«استانا ارەنا» ستاديونىندا سپورت كۇنىنە وراي فۋتبولدان جولداستىق كەزدەسۋ ءوتتى.
جاسىل الاڭعا استانا قالاسىنىڭ ءىىد مەن دەنە شىنىقتىرۋ جانە سپورت باسقارماسىنىڭ فۋتبول قۇراما كوماندالارى شىقتى. ماتچتىڭ ءار تايمى 30 مينۋتتان تۇردى.
كەزدەسۋدىڭ 8-ءشى مينۋتىندا ءىىد قۇراماسى ەسەپ اشتى. ەكىنشى گول وڭ قاپتالدان كەلگەن دوپتان سوعىلدى. ەكى بىردەي گولدىڭ اۆتورى – كريمينالدىق پوليتسيا باسقارماسىنىڭ پوليتسيا كاپيتانى ەركەبۇلان بەكەجانوۆ. وسى ناتيجەمەن ول ۇزدىك شابۋىلشى رەتىندە كوزگە ءتۇستى.
«پوليتسيا قىزمەتكەرلەرى جۇمىستىڭ قيىندىعىنا قاراماستان سپورتپەن اينالىسۋعا ۋاقىت تابادى. سپورت كۇنىنە وراي, فۋتبولدان كەزدەسۋ وتكىزۋ جاقسى داستۇرگە اينالىپ كەلە جاتىر. ءبىز ادەتتە قالالىق جارىستاردان قالماي, قاتىسىپ تۇرامىز. جاقىندا 8 كوماندا ويناعان تۋرنيردە ەكىنشى ورىندى ەنشىلەدىك», – دەدى كوماندا كاپيتانى نۇرلان دۇيسەنعاليەۆ.
جارىستا ۇزدىك قورعاۋشى رەتىندە دەنە شىنىقتىرۋ جانە سپورت باسقارماسىنىڭ قۇراما ويىنشىسى ۆلاديمير گلەۆيچ ماراپاتتالدى. ال ءىىد قۇراماسىنىڭ ويىنشىسى قۋانىش جاندىباەۆ ۇزدىك قاقپاشى اتاندى.
گۇلدانا تالعاتقىزى
