كەنجەبولات جولدىباي, «باس رەداكتورلار كلۋبى» قوعامدىق بىرلەستىگىنىڭ پرەزيدەنتى: جاۋاپكەرشىلىك ساقتاماعاندار ار الدىندا جاۋاپ بەرەدى
30 قازان كۇنى قازاقستان جۋرناليستەر وداعى جانە باس رەداكتورلار كلۋبىنىڭ بىرلەسكەن وتىرىسىندا قازاقستان رەسپۋبليكاسى ءجۋرناليسىنىڭ ەتيكالىق كودەكسى قابىلدانعان بولاتىن. قالام يەلەرىنىڭ قوعامدىق جاۋاپكەرشىلىگىن ارتتىراتىن, الەۋمەت ءمۇددەسىنە زالالىن تيگىزبەۋىن قاداعالايتىن قۇجات ءجونىندە «باس رەداكتورلار كلۋبى» قب پرەزيدەنتى كەنجەبولات جولدىبايمەن تىلدەسكەن ەدىك.
– ءجۋرناليستىڭ كاسىبى مەن باسقا دا جاۋاپكەرشىلىگىن قامتاماسىز ەتەتىن كودەكستىڭ قابىلدانۋىنا نە تۇرتكى بولدى؟
– كودەكستىڭ قابىلدانۋى تۋرالى ماسەلە بۇعان دەيىن دە كوتەرىلگەن. ەلباسىنىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» ماقالاسىندا ايتىلعان ۇسىنىستار نەگىزىندە ازىرلەنگەن ەتيكالىق كودەكس بۇعان دەيىن ەلىمىزدىڭ ءار ايماقتارىندا قىزۋ تالقىلاندى. اتالمىش وتىرىستا سوڭعى رەت سۇزگىدەن ءوتىپ, كەيبىر تارماقتارىنا وزگەرىستەر ەنگىزىلگەننەن كەيىن ءبىر اۋىزدان قابىلداندى. جۋرناليستەردىڭ مورالدىق-ەتيكالىق قاعيداتتارى مەن كاسىبي قىزمەتىنىڭ نورمالارىن قالىپتاستىرۋ, جۇرتشىلىقتىڭ جۋرناليستەر مەن بۇقارالىق اقپارات قۇرالدارىنا سەنىمى مەن قۇرمەتى ارتۋىنا قول جەتكىزۋ مۇراتى ىقپال ەتتى.
– قۇجاتتا كورسەتىلگەن ادالدىق, سەنىمدىلىك پەن شىنايىلىقتى قالام يەلەرى قانشالىقتى ۇستانادى دەپ ويلايسىز؟
– ءسوز – قارۋ. بۇل قارۋدىڭ ارتىندا قاۋىپ بار. سوندىقتان قالام ۇستاعان جاندار ءسوز قادىرىن ۇعىنىپ, ىشكى تار مۇددەلەرگە ۇمتىلماۋ كەرەك. وسەك-اياڭنان اۋلاق, اقىل مەن سانانى بىلىكتىلىگىمەن ۇشتاستىرىپ جۇمىس ىستەي بىلگەنى ابزال. ءبىز – كوپ ۇلتتى ەلمىز. تاتۋلىق پەن ءىشكى تۇراقتىلىقتى ساقتاۋدى, قوعام مۇددەسىن قاشاندا ءبىرىنشى ورىنعا قويعان ءجون. ال مۇنداي جاۋاپكەرشىلىكتى ساقتاماعاندار الدىمەن ار-ۇياتى الدىندا جاۋاپ بەرەدى.
– بۇل كودەكس جۋرناليستەردىڭ مارتەبەسىن مەملەكەتتىك قىزمەتكەرلەردىڭ دەڭگەيىنە دەيىن كوتەرە الا ما؟
– بۇل تۋرالى باس رەداكتورلار كلۋبى تاراپىنان كوتەرىلىپ ءجۇر. ءجۋرناليستىڭ مارتەبەسىن ارتتىرۋ تۋرالى بۇعان دەيىن دە ايتىلىپ كەلگەن. ءالى دە ايتىلا بەرەدى. كودەكس بۇل ماسەلەنى تۇبەگەيلى شەشە الماسا دا, كومەكشى بولۋى ءمۇمكىن. ويتكەنى, بيلىك پەن جۋرناليستەردىڭ اراسى ءبىر تابان جاقىن. جۋرناليستەر قاۋزاعان ماسەلەلەردى بيلىك وكىلدەرى شەشۋگە, جۇزەگە اسىرۋعا مويىن بۇرىپ, مۇرىندىق بولادى.
