استانادا دزيۋدودان «تاك Astana Club» سپورت كلۋبىنىڭ تۇساۋكەسەرى ءوتتى. كلۋب كومانداسىن دزيۋدودان قر ەڭبەك سىڭىرگەن جاتتىقتىرۋشىسى, كسرو سپورت شەبەرى سەرگەي راكوۆ باسقارادى.
كوماندا قۇرامىنا الەم چەمپيونى ماكسيم راكوۆ, ازيا ويىندارى مەن ازيا چەمپيوناتىنىڭ جۇلدەگەرى يسلام بوزباەۆ, ازيا چەمپيونى جانە «World Masters-2013» حالىقارالىق ءتۋرنيرىنىڭ جەڭىمپازى سەرگەي ليم, «قازاقستان بارىسى-2013» ءتۋرنيرىنىڭ, ازيا چەمپيوناتىنىڭ جۇلدەگەرى ەرجان شىنكەەۆ ەندى. كلۋب جۇمىسىنىڭ نەگىزگى ماقساتى – قازاقستاندا دزيۋدو جۇيەسىن دامىتىپ, جەتەكشى سپورتشىلار دايىنداۋ, ءسويتىپ, جوعارى جەتىستىكتەرگە قول جەتكىزۋ. «مەن رەسەي مەن گەرمانيانىڭ ءتۇرلى كلۋبتارىندا ونەر كورسەتتىم. بۇل – مەن ءۇشىن وتە جاقسى تاجىريبە. قازىر وسىنداي كلۋبتىڭ قازاقستاندا اشىلىپ جاتقانىنا قۋانىشتىمىن. ەندى ءوزىمىزدىڭ تۋدىڭ استىندا ونەر كورسەتەتىن بولامىز» دەيدى ماكسيم راكوۆ. سونداي-اق, «تاك Astana Club» باسشىلارى ءۇشىن ماڭىزدىسى – بالالار دزيۋدوسىن دامىتۋ. سوندىقتان, بولاشاقتا دزيۋدو مەكتەبىن اشۋ جوسپارلانۋدا. وندا قالاعان جان جاتتىعىپ, شەبەرلىكتەرىن شىڭدايتىن بولادى. بۇدان بولەك, سەرگەي راكوۆ كلۋبتىڭ قر جاستار چەمپيوناتى جەڭىمپازدارىمەن كەلىسىمشارتقا وتىرۋدى جوسپارلاعانىن مالىمدەدى. «جاپونيا, فرانتسيا, رەسەيدىڭ ەڭ مىقتى كوماندالارىمەن بىرىگىپ قۇراما قۇرامىز» دەدى ول. قازىر وتاندىق كلۋب 21 جەلتوقساندا پاريجدە وتەتىن ەۋروپا كلۋبى ليگاسىنا قاتىسۋى ءۇشىن كەلىسسوزدەر جۇرگىزىپ جاتىر. استانادا كوماندانىڭ ماۋسىمى قاراشا ايىندا باستالادى.
ەركەجان ساتىمبەك
