ناۋرىز تويى – بۇل ادامزاتتىڭ عانا ەمەس, بۇكىل تابيعاتتىڭ مەرەكەسى. ۇلىستىڭ ۇلى كۇنىن دانا حالقىمىز ىرىس پەن ىنتىماقتىڭ نىشانىنا بالاعان. سوندىقتان, ونى اسىعا كۇتكەن. كەيبىر دەرەكتەرگە قاراعاندا, جاھاندا بۇل مەيرامدى 300 ميلليون ادام اتاپ وتەدى ەكەن. بيىل دا جالپاق جۇرت جاڭا جىلدى جاقسىلاپ تۇرىپ قارسى الماق. اسىرەسە, ۇلكەن مەرەكەگە ارقا توسىندەگى جۇرتتىڭ دايىندىعى قىزۋ.
بيىل استانالىقتار مەيرامعا ەرەكشە ىقىلاس تانىتۋدا. بۇل كۇنى وتەتىن بۇقارالىق سەرۋەندەر مەن كونتسەرتتەرگە قالانىڭ كوركەم بەزەندىرىلگەن كورنەكىلىكتەرى دە ەرەكشە كورىك قوسىپ تۇرارى انىق. بۇگىندە قالاداعى وقۋ ورىندارى, قوعامدىق ويىن-ساۋىق ورتالىقتارى مەن ماڭىزدى مەكەمەلەردىڭ عيماراتتارى ۇلتتىق ناقىشتاعى ورنەكتەرمەن اشەكەيلەنگەن. بىرنەشە ساۋلەت نىشانى ورناتىلىپ, كوشە بويلارى ۇلتتىق ويۋ-ورنەكتەرمەن بەزەندىرىلە باستادى. سونداي-اق, كوشەلەردەن وزگەشە فورماداعى نەبىر ءمۇسىن تۇرلەرىن كەزدەستىرۋگە بولادى.
جالپى, مەرەكەگە وراي, استانادا قىرىققا جۋىق ءىس-شارا وتەدى جانە بىرنەشە كيىز ءۇي تىگىلەدى دەپ جوسپارلانۋدا. ال, ساحنالاندىرىلعان باستى قويىلىم «قازاق ەلى» مونۋمەنتى جانىندا كورسەتىلمەك. مەيرامعا بايلانىستى قالادا قاۋىپسىزدىك شاراسى كۇشەيتىلىپ, كولىك قوزعالىسى دا شەكتەلمەك. سونىمەن قاتار, ساۋدا ويىن-ساۋىق ورتالىقتارى دا ناۋرىز تويىنا ارنايى باعدارلامالارىن ۇسىناتىن بولادى. ارينە, بۇل كۇنى ۇلتتىق ويىندار, سپورتتىق سايىستار دا ۇيىمداستىرىلادى, جينالعان جۇرت ىستىق باۋىرساق پەن ناۋرىز كوجەدەن اۋىز تيەدى.
سونداي-اق, ناۋرىز – جاڭارۋ مەن جاسارۋ, تازارۋ مەرەكەسى. بۇل ايدا تابيعات تۇلەپ, جەردىڭ توڭى ءجىبىپ, جىلعالار سۋعا تولعاندا قالالىق كوممۋنالدىق شارۋاشىلىقتا دا كوكتەمگى قاربالاس باستالادى. بۇل جاعىنان دا استانالىقتار بەيقام وتىرعان جوق. سۋ تاسقىنىنا قارسى جۇمىستار پىسىقتالىپ قويىلعان. بارلىق تەحنيكا كۇشتەرى ماڭىزدى ناۋقانعا تولىق دايىن. قازىر قالا بويىنشا 836 ارناۋلى تەحنيكانىڭ كومەگىمەن تاۋلىك بويىنا تىنىم تاپپاستان قار تازارتۋ جۇمىستارى جۇرگىزىلۋدە. قىس تۇسكەلى بەرى 2 ملن 633 مىڭ 307 تەكشە مەتر قار شىعارىلعان. كۇن كۇرت جىلىنىپ, قار قاتتى ەرىگەن جاعدايدا سۋدى سورعىمەن ايداپ شىعارىپ, شالشىق جينالاتىن تۇستارعا قۇم توگىلەدى. ونداي ماقساتقا 5000 توننا قۇم-كۇل سياقتى ينەرتتى ماتەريالدار دايىندالعان. وتە دۇرىس! توي بولاتىن شاھار تاپ-تازا بولۋعا ءتيىس!
ەركەجان ساتىمبەك
