گرۋزيا جاڭا پرەزيدەنتىن سايلادى
گرۋزيادا پرەزيدەنت سايلاۋى ءوتىپ, ونىڭ قورىتىندىسى بويىنشا سالومە زۋرابيشۆيلي 59,52 پايىز داۋىسپەن جەڭىسكە جەتتى.
سايلاۋدىڭ ەكىنشى كەزەڭى سارسەنبى كۇنى ءوتتى. ورتالىق سايلاۋ كوميسسياسىنىڭ حابارلاۋىنشا, سالومە ءزۋرابيشۆيليدىڭ قارسىلاسى, وپپوزيتسيونەر گريگول ۆاشادزە 40,48 پايىز داۋىس جيناعان. وسىلايشا ءزۋرابيشۆيليدى 1,1 ميلليوننان اسا ادام قولداسا, ۆاشادزەگە 780 مىڭ گرۋزيالىق جاقتاسىپتى. ەندى جاڭا باسشىنى ۇلىقتاۋ 16 جەلتوقسانعا جوسپارلانىپ وتىر.
زۋرابيشۆيلي 1952 جىلدىڭ 18 ناۋرىزىندا پاريج قالاسىندا تۋعان. 30 جىلدان اسا ۋاقىت فرانتسيانىڭ ىشكى ىستەر مينيسترلىگىندە قىزمەت ەتىپ, 2003 جىلى تاريحي وتانىنا ورالعان. 2013 جىلعا دەيىن گرۋزيادا ءتۇرلى لاۋازىمدى قىزمەتتەردە بولعان.
ەڭ ەگدە قاريا
برازيليادا 118 جاسقا كەلگەن جوزە فەررەيرا دوس سانتوس ەسىمدى قاريا ءومىر سۇرەدى. ول قازىر يتاجۋيپي قالاسىندا تۇرادى.
قاريانىڭ قۇجاتىندا 1900 جىلى 9 قاراشادا بارراكان ەلدى مەكەنىندە تۋعانى كورسەتىلگەن. Daily Mail مالىمەتى بويىنشا ونىڭ جاسى ءدالەلدەنسە, جەر بەتىندە ەڭ ۇزاق ءومىر سۇرگەن ادام بولىپ سانالادى. ال وسىعان دەيىن بۇل تىزىمدە جاپونيانىڭ 115 جاستاعى تۇرعىنى كانە تاناكي كوش باستاپ تۇرعان.
جوزە فەررەيرا 58 جىل فەرمەر بولىپ جۇمىس ىستەگەن. قازىرگى ۋاقىتتا ونىڭ ەسىمىن گيننەسستىڭ رەكوردتار كىتابىنا ەنگىزۋ ءۇشىن قۇجاتتارىن جيناۋ جۇمىسى جۇرگىزىلىپ جاتىر.
ۇشاق اپاتىنىڭ سەبەبى قانداي؟
يندونەزيادا Lion Air كومپانياسىنا تيەسىلى Boeing 737 ۇشاعى اپاتقا ۇشىراپ, 189 ادام قازا بولعان. اراعا ءبىر اي سالىپ ماماندار اپاتتىڭ باستى سەبەبىن انىقتادى.
BBC باسىلىمى ۇشاقتىڭ بيىكتىك پەن جىلدامدىقتى باقىلايتىن قۇرىلعىسى ىستەن شىققانىن حابارلادى. ونىڭ ۇستىنە, اتالعان كومپانيا اۋە كەمەسىن وسىعان دەيىنگى پروبلەمالارىنا قاراماستان قولدانىپتى. ال اپاتقا ۇشىرايتىن كۇنى اۆتوماتتاندىرىلعان جۇيە لاينەردىڭ تۇمسىعىن 20 مارتە تومەنگە قاراي قۇلديلاتقان. ۇشقىشتار اقاۋدىڭ الدىن الۋعا تىرىسقانمەن, قولدارىنان ەشنارسە كەلمەگەن.
مۇنداي پروبلەما دەنپاساردان جاكارتاعا شىققانىندا دا بايقالعان. مەحانيكتەر جوندەۋ جۇمىستارىنا كىرىسكەنمەن, اياقسىز قالعان. ال وپات بولعانداردىڭ تۋىستارى Boeing كومپانياسىنىڭ ۇستىنەن سوتقا ارىز بەردى.
