مامىراجاي مامىر ايىنىڭ ورتاسى جاۋىن-شاشىنعا تولى بولىپ, ەلىمىزدىڭ سولتۇستىك وڭىرلەرىن ابىگەرگە سالىپ جاتقانى انىق. اسىرەسە, ونىڭ ەلىمىزدىڭ باس قالاسى – استانادا تاۋلىك بويى شەلەكتەپ جاۋعان جاڭبىردىڭ سالدارىنان قالانىڭ كەيبىر شەتكەرى ورنالاسقان اۋداندارىنداعى جەكە ۇيلەر مەن جول بويىن سۋ الىپ, وتكەل بەرمەس تاسقىنعا اينالعانى بارىمىزگە ايان. سوندىقتان, وسىنداي كەزدەيسوق اپاتتىڭ الدىن الۋ ءۇشىن استانا قالاسى اكىمدىگى قاجەتتى بارلىق شارالاردى جاساپ جاتىر. ول تۋرالى قالالىق كوممۋنالدىق شارۋاشىلىق باسقارماسى باسشىسى پاۆەل كۋلاگين مالىمدەدى.
– وزدەرىڭىزگە ءمالىم, وسى ايدىڭ 16-21 كۇندەرى جاۋىن-شاشىن مولشەرى ءبىر ايلىق نورمادان اسىپ, قالانىڭ بىرنەشە كوشەسى مەن ۇيلەرىن سۋ الدى. بۇگىنگى تاڭدا اتالعان جەرلەردە تاۋلىك بويى سۋدى سورۋ جۇمىستارى قاۋىرت جۇرگىزىلۋدە. ءتورت كۇننىڭ ىشىندە استانا قالاسىندا 45 مىڭ تەكشە مەتر سۋ سورىلدى. ال 20 مامىر كۇنى 11 591
مىڭ تەكشە مەتر سۋ تازارتىلدى. ءبۇگىنگى تاڭدا قالا كوشەلەرىندە 215-كە جۋىق ارناۋلى تەحنيكا جۇمىس ءىستەۋدە.
سينوپتيكتەردىڭ بولجامىنشا, جاۋىن-شاشىندى اۋا-رايى استانا قالاسىندا اپتا سوڭىنا دەيىن ساقتالماق. سوندىقتان, تاعى دا قوسىمشا تەحنيكا تارتىلماق, – دەدى پ.كۋلاگين.
جاڭبىردىڭ ۇزدىكسىز جاۋىنا بايلانىستى «زاپادنىي», «گازماشاپپاراتۋرى» ساياجايلارىنداعى ۇيلەردى سۋدان ساقتاۋ ءۇشىن ەسىل وزەنى ارناسىنىڭ بويىمەن ەكى جەردەن قورعانىس ورناتىلدى. ءتورت كۇننىڭ ىشىندە ءورت ءسوندىرۋ جانە ازاماتتىق قورعانىس قىزمەتكەرلەرىنىڭ كۇشىمەن 14 872 م³ سۋ سورىلىپ الىندى, 3450 قۇمعا تولى ىدىس-قاپ قويىلىپ, جەكە قۇرامنان 65 ادام جانە 12 تەحنيكا جۇمىلدىرىلدى.
ازامات ەسەنجول
