«بولاشاقتىقتار» – سپورتتا دا باسەكەلەس
وتكەن سەنبى كۇنى «اراي» استانالىق ساياباعىندا سپورتقا ءۇيىر وتباسىلار كونكۋرسى ءوتتى. وتباسى كۇنىنە وراي قولعا الىنعان شارانى مادەنيەت جانە سپورت مينيسترلىگىنىڭ قولداۋىمەن «بولاشاق» قاۋىمداستىعى ۇيىمداستىردى.
جارىسقا جاس وتباسىلار, تانىمال قازاقستاندىق سپورتشىلار, «بولاشاق» باعدارلاماسىنىڭ ستيپەندياتتارى مەن تۇلەكتەرى جانە باسقالار اتسالىستى. باسقوسۋدىڭ اشىلۋ سالتاناتىندا قاۋىمداستىق مۇشەسى, سپورت شەبەرى ايدار ماحمەتوۆ ءسوز سويلەدى. «سپورتپەن شۇعىلدانىپ وسكەن ۇرپاق پەن ۇل-قىزدارىن سپورتقا باۋلىعان وتباسى عانا مەملەكەتتىڭ مىقتى تىرەگى بولا الادى. ءبىز سالاۋاتتى ءومىر سالتىن ۇستانىپ قانا ماڭگىلىك ەل بولۋعا, بيىكتەرگە ۇمتىلا الامىز. سوندىقتان وسىنداي وتباسىلىق, سپورتتىق شارالاردىڭ ماڭىزى زور» دەدى ول.
شارا بارىسىندا, اسىرەسە, كۆەست ويىنى قاتىسۋشىلاردى قاتتى قىزىقتىردى. جاڭا كرەاتيۆتى ويىن وي ەڭبەگىمەن قاتار دەنە شىنىقتىرۋ قيمىلدارىن قامتيدى ەكەن. ويىن شارتى بويىنشا كونكۋرس قاتىسۋشىلارى كوماندالارعا ءبولىنىپ, ءارتۇرلى ينتەراكتيۆتى تاپسىرمالاردى ورىنداپ شىعادى. «بولاشاق» باعدارلاماسىنىڭ تۇلەگى رۋستام توقماعامبەتوۆ «ماعان بۇل ويىن وتە ۇنادى. ءوزىم ۇنەمى سپورتپەن اينالىسۋعا, ارىپتەستەرىممەن فۋتبول, ۆولەيبول ويناۋعا تىرىسامىن» دەيدى. باسقا دا قاتىسۋشىلار وسىنداي ءىس-شارالاردى ءجيى وتكىزۋ قاجەتتىگىن اتاپ ءوتتى.