تۇڭعىش قازاق بلوگەرلەرىنىڭ جازبا جارىسى – «بلوگيادا-2014» بايقاۋى جاريالاندى. جارىس 24 ناۋرىزدان باستالىپ, 1 جەلتوقسانعا دەيىن جالعاسادى. ءتورت كەزەڭنەن تۇراتىن دوداعا ەلىمىزدەگى ەڭ مىقتى دەگەن 32 بلوگەر قاتىسىپ, 10 اي بويى ءوزارا باق سىناسادى.
ول ءۇشىن قاتىسۋشىلار www.blogiada.kz سايتىنا تىركەلىپ, ۇسىنىس ءبىلدىرۋى قاجەت.
ءار كەزەڭگە 2 اي بەرىلەدى. العاشقى كەزەڭدە 32 بلوگەر ىرىكتەلىپ الىنىپ, كەلەسىسىنە ۇزدىك شىققان 16-سى وتەدى. وسىلايشا ەكى ايدا ەكى ەسە كەمىپ وتىراتىن بلوگەرلەردىڭ ىشىنەن فينالعا 4 مىقتىسى ىرىكتەلىپ, ناتيجەسىندە جىل ۇزدىگى انىقتالادى.
بايقاۋدىڭ تالابى بويىنشا بلوگەرلەر ءار اپتادا ارناۋلى تاقىرىپتارعا ساي جازبا جازۋى قاجەت. بۇل جازبالار تەحنيكالىق جانە مازمۇندىق تۇرعىدا باعالانىپ, ورتاشا باعالار بويىنشا رەيتينگى تۇزىلەدى.
العاش رەت ۇيىمداستىرىلىپ وتىرعان بايقاۋدىڭ دەمەۋشىسى – قازاقستان سوفتۆەرلىك كومپانيالار اسسوتسياتسياسى پرەزيدەنتى ازاماتحان ءامىرتاي بلوگيادا جەڭىمپازىنا 1 ملن تەڭگە كولەمىندە سىياقى تاعايىنداپ وتىر. بايقاۋ قورىتىندىسى جىل سوڭىندا 6 جەلتوقساندا جاريالاناتىن بولادى.
شىنار شاكەن
