كارانتيننەن كەيىن دە قاتاڭ ساقتايتىن تالاپتار كورسەتىلگەن قاۋلىعا سايكەس, ەلوردادا ويىن-ساۋىق, سپورتتىق جانە باسقا دا بۇقارالىق ءىس-شارالار, وتباسىلىق, ەسكە الۋ جيىندارى, جينالىستار مەن تاعى دا باسقا وتىرىستار وتكىزۋگە بولمايدى.
سپورت جاتتىعۋلارى تەك اشىق اۋادا جەكە تارتىپپەن جانە مىندەتتى تۇردە كەمىندە 2 مەتر الەۋمەتتىك قاشىقتىقتى ساقتاي وتىرىپ, 5 ادامنان اسپايتىن توپتار اراسىندا عانا وتكىزىلەدى. تابيعات اياسىندا ەكسكۋرسيالىق, كورپوراتيۆتىك, توپتىق ساپار ۇيىمداستىرۋعا جانە وڭىرلەردىڭ كورىكتى جەرلەرىنە شولۋ جاساۋعا, سونداي-اق جاعاجايلاردا شومىلۋعا تىيىم سالىنادى. بۇلار تەك ءبىر وتباسى مۇشەلەرىنەن نەمەسە 3 ادامنان اسپايتىن توپتارعا عانا رۇقسات ەتىلەدى.
بۇرىنعىداي 65 جاستان اسقان ادامداردىڭ قالادا جانە قوعامدىق ورىنداردا ءجۇرىپ-تۇرۋىنا شەكتەۋ ساقتالىپ وتىر. اۋلالاردا سەرۋەندەۋگە جانە ساياباقتارعا, الاڭدارعا, سكۆەرلەرگە, جاعالاۋلارعا 3 ادامنان اسپايتىن توپتارمەن نەمەسە ءبىر وتباسى مۇشەلەرىنە مىندەتتى تۇردە بەتپەردە كيىپ جانە كەمىندە 2 مەتر الەۋمەتتىك قاشىقتىقتى ساقتاي وتىرىپ بارۋعا رۇقسات بەرىلەدى.
سىرتتا تاماق ءىشۋ ءتارتىبى قالاي؟
كاسىبىنە كارانتين تۇساۋ سالعان مەيرامحانا, بار, ءدامحانا جۇمىسىنا رۇقسات بەرىلدى. عيماراتتىڭ ىشىندە دە, جازعى الاڭدا دا 30-دان ارتىق ەمەس ادام قابىلداۋ ارقىلى جۇزەگە اسىرىلادى. بۇل رەتتە كورشى ۇستەلدەردىڭ شەتكى ورىندارى اراسىندا كەمىندە 2 مەتر الەۋمەتتىك قاشىقتىق ساقتالىپ, ءبىر ۇستەلگە وتىراتىن ادام سانى 4-6-دان اسپاۋى قاجەت. قوعامدىق تاماقتانۋ ورىندارىنا جۇمىس كۇندەرى تاڭەرتەڭ ساعات 9:00-دەن كەشكى 23:00-گە دەيىن عانا جۇمىس ىستەۋگە رۇقسات ەتىلەدى. ال جەكە يەلىك اۋماقتارى مەن تۇرعىن ءۇي عيماراتتارىندا ورنالاسقان نىساندار ءۇشىن جۇمىس كەستەسى ساعات 9:00-دەن 22:00-گە دەيىن بولادى. دەمالىس كۇندەرى مۇنداي وبەكتىلەردىڭ جۇمىسى تەك اشىق اۋادا, ورىن سانى 30-دان اسپايتىنداي ەتىپ ۇيىمداستىرىلادى.
ءار ادامعا 4-5 شارشى مەتردەن كەلسە عانا
17 تامىزدان باستاپ جۇمىسىن قايتا باستايتىن كاسىپكەرلىك سۋبەكتىلەرىنىڭ قىزمەت تۇرلەرىنىڭ تىزبەسىندە سوسو, ساۋدا ۇيلەرى, ساۋدا جەلىلەرى, جابىق بازارلار بار. بۇلاردىڭ تولىمدىلىعى 30 پايىزدان اسپاۋى ءتيىس, عيمارات ءىشىنىڭ اۋماعى 1 كەلۋشىگە 4 شارشى مەتردەن كەلۋى كەرەك. سونىمەن قاتار سۇلۋلىق سالوندارى, شاشتاراز, سپا ورتالىقتارى, كوسمەتولوگيالىق قىزمەت كورسەتەتىن نىساندار دا جۇمىسىن باستايدى. باسسەينى جوق فيتنەس ورتالىقتاردىڭ تولىمدىلىعى 50 پايىزدان اسپاۋى ءتيىس جانە 1 كەلۋشىگە 5 ش.م بولادى. باسسەينى جوق مونشالار مەن ساۋنالاردىڭ دا تولىمدىلىعى 50 پايىزدان اسپايدى. بالالارعا ارنالعان تۇزەتۋ كابينەتتەرى, بالالار جانە ەرەسەكتەرگە ءبىلىم بەرۋ ورتالىقتارىنداعى توپتاردا بالالار الدىن الا جازىلۋ ارقىلى 5 ادامنان اسپاۋى كەرەك. مەكتەپكە دەيىنگى بالالار مەكەمەلەرىنىڭ كەزەكشى توپتارىنداعى ادام سانى 15-تەن كوپ بولماۋى قاجەت. جۇمىس بەرۋشىلەر قىزمەتكەرلەرىنىڭ كەمىندە 80 پايىزى ءۇشىن قاشىقتان جۇمىس ىستەۋ فورماتىن ساقتاۋى ۇسىنىلدى.
