ەلىمىزدە داستۇرگە اينالعان «مەكتەپكە جول» اتتى قايىرىمدىلىق شاراسىنا مەشىتتەر دە اتسالىسۋدا. بۇل جونىندە گازەت تىلشىسىنە قازاقستان مۇسىلماندارى ءدىني باسقارماسىنىڭ استانا قالاسىنداعى وكىلى, «نۇر-استانا» مەشىتىنىڭ باس يمامى ناۋرىزباي قاجى وتپەنوۆ اڭگىمەلەپ بەردى.
– يسلام ءدىنىنىڭ قايىرىمدىلىق ىستەردى قۇپتايتىنى بەلگىلى. وسى ورايدا, استانالىق قالتالى ازاماتتار اراسىنداعى ىزگىلىككە قۇشتارلىق تانىتاتىندار جونىندە ايتا كەتسەڭىز.
– ساف التىنداي تازالىق پەن مەيىرىمدىلىككە, جۇمساقتىق پەن كەشىرىمشىلدىككە ۇندەيتىن اسىل ءدىنىمىز اتا داستۇرىمىزبەن ۇيلەسىم تاۋىپ, تامىرىن تاريح قاتپارىنان تارتىپ كەلەدى. ءبىر اللانىڭ رازىلىعى ءۇشىن ساۋاپتى ىستەرگە اتسالىسىپ, قايىرىمدىلىق شارالارىنا مۇرىندىق بولىپ جۇرگەن
ازاماتتار ەل ىشىندە بارشىلىق. بۇل دا بولسا اسىل ءدىنىمىزدىڭ كوكجيەگىنىڭ كەڭەيۋى, شاڭىراعىنىڭ بيىكتەۋى دەپ بىلەمىز.
اق پەن قارا الماسقان قىم-قۋىت تىرشىلىكتە تاعدىردىڭ سان قيلى سىناقتارى مەن قيىنشىلىقتارىنا تاپ بولعان قانداس, ەلدەس, وتانداستارىمىز, اعايىن-تۋعاندارىمىز مەشىتىمىزگە كەلىپ جاتادى. بارشاسىنىڭ مۇڭ-مۇقتاجىنا مەشىت قىزمەتكەرلەرى بەيجاي قاراماي, قولدا بار مۇمكىندىكتەرىمەن ايانباي قول ۇشىن سوزۋدا. باسا ايتا كەتەرلىگى, وسى ىستە جۇمىلا كىرىسىپ, اتسالىسىپ كەلە جاتقان كاسىپ دوڭگەلەتكەن ازاماتتاردىڭ ۇلكەن سەپتىگى تيۋدە. الايدا, ولاردىڭ كوپشىلىگى ەسىمدەرىن جاريا ەتپەۋدى قالايدى. سونداي ازاماتتارىمىزعا اللا ەكى دۇنيەنىڭ باقىتىن بەرسىن, وتباسىلارىنا اماندىق-ساۋلىق جازسىن دەپ سۇرايمىز جاراتقاننان.
– قازىر ەلىمىزدىڭ بارلىق وڭىرىندە, ونىڭ ىشىندە استانا قالاسىندا كەزەكتى وقۋ جىلى قارساڭىندا «مەكتەپكە جول» قايىرىمدىلىق اكتسياسى وتۋدە. بۇل يگى شاراعا ەلوردالىق مەشىتتەردىڭ جاماعاتتارى قانشالىقتى ۇلەس قوسۋدا؟
– اعىمداعى تامىز ايى – مەكتەپ ماۋسىمىنا دايىندىق ايى. اتا-انالار بالالارىنا مەكتەپكە قاجەتتى وقۋ قۇرالدارى مەن كەرەك-جاراق, كيىم-كەشەكتەرىن ازىرلەۋگە كوشۋدە. وسى ماۋسىمدا كوشتەن كەيىندەۋ قالاتىن وتباسىلار دا بولاتىنى جاسىرىن ەمەس. قاي اتا-انا بالاسىنان بارىن اياپ قالار دەيسىز. وسى رەتتە جاپىراق جۇرەك جەتكىنشەكتەرگە قۋانىش سىيلاپ, كوڭىلدەرىنە دەمەۋ بولۋ دا – مۇسىلماندىعىمىزدىڭ بەلگىسى.
استاناداعى ازىرەت سۇلتان, «نۇر-استانا» جانە سادۋاقاس عىلماني مەشىتتەرى مەكتەپ بالالارىنا قاجەتتى كيىم-كەشەك, وقۋ فورمالارىن الەۋمەتتىك جاعدايى تومەن وتباسىلارعا ۇلەستىرۋ ماقساتىندا ءسىز ايتقان قايىرىمدىلىق اكتسياسىنا ءبىر كىسىدەي ۇلەس قوسۋدا. جاقسىلىقتا جارىسامىن, كوپشىلىككە كومەگىم ءتيسىن دەگەن, ساۋابىن ءبىر اللادان كۇتكەن كىسىلەردىڭ ءالى دە قايىرلى ىسكە قاتىسۋلارىنا مۇمكىندىك بار.
– دۇرىس-اق, شارا بارىسىندا كومەككە مۇقتاج قانشا وتباسىنى قامتاماسىز ەتپەكسىزدەر؟
– ەڭ الدىمەن استانا مەشىتتەرىنىڭ بۇل يگى شارانى بىرنەشە جىلدان بەرى ءداستۇرلى تۇردە ۇيىمداستىرىپ كەلە جاتقانىن ايتقىم كەلەدى. ال ەندى اكتسيا اياسىندا ازىرەت سۇلتان مەشىتى ءۇش ءجۇز ءبۇلدىرشىندى, «نۇر-استانا» ورتالىق مەشىتى ەكى ءجۇز ەلۋ بالانى, سادۋاقاس عىلماني مەشىتى جۇزدەن استام وقۋشىنى كەرەك-جاراقتارىمەن, وقۋ قۇرالدارىمەن قامتىماق.
– اڭگىمەڭىزگە راقمەت!
