ۇلاعاتتى ۇستاز, ەڭبەك ارداگەرى, اقمولا قالاسىنىڭ قادىرلى ازاماتى ەركىن داۋەشۇلى وتكەن عاسىردىڭ جەتپىسىنشى جىلدارىنىڭ باسىندا قىزمەت بابىمەن وبلىستاعى قارابۇلاق ەلدى مەكەنىنە اۋىستىرىلادى. سول كەزەڭدە جەڭگەمىز حاميلانىڭ اياعى اۋىر ەدى. جالپى كىم بولسا دا وتباسىندا بىرىڭعاي ۇل بولسا, كەلەسى ءسابيى قىز بولۋىن, ال قىز بالالار بولسا, ۇل بولۋىن قالايتىنى زاڭدىلىق ەمەس پە؟! ەرەكەڭ مەن جەڭگەمىز بولسا گۇلنارا, گۇلشات جانە دينارا ەسىمدى قىزدارىنا ءىنى بولۋىن تىلەپ جۇرەدى. 
كەڭشار باسشىلىعى جاس ماماننىڭ وتباسىنا جاڭا سالىنعان ۇيدەن پاتەر بەرەدى. مەكتەپ ديرەكتورىنىڭ جۇمىسى بىتكەن بە, ەركىن داۋەشۇلى جۇمىسقا بىلەك تۇرەنىپ كىرىسىپ كەتكەن. سول جىلعى قىستىڭ العاشقى ايىنىڭ ەكىنشى جارتىسىندا حاميلا قۇلبەكقىزى ستەپنوگورسك قالاسىنىڭ اۋرۋحاناسىنىڭ بوسانۋ بولىمىنە جاتتى. ءدال وسى تۇستا ىستەمەي تۇرعان قۇرىلعىلار ىسكە قوسىلىپ, ۇيگە جىلۋ دا بەرىلەدى. وسىنداي كۇندەردىڭ بىرىندە پەرزەنتحانادان قۋانىشتى حابار دا جەتەدى. اقجولتاي حاباردى ەستىگەن ەرەكەڭنىڭ ءتانى دە, ىشكى دۇنيەسى دە جىلىپ كەتەدى. جان دۇنيەسى قالاعان ۇل بالاسى ءومىر ەسىگىن اشادى. پاڭ نۇرماعامبەتتىڭ ەلىندە تۋعاندىقتان, ۇلكەندەر سول كىسىنىڭ ەسىمىن بەرۋدى ۇسىنادى. بىراق وتاعاسى بالالارمەن اقىلداسا وتىرىپ, مارات دەگەن ەسىمدى بەرۋدى شەشەدى. وسىلاي اتا-انا ارمانى ورىندالىپ, قازاقتىڭ ءبىر ۇلى بىرتە-بىرتە ءوسىپ جەتىلە باستادى. ارينە, باسقا وتباسىنداعىداي جالعىز ۇل ەرەكشە قامقورلىقتا بولدى, اسىرەسە بۇعان اناسى ەرەكشە كوڭىل ءبولىپ ءجۇردى, ۇلكەن بالالارىنا ماراتتى رەنجىتپەڭدەر دەپ ايتاتىن. ەركەلىگى سونداي ءۇيدىڭ سىرتىندا شوق قاراعاي بولىپتى, بالاباقشاعا بارا جاتقاندا سول اعاشقا ورمەلەپ شىعىپ كەتىپ, اناسىن, اپالارىن ءبىراز اۋرەلەيتىن كورىنەدى. بىردە بالاباقشادا اۋلاعا ويناۋعا شىققاندا ءبىر-ەكى دوسىن ەرتىپ الىپ, بەس-التى شاقىرىم جەردەگى ستەپنوگورسك قالاسىنا كەتىپ قالادى. تاربيەشىلەرىنىڭ زارەلەرى ۇشىپ, بىراق اتا-اناسىنا حابارلامايدى. بالالار بولسا قالا دۇكەندەرىن ارالاپ, تيىن-تەبەندەرىنە تاتتىلەر الىپ جەپ, جۇمىس اياعىنا دەيىن بالاباقشاعا قايتىپ كەلىپتى.
اتا-بابامىزدا «اللا بالا بەر, بالا بەرسەڭ سانا بەر, سانا بەرمەسەڭ الا بەر» دەگەن ءسوز بار. مارات سانالى, ەركە بولىپتى. مەكتەپتە وقىپ جۇرگەنىندە اتا-اناسىنا سەزدىرمەي قىرماندا تۇنگى اۋسىمدا جۇمىس ىستەپ, تابىس تاۋىپ, ونى ۇيگە اكەلىپ بەرىپ ءجۇرىپتى.
قازان قالاسىندا ۋنيۆەرسيتەتتە وقىپ جۇرگەنىندە, توقسانىنشى جىلداردىڭ ورتا شەنىندە, قيىن جىلدارى, كوممەرتسيانىڭ جاڭا باستالعان كەزەڭىندە ساۋدامەن اينالىسىپ, اتا-اناسىنا سالماق سالماي ءوزىن-ءوزى قارجىلاندىرا وتىرىپ, قوسىمشا قاراجات تاۋىپ, سول كەزدەگى اقمولا قالاسىنان ەكى بولمەلى پاتەر ساتىپ الادى.
سىلەتى ورتا مەكتەبىندە وقىپ جۇرگەندە اناسى حاميلا قۇلبەكقىزى سىنىپ جەتەكشىسى بولادى. اناسىنا جولداستارىن ۇيىمداستىرىپ سىنىپتارىنىڭ الدا بولۋىنا قولعابىسىن تيگىزىپ ءجۇرىپتى. اقكول قالاسىنىڭ №1 ورتا مەكتەبىن ۇزدىك ءبىتىرىپ, قازان قالاسىنداعى تەحنيكالىق ۋنيۆەرسيتەتتى دە ويداعىداي اياقتاپ, اقمولا قالاسىنا ورالادى. سول كەزدە كومپيۋتەرلىك تەحنيكانى بىلەتىندەر وتە از بولاتىن. وزىمەن كومپيۋتەرلەر الا كەلىپ, ءوز ۇيىندە قالا قىزمەتكەرلەرىن وقىتا باستايدى. اقمولا وبلىسىنىڭ ءبىر سالالىق باسقارماسى قىزمەتكە شاقىرادى. وندا ءبىراز ىستەگەننەن كەيىن پرەزيدەنتتىڭ ءىس باسقارماسىنا قىزمەتكە اۋىسادى. بۇل قىزمەتتە دە ۇزاق بولماي رەسپۋبليكالىق مەملەكەتتىك قىزمەت اگەنتتىگىنە كونكۋرس جاريالانىپ, سوندا جەڭىپ شىعىپ, وسى اگەنتتىكتىڭ قىزمەتكەرى بولىپ شىعا كەلەدى. مىنە, وسى كەزەڭنەن باستاپ مەملەكەتتىك قىزمەتتى اتقارىپ كەلەدى. ودان كەيىن پرەزيدەنت اكىمشىلىگىنە دە كونكۋرسپەن وتەدى. وسى مەكەمەدە جيىرما جىلدان استام قىزمەت اتقارىپ, ءبولىم مەڭگەرۋشىسى دارەجەسىنە دەيىن كوتەرىلەدى. وتكەن جىلى مەملەكەتتىك قىزمەت اگەنتتىگى قۇرىلعاندا تاجىريبەلى مامان رەتىندە باسشىنىڭ ءبىرىنشى ورىنباسارى قىزمەتىنە اۋىستىرادى.
مارات ەركىنۇلى عۇمىرىنىڭ جارتىسىنان ارتىعىن مەملەكەتتىك قىزمەتكە ارناپ كەلەدى. وسى ابىرويلى ءىسى باعالاۋسىز قالعان جوق. «پاراسات», «قۇرمەت» وردەندەرىمەن قوسا كوپتەگەن مەملەكەتتىك ماراپاتتاردىڭ يەگەرى.
وسىنداي جوعارى دارەجەلى قىزمەتتە جۇرسە دە, ومىردە قاراپايىم, ۇلكەنگە ءىنى, كىشىگە اعا بولىپ, قولىنان كەلگەنىنشە كومەكتەسۋگە تىرىسادى. سىنىپتاس دوستارىمەن وسى كۇنگە دەيىن بايلانىسىن ۇزبەپتى. سەكسەننىڭ سەڭگىرىنە شىققان اتا-اناسىنىڭ قامقورشىسى. اقش, يزرايل, گەرمانيا, كورەيا سياقتى مەديتسيناسى دامىعان ەلدەرگە بارعاندا بىزدە جوق دارىلەردى, ۆيتاميندەردى اكەلىپ بەرىپ, ۇلكەندەرىنىڭ ۇزاق باقىتتى عۇمىر كەشۋىنە تىلەۋقور بولىپ ءجۇر.
كەيىپكەرىمىز – ونەگەلى وتباسىنىڭ وتاعاسى. التى بالانىڭ اكەسى, ۇلكەندەرى حاديشا ماسكەۋدە وقىسا, رابيعا قازاق-تۇرىك ليتسەيىنىڭ سوڭعى سىنىبىندا الدىڭعى قاتارلى وقۋشى, يبراھيم ماتەماتيكالىق مەكتەپكە ءتۇستى, فاتيما مەن ءاليحان گيمنازيانىڭ باستاۋىش سىنىپ وقۋشىلارى, كەنجەلەرى حايدار بيىل كوكتەمدە دۇنيە ەسىگىن اشىپتى.
جىل سوڭىندا ءبىزدىڭ كەيىپكەرىمىز مارات ەركىنۇلى داۋەشوۆ ءوزىنىڭ جارتى عاسىرلىق عۇمىرىن وسىنداي ەگەمەن ەلىنە ادال قىزمەت ەتۋىمەن, ونەگەلى وتباسى بولۋىمەن, ادامگەرشىلىگىن ساقتاپ, ءالى دە حالقىنا قىزمەت ەتەمىن دەگەن نيەتپەن قارسى الماقشى ويى بار. ءبىز تەك قانا ساتتىلىك تىلەيمىز!
