بىلتىر كۇزدە قر پرەزيدەنتىنىڭ جارلىعىمەن قىركۇيەكتىڭ سوڭعى جەكسەنبىسى ەڭبەك كۇنى مەرەكەسى بولىپ بەكىتىلدى. مەرەكەنىڭ العاشقى مارتە اتالىپ وتىلەتىن شاعى جاقىنداپ قالدى. سونىڭ قارساڭىندا گازەتىمىزدە ءارتۇرلى سالادا جۇرگەن ەڭبەككەرلەر جايىندا ماقالالار توپتاماسىن جاريالاۋدى ۇيعاردىق. جان-جاعىمىزعا كوز تاستاپ, بارلاي قاراساق, ونداي ادامدار از ەمەس. ولاردىڭ اراسىندا ەلوردانىڭ كوركەيۋىنە ۇلەس قوسىپ جۇرگەن «استانا كوگالداندارۋ قۇرىلىسى» اكتسيونەرلىك قوعامىنىڭ جۇمىسكەرلەرى دە بار.
سۋلى-نۋلى جەلەك جولى اۋماعى تاياۋ كۇندەرى بۇرىنعىسىنان قۇلپىرا تۇسپەك. قازىر مۇندا گازون توسەلەتىن ورىندار دايىندالۋدا. بۇل جۇمىستى اتقارىپ وتىرعان ءبىر توپ ادامنىڭ جانىنا بارىپ, اڭگىمەلەسكەندە سونى بىلدىك. ءبىرى كۇرەكپەن ارتىق توپىراقتى ءبىر جەرگە ءۇيىپ, زەمبىلدەرگە سالۋدا. قالعاندارى سونى جاقىن جەردە تۇرعان «كاماز» اۆتوكولىگىنە دەيىن اپارىپ, جۇك ارتقىشىنا توگۋدە. جۇمىستارىن ازداعان ۋاقىتقا توقتاتىپ, تانىستىق. اراسىندا ءبىر عانا ازامات استانالىق بولىپ شىقتى, وزگەلەرى ەلىمىزدىڭ ءار تۇكپىرىنەن كەلىپ, ناپاقا ايىرىپ جۇرگەندەر ەكەن.
ەكى قولعا ءبىر كۇرەك ىزدەپ جۇرگەن ادام استانادان جۇمىس تابادى. جۇمىسكەرلەرمەن اڭگىمەلەسۋ بارىسىندا سوعان كوز جەتكىزدىك. ماسەلەن, بازارباي كەنجەبەك ەسىمدى ەلۋدى ورتالاپ قالعان ازامات ەلورداعا بيىلعى اقپان ايىندا شىمكەنت وڭىرىنەن كەلىپ, «استانا كوگالداندىرۋ قۇرىلىسىنا» جۇمىسقا ورنالاسىپتى. وسىنداعى ۇل-كەلىندەرىمەن پاتەر جالداپ تۇرادى. وتباسى ورداباسى اۋدانىنىڭ شۇبارسۋ اۋىلىندا قالىپتى. «بۇرىن ديحانشىلىقپەن اينالىستىم. بىراق, ول – بەينەتى وتە كوپ ءىس. باسقا جۇمىستى تابۋ قيىن اۋىلدان. تاپقاننىڭ وزىندە ايلىعى ماردىمسىز بولادى. وتباسىمدى اسىراۋعا جەتەتىن ناپاقا تابايىن دەپ, وسىندا كەلدىم. جەتى اي بولدى وسى جۇمىسقا ورنالاسقانىما. سودان بەرى اۋىلعا بارعان جوقپىن» دەگەن ول وتباسىنا ساعىنىشىن دا, ىستەپ جۇرگەن جۇمىسىنىڭ وڭاي ەمەستىگىن دە بىلدىرگەندەي بولدى.
استانا قاراعاندى وبلىسىمەن شەكارالاسىپ جاتقانى كوپكە ايان. وسى وبلىسقا قاراستى نۇرا اۋدانىنىڭ ورتالىعى كيەۆكا سەلوسى ەلورداعا تاياق تاستام جەردە. وندا جانە ماڭايىنداعى اۋىلداردا تۇراتىندار ەلورداعا قاتىناپ جۇمىس ىستەيدى. «استانا كوگالداندىرۋ قۇرىلىسى» وعان ارنايى كولىك بولگەن. «اۆتوبۋس ءبىزدى تاڭەرتەڭ اۋدان ورتالىعىنان الىپ كەتىپ, كەشكە جەتكىزىپ سالادى» دەيدى كيەۆكا تۇرعىنى جانات اجىكوۆ. بۇدان بۇرىن جەكە كولىگىمەن ادام تاسىپ, وتباسىن اسىراپ جۇرگەن ول دا ەلوردانى كوگالداندىرۋمەن اينالاساتىن كاسىپورىنعا وتكەن اقپاندا جۇمىسقا تۇرىپتى. ونىمەن بىرگە كيەۆكادان جەتى بالانىڭ اكەسى ەركەش ىنتىقاەۆ پەن سويلەگەن ءسوزى مەن قيمىلىنان قاعىلەزدىگى بايقالعان ساعىنتاي جارماعامبەتوۆ تە جۇمىسقا كەلىپ ءجۇر. ولاردىڭ ءبىرى – قاروي, ەكىنشىسى – زارەچنىي اۋىلدارىنان. «اۋىلدا شارۋا قوجالىقتارىنان وزگە جۇمىس جوق. دۇرىس تولەمەيدى ولار. ال, مۇندا جالاقىنى ۋاقىتىندا الامىز. قولىمىزعا تيەتىن اقشا دا جامان ەمەس» دەدى ساعىنتاي اعامىز.
ءبىز اڭگىمەلەسكەن جۇمىسكەرلەردىڭ ەڭ جاسى – جيىرما ءبىر جاستاعى ورازاق جۋكۋەۆ. ول استانانىڭ كولىك جانە كوممۋنيكاتسيا كوللەدجىن اياقتاپ, باعدارلاماشى-تەحنيك ماماندىعىن الىپ شىعىپتى. ءبىزدى ونىڭ كەيبىر جاستار سەكىلدى سەلتەڭباي جۇرىسكە سالىنباعانى, جاۋاپكەرشىلىكتى جاستاي سەزىنگەنى ءسۇيسىندىردى.
«استانا كوگالداندىرۋ قۇرىلىسىنىڭ» جۇمىسكەرلەرى تاڭعى جەتىدەن كەشكى جەتىگە دەيىن 12 ساعات جۇمىس ىستەيدى ەكەن. ولاردى ەلوردا قاھارماندارى دەپ اتاساق, اسىرىپ ايتقانىمىز ەمەس دەپ ويلايمىز.
امانعالي قالجانوۆ
