قازىرگى زامان مۇعالىمى شىعارماشىل, تالاپشىل, رۋحاني الەمى باي, كۇش-قايراتى مول ۇستاز بولۋى كەرەك. وسىنداي ۇستازداردىڭ ءبىرى – استانا قالاسى قايىم مۇحامەدحانوۆ اتىنداعى №90 گيمنازيانىڭ ورىس ءتىلى مەن ادەبيەتى ءپانى مۇعالىمى رۋپيا كۋشنيازوۆا.
ول پاندىك ءبىلىم بەرىپ قانا قويماي, ءار وقۋشىنىڭ ومىرگە دەگەن وزىندىك كوزقاراسىن قالىپتاستىرۋعا بارىن سالىپ كومەكتەسىپ ءجۇر. ۇستازدىق جولدا جۇرگەنىنە – 32 جىل. وسى جولداعى ماقساتى – ءار بالانىڭ بويىنا وزىنە دەگەن سەنىمدىلىكتى ۇيالاتۋ, ادامي قۇندىلىقتاردى دارىتۋ, ەڭ نەگىزگىسى, ادام ەتىپ تاربيەلەپ شىعارۋ. رۋپيا كۋشبويقىزى كەز كەلگەن بالانىڭ ءتىلىن تابا بىلەدى. كرەاتيۆتى مۇعالىم, ساباقتارىندا ءارتۇرلى ۆيرتۋالدى ءبىلىم پلاتفورمالارىن پايدالانىپ, وقۋشىلاردىڭ پانگە دەگەن قىزىعۋشىلىعىن ارتتىرادى. ساباقتارىندا وقۋشىلاردىڭ وقىلىم, جازىلىم, ايتىلىم, تىڭدالىم داعدىلارىن دامىتۋعا بار كۇشىن سالادى.
رۋپيا كۋشبويقىزى – پەداگوگ-زەرتتەۋشى. ۇستاز رەتىندە ۇنەمى ىزدەنىستە جۇرەدى, شىعارماشىلىقپەن جۇمىس ىستەۋگە قۇشتار, ءوز جۇمىسىندا وزىق ءىس-تاجىريبەلەردى بارىنشا قامتۋعا تىرىسادى. بىلىكتى پەداگوگتىڭ باستاماسىمەن 2018 جىلى ي.ەسەنبەرلين اتىنداعى №67 گيمنازيادا «ۆيرتۋالدى وقىتۋ ورتاسى. ساندىق ساۋاتتىلىق» ەكسپەريمەنتالدى الاڭى جۇمىس جاسادى. اسىرەسە, بۇل جۇمىس قاشىقتان وقىتۋ بارىسىندا وتە ماڭىزدى بولدى. وسى وزەكتى جۇمىس ناتيجەلەرىمەن پەداگوگ 2018 جىلى «پەداگوگيكالىق يدەيالار فەستيۆالى» ءحى قالالىق كونكۋرسىنا قاتىسىپ, گراموتامەن ماراپاتتالدى.
رۋپيا كۋشنيازوۆانىڭ ءبىلىم سالاسىنداعى قاجىرلى ەڭبەگى ەلەنىپ, بىرنەشە ماراپاتقا يە بولدى, ءبىلىم جانە عىلىم مينيسترلىگىنىڭ قۇرمەت گراموتاسىمەن, ءبىلىم باسقارماسىنىڭ قۇرمەت گراموتالارىمەن جانە اكىمدىكتىڭ العىس حاتتارىمەن ماراپاتتالدى.
ءى. ەسەنبەرلين اتىنداعى №67 گيمنازيا قابىرعاسىندا 2019 جىلدان باستاپ حالىقارالىق «SHARE» جوباسى اياسىندا ءىس-ارەكەتتەگى زەرتتەۋدىڭ نەگىزگى توبىندا جۇمىس ىستەدى. رۋپيا كۋشبويقىزى – وسى جوبانى بەلسەندى ىسكە اسىرۋشىلاردىڭ ءبىرى, جوبا اياسىندا زەرتتەۋ جۇمىستارىن جۇرگىزىپ, كوپشىلىككە ۇسىندى. بۇگىنگى تاڭدا قايىم مۇحامەدحانوۆ اتىنداعى №90 گيمنازيادا جۇرگىزىلىپ جاتقان زەرتتەۋ جۇمىستارىنىڭ بەلسەندى قاتىسۋشىسى.
تاجىريبەلى پەداگوگ سىنشى-جولداس رەتىندە, جاس ماماندارعا اقىلشى-تالىمگەر رەتىندە ارىپتەستەرىنە قولداۋ كورسەتىپ, ادىستەمەلىك تۇرعىدا ءوز كومەگىن بەرۋدەن ايانبايدى. ۇستازدىق جولىندا ونىڭ وتكىزگەن ترەنينگ, كوۋچينگ, سەمينارلارىن ساۋساقپەن ساناۋ ءتىپتى مۇمكىن ەمەس. پەداگوگ تالىمگەرلىك جۇمىسپەن اينالىسىپ, بىرنەشە بۋىن جاس مامانداردى تاربيەلەپ, ادىستەمەلىك قولداۋ كورسەتىپ كەلەدى.
جاڭاشىلدىققا جانى قۇمار ۇستاز زەرتتەۋ جۇمىستارىن جۇرگىزىپ, وزىق تاجىريبەسىن ارىپتەستەرىنىڭ نازارىنا ۇسىندى. «ۆيرتۋالنايا سرەدا وبۋچەنيا. رۋسسكي يازىك ي ليتەراتۋرا. 7 كلاسس» اتتى اۆتورلىق باعدارلاماسى 2019 جىلى رەسپۋبليكا كولەمىندە تاراتىلدى. «رازۆيتيە ناۆىكوۆ چتەنيا» تاپسىرمالار جيناعى 2023 جىلى قالا كولەمىندە تاراتىلدى.
رۋپيا كۋشبويقىزى – پەداگوگتار اراسىندا عانا ەمەس, وقۋشىلار اراسىندا ەرەكشە قۇرمەتكە يە مۇعالىم. بىلىكتى مامان رەتىندە ءوز وقۋشىلارىن جەتىستىكتەرگە جەتەلەي بىلەدى. شاكىرتتەرى ۇنەمى, جۇيەلى تۇردە سايىستارعا, شىعارماشىلىق بايقاۋلارعا قاتىسىپ, جۇلدەلى ورىندارعا يە بولىپ ءجۇر. اسىرەسە, دارىندى بالالارمەن جۇمىسى دا ءوز ناتيجەسىن كورسەتىپ جاتىر: جالپى ءبىلىم بەرەتىن پاندەر بويىنشا رەسپۋبليكالىق وليمپيادانىڭ ءىى (اۋداندىق) كەزەڭىنىڭ قازاق تىلىندە وقىتاتىن مەكتەپتەردەگى ورىس ءتىلى پانىنەن 2014 جىلى 8-سىنىپ وقۋشىسى ايزات ايماعانبەتوۆا ماداقتاما السا, 2022 جىلى 6-سىنىپ وقۋشىسى ولجاس زاگيپاروۆ ءىىى ورىندى, 2022 جىلى 9-سىنىپ وقۋشىسى بينازير ورالبەك ءىىى ورىندى جەڭىپ الدى. 2023 جىلى 9-سىنىپ وقۋشىسى قاھارمان باقداۋلەت پەن 11-سىنىپ وقۋشىسى پازىل ماحاببات ماداقتامامەن ماراپاتتالسا, 10-سىنىپ وقۋشىسى بىرلىك گۇلناز جارىستا وزا شاۋىپ, ءىى ورىن يەلەندى.
مەكتەپتە سىيلى, وقۋشىلارى ءۇشىن ۇلاعاتتى ۇستاز رۋپيا كۋشبويقىزى – وتباسى قۇندىلىقتارىن ەرەكشە دارىپتەيتىن جان. جولداسى ەكەۋى 3 قىز تاربيەلەپ وتىر. وتباسىلىق ۇستانىمدارى, داستۇرلەرى قالىپتاسقان جانۇيا. مەكتەپتە ۇستاز بولسا, وتباسىندا ارداقتى انا, سۇيىكتى جار. قىزدارىن ۇلكەندەردى قۇرمەتتەۋگە, مەيىرىمدى بولۋعا تاربيەلەپ كەلەدى. بوس ۋاقىتىندا ءدامدى اس ءپىسىرۋدى, تىگىن تىگۋدى جاقسى كورەدى, ناعىز شەبەرى دەۋگە دە بولادى.
– ءبىلىم سالاسى عانا ەمەس, مەنى قوعامداعى ءبىراز ماسەلەلەر تولعاندىرادى. مەنى, اسىرەسە, ادامداردىڭ بويىنداعى رۋحاني كەدەيلىك, وقۋ-بىلىمگە ۇمتىلۋدان گورى «تەلەفونومانياعا» كوپ ءمان بەرۋى قاتتى مازالايدى. وقۋشىلارعا ۇنەمى ايتامىن, رۋحاني كەدەيلىك بارىنەن جامان, ودان ارىلۋ ءۇشىن كىتاپ وقۋ كەرەكتىگىن, «تەلەفونومانيا» دەرتىنە ۇشىراماۋ ءۇشىن شىنايى ءومىر مەن ۆيرتۋالدى ءومىر ورتاسىندا ءومىر ءسۇرۋ كەرەكتەگىن ۇنەمى ايتىپ وتىرامىن, – دەيدى رۋپيا كۋشبويقىزى تولعانا وتىرىپ.
«جەتى قىرلى, ءبىر سىرلى», مىنەزگە باي, ۇلكەن پاراسات يەسى رۋپيا كۋشنيازوۆا – قوعامدىق جۇمىستارمەن دە بەلسەنە اينالىساتىن, ءاردايىم ىزدەنىپ, قازىرگى زامان تالابىنا ساي ءبىلىم بەرۋدى كوزدەيتىن, الدىنا قويعان ماقساتىنا وقۋشىلارىن دا, ءوزىن دە جەتەلەي بىلەتىن جاڭاشىل ۇستاز.
گۇلجانات ابدرامانوۆا, قايىم مۇحامەدحانوۆ اتىنداعى № 90 گيمنازيا ديرەكتورى
