىسقا اۋە جولى بولماق. استانادان دەليگە ۇشۋ ۇزاقتىعى 4 ساعاتتاي, ال ەكونوم ساناتىنداعى جولاقىسى – 89 883 تەڭگە. اۋەكومپانيانىڭ تاعى ءبىر جاڭالىعى بار. 1 ماۋسىم مەن 10 قىركۇيەك ارالىعىندا ەلورداعا كەلەتىن بارلىق حالىقارالىق باعىتتاردىڭ جولاۋشىلارىنا ەكسپو كورمەسىنە تەگىن كىرۋ بيلەتتەرى ۇسىنىلادى.
ايگۇل ۋايسوۆا
