س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە الدا بولاتىن پرەزيدەنت سايلاۋىنا وراي «ءوز بولاشاعىڭ ءۇشىن داۋىس بەر!» اتتى فورۋم ءوتتى. شاراعا ۋنيۆەرسيتەت رەكتورى, استانا قالاسى ءماسليحاتىنىڭ دەپۋتاتى, پروفەسسور ا.كۇرىشباەۆ, استانا قالاسى ءماسليحاتىنىڭ دەپۋتاتى ز.ءجۇسىپوۆا جانە ۋنيۆەرسيتەت وقىتۋشىلارى مەن ستۋدەنتتەرى قاتىستى.
جيىن بارىسىندا قازاتۋ رەكتورى ا.كۇرىشباەۆ ەلىمىزدىڭ كەمەل كەلەشەگى ءۇشىن س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ ۇجىمى «نۇر وتان» پارتياسىنىڭ توراعاسى, ۇلت كوشباسشىسى ن.ءا.نازارباەۆتىڭ كانديداتۋراسىن قولدايتىنىن اتاپ ءوتتى.
سونىمەن قاتار, ءبىلىم ورداسىنىڭ باسشىسى: «ەلباسىمىزدىڭ ءوزى اتاپ وتكەندەي, ءبىز مەملەكەتىمىزدى نىعايتۋ جولىندا «نۇرلى جول» جاڭا ەكونوميكالىق ساياساتىنىڭ بارلىق مىندەتتەرىن شەشۋ جانە «قازاقستان -2050» ستراتەگياسىنىڭ باستى ماقساتىنا قول جەتكىزۋ ءۇشىن بەس ينستيتۋتسيونالدىق رەفورمانى جۇرگىزە وتىرىپ, ءوز ماقساتىمىزعا قول جەتكىزەمىز. ويىنىڭ ۇشقىرلىعىنا جانە حالقىمىزدىڭ تاعىلىمدى وتكەنىنە سۇيەنە وتىرىپ, قازاقستاننىڭ كەمەل كەلەشەگى ءۇشىن ن.ءا.نازارباەۆقا داۋىس
بەرۋىمىز قاجەت» دەپ, بارشا قازاقستاندىقتاردى ورتاق ماقساتقا جۇمىلۋعا شاقىردى.
سودان سوڭ ءسوز العان استانا قالاسى ءماسليحاتىنىڭ دەپۋتاتى ز.ءجۇسىپوۆا الداعى سايلاۋدا ءاربىر ازاماتتىڭ داۋىسى اسا ماڭىزدى ەكەنىن اتاپ ءوتىپ, وقىتۋشىلار مەن ستۋدەنتتەردى پرەزيدەنتتىككە كانديدات ن.نازارباەۆقا داۋىس بەرۋگە شاقىردى.
