الماتىدا وتكەن الەم چەمپيوناتىندا قازاقستان اۋىر اتلەتتەرى 3 التىن, 2 كۇمىس مەدال جەڭىپ الىپ, جالپىكوماندالىق ەسەپتە ءۇشىنشى ورىنعا تابان تىرەدى. قازاقتىڭ كوك بايراعىن ءۇش مارتە بيىككە كوتەرگەن ءزۇلفيا چينشانلو, جاسۇلان قىدىرباەۆ جانە يليا يلين سىندى ساڭلاقتار ەل مەرەيىن تاسىتتى. ۆلاديمير سەدوۆ پەن جازيرا جاپپارقۇل كۇمىس جۇلدەگە قول جەتكىزدى.
ءزۇلفيا باستادى!
قازاقتىڭ نامىسى ءۇشىن ايانباعان قارشاداي قىز بۇل جولى دا وسىدان ەكى جىل بۇرىن لوندون ويىندارىندا كورسەتكەن سالقىنقاندىلىعىن تاعى ءبىر كورسەتتى. زىلتەمىردى كوتەرۋگە شىققان سايىن ەشقانداي ارتىق ەموتسياعا بەرىلمەدى. كوڭىلىنىڭ كۇيىن قارسىلاستارىنا بىلدىرمەدى. شىققان سايىن جانە ولشەنىپ بەرىلگەن سالماقتى باسىنان اسىرىپ كوتەرە بەردى. وسىلايشا بيىلعى ازيا ويىندارىندا الدىن وراپ كەتكەن قىتايلىق سيۋ شۋتسزيننەن ەسەسىن قايتارىپ, ءۇشىنشى مارتە الەم چەمپيونى اتاعىن جەڭىپ الدى. ول ول ما, ءزۇلفيا الماتى تورىندە سەرپە كوتەرۋدە ەكى رەت قاتارىنان الەم رەكوردىن جاڭارتتى. 133 كەلىنى كوتەرىپ الەمدىك رەكوردتى ءبىر جاڭارتسا, ارادا ەكى مينۋت وتكەندە ءوز رەكوردىن تاعى ءبىر وزگەرتىپ تاستادى. بۇل جولى 134 كەلىنى باعىندىردى.
– ەندىگى ماقساتىم قوسسايىستا الەم رەكوردىن جاڭارتسام دەيمىن. قازىر بۇل كورسەتكىش 233 كەلى بولىپ تۇر. ال, مەن بولسام وسىعان دەيىن 232 كەلىنى كوتەرگەن بولاتىنمىن. بۇل ماقساتىما ريو-دە-جانەيرو ويىندارىندا جەتەمىن دەپ ويلايمىن, – دەدى الماتىداعى الەم چەمپيوناتىندا العاشقى التىندى العان ءزۇلفيا چينشانلو.
جاسۇلان قولدادى!
قازاقستان جەرىندە تۇڭعىش رەت ۇيىمداستىرىلعان الەم چەمپيوناتىنىڭ ەستە ساقتالاتىن ەڭ ايشىقتى ءساتىنىڭ ءبىرى دەپ جاسۇلان قىدىرباەۆتىڭ جەڭىسىن ايتۋعا بولادى. بۇل شىن مانىندە قازاق بالاسىنىڭ الەمدىك اۋىر اتلەتيكانىڭ اسقار شىڭىن باعىندىرعان, ياعني, الەم چەمپيونى اتاعىنا يە بولعان تاريحي ءساتى ەدى. جاقىندا عانا جيىرما ەكى جاسقا تولعان, ومىرىندە تۇڭعىش رەت الەم دوداسىنا تۇسكەن جاس جىگىت 94 كەلى سالماقتا توپ جاردى.
ول جۇلقا كوتەرۋدە 179 كەلى سالماقتى كوتەرىپ تەك ءۇشىنشى ورىنمەن شەكتەلگەن ەدى. الايدا, ءوزىن اسا قىزۋ قولداعان جانكۇيەرلەرى الدىندا نامىسقا قامشىنى باسقانى سونشالىق سەرپە كوتەرۋدە الدىنا جان سالمادى. 229 كەلىنى باسىنان ءبىر-اق اسىردى. ءسويتىپ, قوسسايىستىڭ قورىتىندىسىندا بارلىق قارسىلاستارىن قاپىدا قالدىرىپ كەتتى. 408 كەلى كوتەرىپ, الەم چەمپيونى اتاعىن جەڭىپ الدى. وسى توپتا تاعى ءبىر قازاقستاندىق ۆلاديمير سەدوۆ كۇمىس جۇلدەگەر اتاندى. ءۇشىنشى ورىنعا اتاقتى لاتىش اتلەتى اۋريماس ديدجۆاليس تابان تىرەدى.
– سوڭعى ەكى جىلدا ۇلكەن سپورتتا بولعان جوقپىن (2011 جىلى دوپينگكە قاتىسى بار دەگەن ايىپپەن ەكى جىلعا جارىستاردان شەتتەتىلگەن بولاتىن. ع.ق.). ەندى ورالدىم. الداعى ۋاقىتتا دا قازاقستاننىڭ اتاعىن شىعارا بەرەمىن, – دەيدى التىن مەدال يەگەرى جاسۇلان قىدىرباەۆ.
يليا شىرقادى!
شىنىن ايتۋ كەرەك, يليا ءيليننىڭ سايىسقا تۇسەتىن ءساتىن بارشا قازاقستاندىقتار تاعاتسىزدانا كۇتتى. وليمپ شىڭىنا ەكى رەت كوتەرىلگەن, الەم چەمپيونى اتاعىن ءۇش مارتە جەڭىپ العان اتاقتى جەرلەسىمىز لوندون ويىندارىنان كەيىن ءدۇبىرلى دوداعا تۇسپەي جۇرگەن. ونىڭ ۇستىنە اۋىرلاۋ سالماققا اۋىسقانى بەلگىلى ەدى. كوپتەگەن جانكۇيەرلەردىڭ «التىن بالانىڭ» جاڭا سالماقتاعى جاعدايى قالاي بولار ەكەن» دەگەن كۇپتى كوڭىلمەن جۇرگەندەرىن نەسىنە جاسىرامىز. «94 پەن 105 كەلىنىڭ ايىرماسى ايتارلىقتاي بولادى. يلينگە بۇل جولى وڭاي بولمايدى» دەگەندەر دە جەتكىلىكتى ەدى.
ال, ەندى, سول كۇپتى كوڭىلدەردى سەيىلتكەن, قالىڭ ەلىن جەڭىسىمەن سەرپىلتكەن يلين رەكوردىنا توقتالايىق.
يلين وسى الەم بىرىنشىلىگىندە 105 كەلىگە دەيىنگى سالماقتا سىنعا تۇسكەن سايىپقىراندار اراسىندا «قازاقستاندىق ۆۋندەركيند» ءوز مىقتىلىعىن تاعى دا دالەلدەپ شىقتى. وليمپيادا ويىندارىنىڭ جۇلدەگەرلەرى, الەم جانە قۇرلىق چەمپيوندارى تايتالاسقا تۇسكەن ءدۇبىرلى دودادا جەرلەسىمىز ناعىز تولاعاي ەكەنىن, شىن جۇيرىككە تۇساۋ بولمايتىنىن تورتكۇل دۇنيەگە پاش ەتتى. وسى سالماقتىڭ كوشباسشىلارى سانالىپ جۇرگەن, الەمدىك جارىستىڭ جەڭىمپازدارى وزبەكستاندىق رۋسلان نۋريدينوۆ پەن رەسەيلىك داۆيد بەدجانيان باستارىن شايقاۋمەن بولدى. ولاي دەيتىنىمىز, وسى جارىس ۇستىندە سەرپە كوتەرۋدە نۋريدينوۆ الەم رەكوردىن جاڭارتىپ جىبەردى. وسى ساتتە «مەنىڭ رەكوردىمدى جاڭارتقان قايسىڭ…» دەگەندەي بەدجانيان دا قاھارىنا مىنگەندەي بولدى. ول ءبىر مينۋت بۇرىن ورناعان جاڭا رەكوردقا تاعى ءبىر كەلى قوسىپ, 240 كەلى زىلتەمىردى باسىنان ءبىر-اق اسىرىپ, كەڭ سارايدى باسىنا كوتەرە ايقايلاپ جىبەردى. مۇنىسىن ەندى قايسىڭ بار دەگەنى شىعار دەپ ۇقتىق تا, ءيلينىمىزدى كۇتتىك. ال ونىڭ شەگىنەتىن جەرى قالماعان ەدى. سوڭعى مۇمكىندىگى عانا قالعان. الەم چەمپيونى بولۋ ءۇشىن 242 كەلىنى كوتەرۋ كەرەك. بۇل جانە جاڭا رەكورد بولماق.
ايتقاندايىن, يلين باپكەرلەرى 242 كەلىگە تاپسىرىس بەردى. بالۋان شولاق سارايى سىلتىدەي تىندى. يلين ورتاعا ادەتتەگىدەي ەركىن ءارى سەنىمدى قاداممەن كەلدى دە, كوپ مۇدىرمەي زىلتەمىردى كەۋدەسىنە ءبىر-اق كوتەردى, ءسويتتى دە, كەۋدەسىن كەرە دەمىن تارتتى دا, باسىنان اسىرىپ جىبەردى. كەڭ ساراي ءىشى گۋىلدەپ-ۋىلدەپ كەتتى. «يلين – چەمپيون!!!»
يليا جەڭىس تۇعىرىندا تۇرىپ قازاقستان ءانۇرانىن شىرقاعاندا ەل بولىپ تولقىدىق. ەل بولىپ مارقايدىق.
وسىلايشا, يليا يلين ءتورتىنشى مارتە الەم چەمپيونى اتاعىن جەڭىپ الدى. حالىقارالىق اۋىر اتلەتيكا فەدەراتسياسىنىڭ شەشىمىمەن الەم چەمپيوناتىنىڭ ۇزدىك اتلەتى اتاندى.
– مەن وسى جەڭىسىمدى قازاقستان پرەزيدەنتىنە جانە حالقىما ارنايمىن, – دەپ اعىنان جارىلدى بارشا قازاقستاندىقتاردى ەرەكشە كۇشىمەن ءتانتى ەتكەن يليا يلين.
كەلەسى الەم چەمپيوناتى حيۋستوندا وتەتىن بولادى.
عالىم قوجابەكوۆ
