ادام جانىن جادىراتىپ, كوڭىلىن كوتەرتۋدە گۇلدەن اسقان سىيلىق جوق. گۇل جان-جاعىنا جۇپارىن شاشادى. اينالاعا سۇلۋلىق, نازىكتىك سىيلايدى.
الايدا, گۇل كوڭىل قۋانىشى ءتارىزدى, وڭايلىقپەن قول جەتكىزبەيدى.
گۇل وسىرۋدە وعان جان-تانىمەن قاراپ, بۇكىل ىقىلاسىن بولەتىن جاندار عانا جەتىستىككە جەتەدى.
باعباندىقتى وزىنە سەرىك ەتكەن ارۋلاردىڭ ءبىرى – «استانا كوگالداندىرۋ» اق-نىڭ قىزمەتكەرى ۇرقيا الپانوۆا. ەڭبەك جولىن 1999 جىلى گۇل ەگۋدەن باستاعان ول بۇگىندە ەلوردامىزداعى اسەم ساياباقتار مەن دەمالىس ورىندارىنداعى گۇلزارلارىن كۇتىپ, باپتاۋدا.
كوكتەم كەلىپ, تىرشىلىككە جان بىتكەندە گۇل وسىرۋشىلەردىڭ دە جۇمىسى قىزا تۇسەدى. اقپان ايىندا تۇقىمى سەبىلگەن گۇلدەر دە وسى كەزدەن باستاپ ايالى الاقان مەن قامقور كوڭىلدى قاجەت ەتە باستايدى. ءيا, كۇننىڭ نۇرى مەن جىلۋى, جەردىڭ ءنارى, سۋ قاجەت بولعانداي گۇلدەرگە نازىك كوڭىل دە كەرەك.
ءدال وسىنداي كەزدە ۇرقيا الپانوۆانىڭ دا قۋانىشىنا قۋانىش قوسىلىپ, بويىنا ەرەكشە مەيىرىمدىلىك ءبىتكەندەي بولادى.
مامىردىڭ باس كەزىندە گۇل وسىرۋشىلەر كوشەلەرگە گۇل وتىرعىزا باستايدى ەكەن. بۇل جۇمىس ءبىر ايعا سوزىلادى. «استانا كوگالداندىرۋ» مەكەمەسى جالپى قالا بويىنشا بۇل ايدا كۇنىنە بەس مىڭ ءتۇپ گۇل وتىرعىزىپ ۇلگەرەدى. ەگىلەتىن گۇلدەر ءارالۋان. ولاردىڭ اراسىندا بىرنەشە تۇستەن تۇراتىن گۇلدىڭ وتىز التى ءتۇرى بار.
ۇرقيانىڭ ايتۋىنشا, ادامنىڭ ماماندىعى ءمىنەزىنە اسەر ەتەدى. گۇل ءوسىرۋ, راسىندا دا ادام جانىنىڭ مەيىرىمدىلىگى مەن ءنازىكتىگىن ساقتاپ قالادى. سەزىمتالدىق, سۇلۋلىققا, تازالىققا قۇشتارلىق – باعبانداردىڭ ورتاق قاسيەتى. بۇل ورايدا «ءاربىر ەككەن گۇلىم مەن ءۇشىن قىمبات, ءتىپتى ولاردى كەيدە ءوز بالامداي الپەشتەپ قاراۋعا تىرىسامىن», – دەيدى ول.
گۇل كۇتىپ-باپتايتىنى وزىنە ۇنايدى. «ول كوڭىل-كۇيىمە ەرەكشە اسەر بەرەدى. گۇلدەر – تىرشىلىك اتاۋلىنىڭ ويانۋى مەن جاقسىلىققا دەگەن ءۇمىتتىڭ نىشانى. سوندىقتان, گۇل ءوسىرۋشى بولعانىم ءۇشىن ءوزىمدى باقىتتى سانايمىن», – دەيدى ۇرقيا اپاي.
سىيلىققا گۇل العاندى ۇناتاتىن ۇرقيانىڭ سۇيىكتى گۇلى – لالاگۇل. ول – مەيىرىمدىلىك پەن جان تىنىشتىعىنىڭ ءبىر بەلگىسى ىسپەتتى.
گۇل ءوسىرۋ نيدەرلاندى, گەرمانيا, جاپونيا سىندى ەلدەردە جاقسى دامىعان. اتالعان ەلدەر بۇگىندە گۇلدىڭ ارقاسىندا قىرعىن پايداعا كەنەلىپ وتىر. اتا-بابامىز كوشپەندى تىرشىلىك كەشىپ, كوگالداندىرۋعا اسا كوپ ءمان بەرمەگەندىكتەن, بۇل سالا بىزگە كەشەۋىلدەپ كەلگەن. دەگەنمەن, قازىرگى تاڭدا گۇل ءوسىرۋ ءبىزدىڭ ەلدە دە وركەندەپ كەلەدى.
ايەل ادامنىڭ باقىتى – انا اتانۋ. جانى جاس بالانىڭ جانىنداي تازا, كوڭىلى نازىك ارۋدىڭ كوڭىلىندەي پاك ۇرقيا ىلياسقىزى بۇگىندە ەكى قىزدى مەيىرىمدىلىك پەن يماندىلىققا تاربيەلەپ, ءوسىرىپ كەلەدى. قىزدارى دا اناسى سياقتى ۇيدە گۇل وسىرگەندى ۇناتاتىن كورىنەدى.
«پەرزەنتتەرىمە اتا-بابامىزدان كەلە جاتقان سالت-ءداستۇرىمىزدى سىڭىرە ءجۇرىپ, قازاقىلىققا تاربيەلەدىم. انانىڭ ەڭ ءبىرىنشى تىلەيتىنى بالالارىنىڭ اماندىعى. مەنىڭ دە باستى تىلەگىم – وسى. كوزىمنىڭ اعى مەن قاراسىنداي بولعان قىزدارىمنىڭ ازامات بولىپ ءوسىپ, ەلىنە ادال قىزمەت ەتكەنىن قالايمىن. انالىق نيەتىم – وسى» – دەيدى ول.
ۇرقيا الپانوۆا سۇيىكتى كاسىبىن ارى قاراي دوڭگەلەتىپ, ەلوردامىزدىڭ اسەمدەنە بەرۋىنە مەيلىنشە ۇلەس قوسقىسى كەلەدى. ونىڭ جانارىنداعى گۇلگە ىڭكارلىگى, ءوز ماماندىعىنا دەگەن ماحابباتى بىزگە وسىنى اڭعارتقانداي بولدى.
اينۇر قارامەنديەۆا
