«اۋىلدان – اۋىلعا» اكتسياسى

ەلىمىزدىڭ بارلىق ايماقتارىندا «اۋىل» حالىقتىق-دەموكراتيالىق پاتريوتتىق پارتياسىنىڭ «اۋىلدان اۋىلعا» اكتسياسى باستالدى. ءىس-شاراعا «اۋىل» پارتياسىنان قازاقستان رەسپۋبليكاسى پارلامەنتى ءماجىلىسىنىڭ, وبلىستىق ءماسليحاتتار دەپۋتاتتىعىنا كانديداتتار قاتىستى. اكتسيا بارىسىندا دەپۋتاتتىققا كانديداتتار مەن پارتيا جەتەكشىلەرى اۋىلدىق جەرلەردى ارالاپ, اۋىل تۇرعىندارىمەن ۇگىت-ناسيحات جۇمىستارىن جۇرگىزەدى. جامبىل وبلىسىندا «اۋىل» پارتياسىنىڭ «اۋىلدان اۋىلعا» رەسپۋبليكالىق اكتسياسى باستاۋ الدى. رەسپۋبليكانىڭ بارلىق ايماعىندا بولىپ, پارتيانىڭ سايلاۋ­الدى باعدارلاماسىن تۇرعىندارعا ءتۇسىندىرىپ, ناسيحاتتاۋدى ماقسات تۇتقان ايتۋلى اكتسياعا ەلىمىزدىڭ پارلامەنتى ءماجىلىسىنىڭ دەپۋتاتتىعىنا كانديداتتار قارلىعاش ارالبەكوۆا مەن نۇرجىگىت بەگالى, سونداي-اق جامبىل وبلىسىنىڭ بارلىق دەڭگەيدەگى ءماسليحاتتارىنىڭ دەپۋتاتتىعىنا ۇسىنىلىپ جاتقان كانديداتتار قاتىستى. جالپى سوڭعى 10 جىلعا دەيىنگى ۋاقىتتا ەل اۋماعىندا 7 مىڭنان اسا ەلدى مەكەن بولسا, بۇگىندە التى جارىم مىڭنان از اۋىل قالعان. جەرگىلىكتى جەردە جۇمىسسىزدىق پەن جاعدايدىڭ جوقتىعىنان اۋىل تۇرعىندارىنا قالالارعا ۇدەرە كوشۋگە تۋرا كەلگەن. سول سەبەپتى ۋربانيزاتسيا قارقىنىنىڭ ارتۋى كورىنىس بەرىپ وتىر. قارلىعاش ارالبەكوۆا بۇل ماسەلە وتە الاڭداتىپ وتىرعان كۇردەلى قۇبىلىس ەكەنىن ايتادى. – اۋىل تۇرعىندارى امالدىڭ جوقتىعىنان قالاعا كوشۋدە. بۇل – ۇلكەن پروبلەما. مۇنى شەشۋدىڭ جولى – قىسقارىپ كەتكەن اۋىلدارىمىزدى قايتا قۇرىپ, دامۋى ءۇشىن كۇش سالۋ. اۋىل ەڭبەككەرلەرىنىڭ تابىسى مەن الەۋمەتتىك قولجەتىمدىلىكتەردى قالالىقتارمەن تەڭەستىرۋ كەرەك. ەمدەۋ مەكەمەلەرى, بالاباقشالار, مەكتەپ جانە سپورت عيماراتتارىن قولجەتىمدى ەتۋ, ساپالى جول, ورتالىقتاندىرىلعان تازا اۋىزسۋ مەن گاز جۇيەسىن جەتىلدىرۋ – ءاربىرىمىزدىڭ نەگىزگى تامىرىمىزعا دەگەن قۇرمەتىمىز بولار ەدى, – دەدى ق.امىرقىزى. وسىلايشا باستاۋ العان اكتسيا وبلىس ورتالىعىنان اۋىلدارعا اتتاندى. ىرگەلەس جاتقان بايزاق اۋدانىنىڭ قىزىل جۇلدىز اۋىلى تۇرعىندارىمەن كەزدەسۋ وتكىزدى. ۇمىتكەرلەر ءاربىرىمىزدىڭ جۇرەگىمىزدە اۋىلعا دەگەن ساعىنىشپەن قاتار الاڭداۋشىلىق بار ەكەنىن جاسىرمادى. اۋىلدى قولداپ, كوتەرەتىن كەز كەلگەنىن, سول ءۇشىن ەڭبەك ەتۋگە ءازىر ەكەندىكتەرىن جەتكىزدى. كەزدەسۋ سوڭىندا اۋىل تۇرعىندارى ساتتىلىك تىلەپ, كانديداتتار ءوز ەلدى مەكەندەرگە اتتاندى. جالپى جامبىل وبلىسىنداعى 10 اۋداندا 400-گە تارتا اۋىل بار. «اۋىلدىقتار» بارلىق ەلدى مەكەندى قامتۋدى كوزدەپ وتىر.