باس قالادا باعانى تۇراقتاندىرۋ اياسىندا استانا قالاسى مەن قىزىلوردا وبلىسىنىڭ اكىمدىكتەرى ءوزارا كەلىسىمگە كەلدى. ەندى مەموراندۋم بويىنشا وسى اپتادا سىر ەلىنەن ەلورداعا 20 توننا كۇرىش جەتكىزىلەتىن بولدى.
استانا قالاسى اكىمىنىڭ ورىنباسارى اندرەي لۋكيننىڭ ايتۋىنشا, ەكىجاقتى كەلىسىم بويىنشا ەلورداعا ازىق-تۇلىك وندىرۋشىلەردىڭ باعاسىمەن جەتكىزىلەدى.
«قىزىلوردا وبلىسىنان كەلگەن ازىق-تۇلىك ونىمدەرى جارمەڭكەدە حالىققا ۇسىنىلادى. وسى اپتادا وتەتىن جارمەڭكەگە 20 توننا كۇرىش شىعارىلادى. باعاسى – 175 تەڭگەدەن. ەلباسى تاپسىرماسىن ورىنداۋ ماقساتىندا ارىپتەستەرىمىز قولعا العان بۇل شارانىڭ ماقساتى – باعانى تۇراقتاندىرۋ, وتاندىق ونىمگە قولداۋ ءبىلدىرۋ. وسى باعىتتاعى جۇمىستار الداعى ۋاقىتتا دا جالعاسىن تابادى», – دەدى ا. لۋكين.
ايتا كەتۋ كەرەك, ەلباسى وڭىرارالىق استىقتى دامىتۋدى تاپسىرعان.
«قىزىلوردا وبلىسى جىل سايىن استاناعا كەلىپ جارمەڭكە ۇيىمداستىرادى, وندا الەۋمەتتىك ماڭىزى بار ازىق-تۇلىك تاۋار تۇرلەرى ارزان باعاعا ساتىلادى. بۇيىرتسا, قىركۇيەك ايىنىڭ 3-4 كۇندەرى وتكىزىلەدى. استانا قالاسىنىڭ اكىمدىگى بىزگە «شاپاعات» كوممۋنالدىق بازارىنان تۇراقتى ورىن بەرىپ, ءوز ونىمدەرىمىزدى ساتۋعا مۇمكىندىك بەرىپ وتىر. جارمەڭكەدە تەك كۇرىش قانا ەمەس, ءسۇت ونىمدەرى, كۇنباعىس مايى, ۇن, جارما, قانت, جەمىس, كوكونىس تۇرلەرى دە مولىنان بولادى. ەكى ايماقتىڭ كاسىپكەرلەرى اراسىندا بولعان كەلىسىمشارت تيىمدىلىگىن كورسەتسە, ءارى قاراي جۇمىس ىستەيتىن بولامىز» دەيدى وبلىس اكىمىنىڭ ورىنباسارى سەرىك قوجانيازوۆ.
ايتا كەتەيىك, استانادا تۇرعىن ۇيلەردىڭ اۋلاسىندا الەۋمەتتىك ماڭىزى بار اۋىل شارۋاشىلىعى تاۋارلارىن ساتۋ ءۇشىن 50 ساۋدا ورنى بولىنگەن.
الداعى اپتادا «وقۋشىلار سارايى» اۆتوتۇراق الاڭىندا الماتى وبلىسىنىڭ قاتىسۋىمەن وڭىرلىك جارمەڭكە وتكىزۋ جوسپارلانۋدا. وندا 320 توننا ءونىم, ونىڭ ىشىندە قۇس ەتى, بالىق, ءسۇت ونىمدەرى, جەمىس-كوكونىس جانە بال ونىمدەرى تومەن باعادا ساتىلادى.
گۇلميرا شارحانقىزى
