جىل باسىنان بەرى سارىارقا اۋدانىندا گازداندىرىلعان نىساندار سانى 80 پايىزعا ارتتى. وسىلايشا, اۋدان اۋماعىنداعى 2 308 نىسان كوگىلدىر وتىنمەن جىلىتۋعا كوشتى.
اتالمىش اۋداندا تاعى 698 نىساننىڭ گازعا قوسىلۋى ءۇشىن تەحنيكالىق شارتتار بەرىلدى. جالپى, اۋدان بويىنشا بارلىعى 5 141 ابونەنتتى كوگىلدىر وتىنعا اۋىستىرۋ قاراستىرىلعان.
سارىارقا اۋدانى اكىمى اپپاراتىنىڭ باس مامانى ارمان اجىكەنوۆتىڭ ايتۋىنشا, تۇرعىن ءۇي الاپتارىنداعى جەكە جانە كوپ پاتەرلى ۇيلەر عانا ەمەس, الەۋمەتتىك نىساندار دا جىل سوڭىنا دەيىن گازداندىرۋعا كوشەدى. وسى جىلدىڭ كۇزىنەن باستاپ №19 جانە №68 مەكتەپتەر, №85 بوبەكجاي-بالاباقشا, شەيح كۇنت قاجى مەشىتى جانە «شاراپات» الەۋمەتتىك قىزمەت كورسەتۋ ورتالىعى گازبەن جىلىتىلاتىن بولادى. تاعى ون الەۋمەتتىك نىساندى كوگىلدىر وتىنعا قوسۋ ءۇشىن بۇگىنگى تاڭدا ولاردى ىسكە قوسۋ-جوندەۋ جۇمىستارى جۇرگىزىلۋدە.
– تۇرعىن ۇيلەر مەن الەۋمەتتىك نىسانداردى گازعا قوسۋ ءۇشىن قالا اكىمدىگىمەن بىرلەسىپ بىرقاتار جۇمىستار جۇرگىزىلدى. مىسالى, الەۋمەتتىك كومەك مولشەرى 90 اەك-تەن 130 اەك-كە دەيىن ۇلعايتىلدى. ەندى ءۇيدى گازعا قوسۋ ءۇشىن بەلگىلەنگەن ساناتتاعى ابونەنتتەر 413 400 تەڭگەگە دەيىن بىرجولعى تولەم تولەيتىن بولادى. ەگەر 2021 جىلى 77 ادامعا الەۋمەتتىك كومەك كورسەتىلسە, 2022 جىلدىڭ سەگىز ايىندا 102 ءوتىنىش بەرۋشىگە وسىنداي كومەك كورسەتۋ ماقۇلداندى. سونىمەن قاتار, Halyk Bank گازعا قوسىلۋ ءۇشىن تۇرعىندارعا پايىزسىز نەسيە بەرەدى. سونداي-اق, ەكولوگيالىق تازا وتىنعا كوشۋ ۇدەرىسىن نەعۇرلىم جەدەلدەتۋ ءۇشىن قاجەتتى قۇجاتتار سانى ەكى ەسەگە قىسقارتىلدى, – دەدى ا.اجىكەنوۆ.
سالا ماماندارى ەلوردانى تولىق گازداندىرۋ اتموسفەراعا زياندى زاتتاردىڭ شىعارىلۋىن 6 ەسەگە دەيىن تومەندەتەتىنىن مالىمدەدى.
