استانا قالاسىنداعى №59 مەكتەپ-ليتسەيدە ۇلى جەڭىستىڭ 70 جىلدىعىنا ارنالعان «ەرلىكتىڭ دە, ەڭبەكتىڭ دە مەدالى ءبىر مەتالدان قۇيىلادى!» اتتى پاتريوتتىق ساباق ءوتتى. ارنايى ساباققا ۇلى وتان سوعىسىنىڭ تىل ارداگەرلەرى, اۋعانستان سوعىسىنا قاتىسقان جاۋىنگەر-ينتەرناتسيوناليستەر, زەينەتكەر ۇستازدار جانە مەكتەپ مۇعالىمدەرى مەن وقۋشىلار قاتىستى.
استانا قالاسى ءماسليحاتىنىڭ دەپۋتاتى زاۋرە ءجۇسىپوۆا باسقاراتىن مەكتەپ-ليتسەيدە جاس ۇرپاقتى وتاندىق پاتريوتيزمگە تاربيەلەيتىن شارالار ءجيى ۇيىمداستىرىلاتىنىن الدىمەن ايتقىمىز كەلەدى. وسى وقۋ ورداسىندا جۇمىس جۇرگىزەتىن «سۇڭقار» پاتريوتتىق كلۋبى مەن «اكەلەر وداعى» ۇيىمىنىڭ تاجىريبەسى تەك قالاعا ەمەس, رەسپۋبليكاعا تانىلىپ وتىر.
جاقىندا وتكەن ارنايى ساباق تا قاتىسۋشىلارعا تاعىلىم بەرگەنى ايقىن. ورىس ءتىلى جانە ادەبيەتى ءپانىنىڭ مۇعالىمى ماريا تيكەنوۆا جۇرگىزگەن ساباقتا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, «مەموريالنايا زونا» ىزدەستىرۋ توبىنىڭ جەتەكشىسى مايدان قۇسايىنوۆ ۇلى وتان سوعىسىنا قاتىستى مازمۇندى ماعلۇماتتار ايتسا, استانا قالاسىنداعى رەسەي مادەني- عىلىمي ورتالىعىنىڭ ءبولىم جەتەكشىسى سۆەتلانا پەتروۆا, جاۋىنگەر-ينتەرناتسيوناليست جانكەلدى ماقاشەۆ, ەڭبەك ارداگەرلەرى يرينا چەرنىح پەن رىستى ايتماعانبەتوۆا, «سۇڭقار» پاتريوتتىق كلۋبىنىڭ جەتەكشىسى جانبولات حايرۋلين ءوز ويلارىن ورتاعا سالىپ, وقۋشىلار تانىمىن جاڭعىرتتى.
ۇلى جەڭىستىڭ 70 جىلدىعىنا ارناپ اسەرلى شارا ۇيىمداستىرعان تاجىريبەلى مۇعالىم ماريا تيكەنوۆا مەن وقۋ-تاربيە جۇمىستارى جونىندەگى ورىنباسارى كاميلا جاپيناعا شاقىرىلعان قوناقتار العىسىن ءبىلدىرىپ, مەكتەپ قابىرعاسىندا جۇرگىزىلىپ جاتقان پاتريوتتىق-تانىمدىق جۇمىستاردىڭ ساتىمەن جالعاسا بەرۋىنە تىلەك قوستى. وقۋشىلاردىڭ ساناسىنا اعا ۇرپاقتىڭ ەرلىگىن ءسىڭىرىپ, وتانسۇيگىشتىك رۋحتارىن شىڭداعان تاعىلىمدى شارا شاعىن كونتسەرتپەن ءتامامدالدى.
عالىم قوجابەكوۆ
