بوتانيكالىق باقتا جۇرەگىن دونور ەتكەن جانداردىڭ قۇرمەتىنە ارنايى ينستاللياتسيا ورناتىلدى. جاڭا ينستاللياتسيانىڭ رەسمي اتاۋى «سىي» دەپ اتالادى.
«ەلوردامىزدا ادام ومىرىندە ماڭىزدى جايتتارعا قاتىستى جاڭا دۇنيەلەر پايدا بولىپ جاتقانىنا قۋانىشتىمىز. ماعىناسى تەرەڭ ءارى كەرەك جوبا دەپ ويلايمىن. ادامعا وي سالادى. ءبىر جاعىنان ءومىردى باعالاۋ كەرەكتىگىن ەسكە سالسا, ەكىنشى جاعىنان دونور بولۋ ادامگەرشىلىكتىڭ بەلگىسى ەكەنىن كورسەتىپ وتىر. اكىمدىك تاراپىنان وسى سەكىلدى قوعام ءۇشىن ماڭىزدى جوبالار مەن شارالاردى قولداۋعا ءاردايىم دايىنبىز. جوبا اۆتورى مەن ونى جۇزەگە اسىرعان جاندارعا العىسىمدى بىلدىرەمىن» دەدى ارت-نىساننىڭ اشىلۋىنا قاتىسقان نۇر-سۇلتان قالاسى اكىمىنىڭ ورىنباسارى اسحات ورالوۆ.
جۇرەك دونورلارىنىڭ قۇرمەتىنە قويىلعان ارت-نىسان قر ۇلتتىق عىلىمي كارديوحيرۋرگيا ورتالىعىنىڭ «جۇرەك ورتالىعى» قورىنىڭ باستاماسىمەن جۇزەگە اسىرىلدى.
«ارت-نىساندى ەلوردا تورىندە اشۋ تۋرالى يدەيانى ءبىزدىڭ ۇجىم كوتەردى. بۇل – جۇرەكتەرىن دونور ەتكەن جاندار مەن ولاردىڭ جاقىندارىنا دەگەن قۇرمەتتىڭ بەلگىسى. ويتكەنى دونور بولۋ جۇرەكتىڭ قالاۋى جانە وڭاي شەشىم ەمەس. دونور بولۋ – قايىرىمدى ءىس, بۇل جەردە پايدا كورۋ دەگەن سەكىلدى جەكە مۇددە كوزدەلمەۋى ءتيىس. تۋىندىنى كورگەن ادامدار بىلە ءجۇرسىن دەگەن ماقساتىمىز دا بار, ويتكەنى جۇرەگىن دونور ەتكەن جاندار وزگە بىرەۋدىڭ ءومىرىن قۇتقاردى» دەيدى قر ۇلتتىق عىلىمي كارديوحيرۋرگيا ورتالىعىنىڭ باسقارما توراعاسى يۋري پيا.
«ارت-نىسان جاساۋ يدەياسىن ماعان «جۇرەك ورتالىعى» ۇسىندى. ۇسىنىستى قۋانا قابىل الدىم. وزدەرىڭىزگە ايان, جۇرەك – ادامنىڭ باستى اعزاسى. بىرنەشە ەسكيز جاساپ ۇسىندىم, سونىڭ ىشىنەن وسى ينستاللياتسيانى تاڭداپ الدى. ارت-نىسان جۇرەك فورماسىندا تروستان جاسالعان. قىزىعى سول, تۋىندىنى اركىم ارقالاي قابىلداپ جاتىر, بىرەۋ جۇرەك فورماسىندا دەسە, ەكىنشىسى شامعا ۇقساتىپ جاتىر» دەدى جوبا اۆتورى ەدۋارد كازاريان.
