رەداكتسيامىزعا اۆستريانىڭ وقۋ باعدارلاماسى بويىنشا ۆەنا ۋنيۆەرسيتەتىندە وقيتىن استانالىق جاس ماقسات امانجولدىڭ حاتى كەلىپ ءتۇستى. جەرلەسىمىزدىڭ شەت ەلدە جۇرگەندە كوڭىل تولعاندىرعان ويلارى جاستاردىڭ ءبىلىمى مەن تاربيەسىنە قاتىستى بولعاندىقتان, بۇل حاتتى وقىرمان نازارىنا ۇسىنۋدى ءجون كوردىك.
قايىرلى كۇن, تۋعان قالامنىڭ باس گازەتى – «استانا اقشامىنىڭ» ۇجىمى! وسىدان ءبىر جىل بۇرىن قۇجاتتارىمدى ۆەنا ۋنيۆەرسيتەتىنە تاپسىرۋدى ۇيعارعان ەدىم. نەمىس ءتىلىن مەڭگەرۋگە جۇمسالعان ءبىر جىل دا وتە شىقتى. وزگە ەلگە اياق باسقان ساتتەن باستاپ, ونداعى بارلىق قۇبىلىستارعا ءجىتى نازار اۋدارىپ, شەت قوعام بەينەسىن باقىلاپ, سونىڭ ءبارىن ءوز ەلىڭدەگى جاعدايمەن سالىستىرادى ەكەنسىڭ.
انىق تۇسىنگەنىم: اۆستريانىڭ – ءبىلىمى, ال قازاقستاننىڭ – مەنتاليتەتى مىقتى. سانامىزدا ەس بىلگەلى قالىپتاسقان «ۇيات بولماسىن!» دەگەن تۇسىنىك بولسا, ۆەنادا ونداي جوقتىڭ قاسى. تابيعي وريەنتاتسياسىن وزگەرتكەندەردى ءجيى كوزىمىز شالادى. جىل سايىن مۇندا تاقىرىپ اۋقىمى وزگەرىپ تۇراتىن «Life ball» وتكىزىلەدى. «ەۆروۆيدەنيەنىڭ» جەڭىمپازى كونچيتا ۆۋرستتى ەستىگەن بولارسىزدار؟ سول باستاعان «جىندىلار» توبى ۇلكەن الاڭعا جينالىپ, سەكىرىپ بيلەپ, ويلارىنا كەلگەنىن جاسادى. وتە جيىركەنىشتى! ەڭ سوراقىسى, بۇل ولاردا قالىپتى جاعداي سانالادى ەكەن. ءدارىس كەزىندە وقىتۋشىعا وسىنى پسيحيكالىق اۋرۋعا تەڭەپ, قوعامدى ەمدەۋ كەرەك دەگەنىمدە, «ءار ادام جەكە ءومىرىن قالاي سۇرەمىن دەسە, ءوز ەركى ەمەس پە؟ بۇل – تاڭداۋ قۇقى» دەپ, ايتقانىما ءۇزىلدى-كەسىلدى قارسى بولدى. بىزدە دە وندايلار جوق ەمەس شىعار. بىراق ونىسىن بارىنشا جاسىرىپ, جاريا ەتۋدەن تارتىنادى.
تاڭعالدىرعان ەكىنشى نارسە – قاسيەتتى جۇما كۇنى كەلسە, قالا ادامعا لىق تولىپ, قوقىس شاشىلىپ, كوشەلەر بىت-شىت, استان-كەستەن بولادى. سەبەبى – اپتانىڭ سوڭعى كۇندەرى, جۇمىستان شارشاپ, دەمالماقشى بولعان جۇرت ىشىمدىك ءىشىپ, اياقتارىن باسا الماي, تالتىرەكتەپ, كورىنگەن جەردە سۇلاپ جاتادى. ءتارتىپ ساقشىلارى قايدا قاراپ وتىر دەرسىز؟ جاۋابى مىناۋ – بۇل ءۇردىس بۇقارالانىپ كەتكەن. حالىق جاپپاي ءىشىپ جۇرسە, كىمگە قوي دەيسىڭ؟ بۇزاقىلىق جاسايتىنداردىڭ كوبى – مەكتەپ جاسىنداعى وقۋشىلار. ال, ستۋدەنتتەردىڭ بار ويى – وقۋدا. وزگە دۇنيەلەرگە كوڭىل بولەتىن ۋاقىت تا تاپشى. ويتكەنى…
ءوز ەلىمىزدە ۋنيۆەرسيتەتكە اپتالاپ بارماي قالساڭ دا, باعدارلامانى وڭايلىقپەن قۋىپ جەتۋگە بولادى. ال ۆەنادا مۇمكىن ەمەس. وقۋ – قيىن. ۋنيۆەرسيتەت كىتاپحاناسىندا 1 ميلليوننان اسا كىتاپ قورى بار. باسىم ۋاقىتىمىز سول كىتاپ كەمىرۋمەن وتەدى.
ايتپاقشى, وقىتۋشىلار پارا دەگەندى مۇلدە بىلمەيدى. جەمقورلىق اتىمەن جوق. بىردە اۋديتوريادا ءدارىس وقىلىپ جاتقان. قوڭىراۋ سوعىلعاندا, شەت ەلدەن كەلگەن ءبىر ستۋدەنت سىيلاستىق رەتىندە مە, جوق الدە بوتەن ويمەن بە, بىلمەيمىن, ايتەۋىر, مۇعالىمگە ءبىر قوراپ كامپيت ۇسىنعانى سول ەدى, ەسكەرتۋ الدى. اقشا بەرسە, ءتىپتى, سوتتالىپ كەتەتىن ەدى. مىنەزىڭە, ءتۇر-تۇسىڭە بولمەي, تەك قانا بىلىمدارلىقتى تالاپ ەتەدى. «ساباققا نەگە كەلمەدىڭ؟» دەپ ۇرىسىپ, باعانى تومەندەتپەيدى. وقىساڭ, ءوزىڭ ءۇشىن وقيسىڭ. تەك سەسسيا كەزىندە ەمتيحاندى تاپسىرۋعا ءۇش-اق مۇمكىندىك بەرىلەدى, ءتيىستى بالل جيناماساڭ, وقۋدان شىعارادى. ۋاقىت وتكەن سايىن بىلىمدەگى قاتاڭ تالاپتارعا شىداماي, «ۇشىپ كەتەتىندەر» كوپ. جىل سوڭىندا كىل مىقتىلارى عانا قالادى. سونى تۇسىنگەن ءبىز وقۋعا جانىمىزدى سالامىز. بەرىلەتىن ديپلوم قۇنى ءبىر جاپىراق قاعاز عانا ەمەس, تۇلەكتىڭ ءبىلىمى مول دايىن مامان ەكەندىگىن بىلدىرەدى.
ايتپاقشى, قازاقستان وقۋ جۇيەسىندەگى «Platonus» وتە اسىعىس ەنگىزىلگەنىن ايتقىم كەلەدى. ول ءالى دە ۇلكەن جەتىلدىرۋدى قاجەت ەتەدى. مىسالى, جەكە كابينەتتە ستۋدەنتتىڭ بۇكىل قۇجاتتارى, ساباق كەستەسى, وعان قاجەت مالىمەتتىڭ ءبارى دە بولۋى ءتيىس قوي. ۆەنا ۋنيۆەرسيتەتىندە ءبىر مۇعالىم «Platonus»-قا كىرىپ, ستۋدەنتتەرگە حابارلاندىرۋ جازسا, ءماتىن ءبىر مەزەتتە بۇكىل بالانىڭ تەلەفونىنا كەلىپ تۇسەدى.
مىنەكي, ولار ءبىزدىڭ تاربيەدەن, ءبىز ولاردىڭ بىلىمىنەن ۇلگى الساق دەيمىن. ءوزىم قاتارلى جاستاردىڭ شەتەلدە وقىعانىن قۇپتايمىن. قازاقستاندا دا ىزدەنۋشىلەرگە تالاپ كۇشەيسە, ءبىراز كەمشىلىك جوندەلەر مە ەدى؟..
دايىنداعان: ءمادينا جاقىپ
