جۋىردا استانا قالاسى ءماسليحاتىندا جاستار اراسىندا ناشاقورلىقتىڭ الدىن الۋ ماسەلەسى قارالدى. جيىن بارىسىندا قالالىق جاستار ساياساتى ماسەلەلەرى باسقارماسىنىڭ باسشىسى قايرات قامباروۆ «Esirtkisiz Elorda» جاستار قوزعالىسىنىڭ تۇجىرىمداماسى» اتتى قۇجاتپەن تانىستىردى.
بايانداماشى جاستار اراسىندا ەسىرتكىگە تاۋەلدىلەردىڭ ستاتيستيكالىق پورترەتىن, ەسىرتكى قىلمىسى بويىنشا دەرەكتەردى كەلتىردى. ال «Esirtkisiz Elorda» تۇجىرىمداماسىن جۇزەگە اسىرۋ بىرنەشە قادامعا بولىنگەن. سونىڭ العاشقىسى – ناشاقورلىقتىڭ الدىن الۋ بويىنشا شتاب قۇرۋ. ونىڭ قۇرامىندا پسيحولوگ-ادديكتولوگ, ينتەرنەت ساراپشى, باسقا دا وسى سياقتى ماماندار بولادى. ەكىنشى قادام – وقۋشىلارعا ارنالعان ارنايى ويىن ەلەمەنتتەرى بار قوسىمشانى ازىرلەۋ. ءۇشىنشى قادام – ارنايى ستۋدەنتتىك ۇياشىقتاردى قۇرۋ. ءتورتىنشىسى – ءارتۇرلى الەۋمەتتىك توپتار ءۇشىن پروفيلاكتيكالىق كونتەنت دايىنداۋ. بەسىنشى قادام – ەسىرتكى ساتاتىن رەسۋرستار مەن جارنامالاردى بۇعاتتاۋ بويىنشا جۇيەلى جۇمىس جۇرگىزۋ. بۇل تۇجىرىمداما قادامدارى كەزەڭ-كەزەڭىمەن ىسكە اسىرىلادى. جوبانىڭ جالپى قۇنى – 300 ملن تەڭگە.
ال رەجيسسەر, پروديۋسەر بەيبىتجان ءمۇسىلىموۆ بۋللينگتى, ءسۋيتسيدتى, ەسىرتكىگە تاۋەلدىلىكتى الدىن الۋعا باعىتتالعان «فورۋم-تەاتر» جوباسىن تانىستىردى. بۇل جوبا برازيلياداعى اۋگۋستو بوال قۇرعان تەاتر ۇلگىسىندە قۇرىلدى. ول كورەرمەن مەن اكتەرلەردىڭ تىكەلەي قارىم-قاتىناسىنا مۇمكىندىك بەرەدى.
قالالىق ءماسليحات دەپۋتاتى كەندەباي ادامبەكوۆ كۇن تارتىبىندەگى ماسەلە تەك باس قالانىڭ عانا ەمەس, مەملەكەتتىك, ۇلتتىق قاۋىپسىزدىككە بارىپ تىرەلەتىن ماسەلە ەكەنىن اتاپ ءوتتى. بۇۇ 1988 جىلى ەسىرتكىگە قارسى كۇرەس كونۆەنتسياسىن بەكىتكەنىن, سوندىقتان «Esirtkisiz Elorda» تۇجىرىمداماسىنا حالىقارالىق تاجىريبەنى قوسۋدى ۇسىندى.
– ازيادا ناشاقورلىق قىلمىس رەتىندە, ەۋروپادا, اقش-تا ەمدەۋدى قاجەت ەتەتىن اۋرۋ رەتىندە قابىلدانادى, – دەگەن دەپۋتات شەتەلدە ناشاقورلىقتىڭ الدىن الۋ جۇمىسى ءارتۇرلى ورگاندار مەن ۇيىمداردىڭ قاتىسۋىمەن كەشەندى تۇردە جۇزەگە اسىرىلاتىنىن ايتتى. باسقا دا دەپۋتاتتار پىكىرلەرى مەن ۇسىنىستارىن جەتكىزدى.
استانا قالاسى ءماسليحاتىنىڭ توراعاسى ەرلان كاناليموۆ ارىپتەستەرىن قولداي كەلە, جاستار ساياساتى ماسەلەلەرى باسقارماسىنىڭ عانا كۇشىمەن بۇل ماسەلەلەردى شەشۋ مۇمكىن ەمەستىگىن اتاپ ءوتتى.
– بۇل ماسەلەمەن قالادا جالپى بەس مەملەكەتتىك ورگان اينالىسىپ وتىر. سول بەس ورگانعا بيىل ەسىرتكىگە قارسى كۇرەسكە 52 ميلليون تەڭگە بولىنگەن. بۇل – وتە از. وتكەن جىلدان بەرى دەپۋتاتتار باعدارلامانى دايىنداۋ قاجەتتىلىگى تۋرالى ايتىپ كەلەدى. اقىرىندا تۇجىرىمداما دايىندالدى. بىراق بۇل تۇجىرىمداماعا ناقتى كەشەندى جوسپار قاجەت. ارينە, دەپۋتاتتار «فورۋم-تەاتر» جوباسىن قولدايدى. مۋزىكالىق جاس كورەرمەن تەاترى, «جاستار» تەاترى نەمەسە «جاستار» سارايىن الاڭ رەتىندە پايدالانۋعا بولادى. كەيبىر دەپۋتاتتاردىڭ وقىرماندارى كوپ. وسى رەسۋرستى پايدالانۋ قاجەت. سونىمەن قاتار ولاردىڭ بارلىق ۇسىنىستارى مەن ەسكەرتۋلەرىن ەسكەرۋ كەرەك. ءماجىلىس دەپۋتاتتارىن دا قوسۋ كەرەك. سەبەبى بۇل – ۇلتتىق, مەملەكەتتىك پروبلەما. قالا اكىمدىگى جانىندا ناشاقورلىقتىڭ الدىن الۋ جانە وعان قارسى كۇرەس جونىندەگى ۆەدومستۆوارالىق كوميسسيا جۇمىس ىستەيدى. ونى جۇمىسقا قوسۋ قاجەت. قازىر بەس جىلعا ارنالعان مەملەكەتتىك باعدارلاما ازىرلەنىپ جاتىر. 2020 جىلعا دەيىن ەسىرتكىگە قارسى كۇرەسكە باعىتتالعان باعدارلاما بولدى. مىنە, ءۇش جىلعا اينالدى, بۇل باعدارلاما جوق. كەلەسى جىلى 2029-2030 جىلدارعا دەيىنگى مەملەكەتتىك باعدارلاما بەكىتىلەدى. سونىڭ اياسىندا جۇمىس ىستەۋ كەرەك. كەشەندى جوسپاردى بارلىق ۇسىنىستار مەن ەسكەرتۋلەردى ەسكەرە وتىرىپ پىسىقتاپ, بەكىتۋ قاجەت, – دەدى ەرلان كاناليموۆ.
استانا ءماسليحاتىنىڭ زاڭدىلىق, قۇقىقتىق ءتارتىپ جانە جۇرتشىلىقپەن جۇمىس ماسەلەلەرى جونىندەگى تۇراقتى كوميسسيانىڭ توراعاسى ازامات ايتحوجين وتىرىستى قورىتىندىلاي كەلە, ناشاقورلىقتى الدىن الۋعا قاتىستى ءتيىمدى باعدارلاما بولۋى تيىستىگىن ايتا كەلە, الداعى جەلتوقسان ايىندا قالالىق پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ بازاسىندا دوڭگەلەك ۇستەل ءماجىلىسىن وتكىزۋدى ۇسىندى.
