فۋتبولدان قازاقستان چەمپيوناتىنىڭ پرەمەر-ليگاسىندا كەزەكتى تۋردىڭ ويىندارى ءوتتى.ەڭ قىزىقتى ءارى تارتىستى ويىن اقتوبە قالاسىندا ءوتتى دەۋگە نەگىز بار. مۇندا تۋرنير كەستەسىنىڭ باسىنداعى كوماندالار «اقتوبە» مەن «استانا» كەزدەستى. وسىعان دەيىن ەكى كوماندانىڭ ۇپايلارى بىردەي بولاتىن. سوندىقتان, وسى ويىندا جەڭىسكە جەتكەن كوماندا كوشباسشى بولاتىنى انىق ەدى. ەلىمىزدىڭ ءتورت دۇركىن چەمپيونى «اقتوبە» ءۇشىن بيىلعى چەمپيوناتتاعى باستى قارسىلاس «استانا» بولىپ وتىر. ولاي دەيتىنىمىز, چەمپيوناتتىڭ ەكىنشى كەزەڭىندە, ياعني العاشقى «التىلىقتا» وسى ەكى كوماندا عانا التىن مەدال ءۇشىن تالاساتىنىن اڭعارتىپ وتىر.
ال ەندى ويىن بارىسىن ايتار بولساق, وتە تارتىستى وتكەن ماتچتىڭ ءبىرىنشى كەزەڭىندە ەسەپ اشىلماعانىمەن, ەكىنشى تايمدا كاپادزە مەن حايرۋللين مەرگەندىگىمەن تانىلدى. ءسويتىپ, «اقتوبە» 2:0 ەسەبىمەن جەڭىسكە جەتتى.
چەمپيوناتتىڭ اياقتالۋىنا دەيىن ءالى بەس تۋر بار, دەمەك ەڭ قىزىقتى دا ماڭىزدى ويىندار ءالى الدا دەۋگە بولادى.
عالىم قوجابەكوۆ
