سالاۋاتتى ءومىر سالتىن ۇستانىپ, ۇنەمى جايدارى جۇرەتىن ايسۇلتان جاقىپبەكوۆ وسكەلەڭ ۇرپاققا ونەگە بولىپ جۇرگەن ابزال ازاماتتىڭ بىرەگەيى دەسەك جاراسادى. بۇكىل سانالى عۇمىرىن بالالار تاربيەسىنە ارناعان ۇلاعاتتى ۇستاز ءالى دە مەكتەپتە, ءالى دە مۇعالىم…
ايسۇلتان تۇسىپبەكۇلى قاھارلى جىلداردىڭ بالاسى, ياعني ۇلى وتان سوعىسىنىڭ ناعىز قىزعان شاعىندا 1943 جىلى اقمولا قالاسىندا دۇنيەگە كەلگەن ەكەن. بالالىق شاعى سوعىسپەن تۇسپال كەلگەندەر جانكەشتى بولادى دەگەن ءسوزدىڭ جانى بار ما ەكەن, ايسەكەڭ دە ەڭبەككە ەلگەزەك بولىپ ەر جەتتى. تابيعاتىنان بالاجاندى بولعان ازاماتتىڭ بار ويى مەكتەپتە مۇعالىم بولۋدى قالايتىن ەدى. سولاي بولدى دا, ايسۇلتان تۇسىپبەكۇلى ءومىرىنىڭ 45 جىلىن جۇرەگى قالاعان مۇعالىم ماماندىعىنا ارنادى.
قاراعاندى قالاسىنداعى مۇعالىمدەر ينستيتۋتىنىڭ دەنە شىنىقتىرۋ فاكۋلتەتىن بىتىرگەن جاس مامان ەڭبەك جولىن اۋىل مەكتەبىنەن باستادى. قورعالجىن اۋدانىنىڭ كەڭبيدايىق اۋىلداعى سەگىزجىلدىق مەكتەپتە بالالاردى سپورتقا باۋلىدى. كەيىننەن تۋعان قالاسى اقمولاعا ورالىپ پەداگوگيكا ۋچيليششەسىندە ساباق بەردى. وبلىستىق ءبىلىم بەرۋ باسقارماسى ءوز ىسىنە اسا جاۋاپكەرشىلىكپەن قارايتىن جاس ماماندى جەرگىلىكتى مۇعالىمدەر ءبىلىمىن جەتىلدىرۋ ينستيتۋتىنا جولدايدى. ءبىرنەشە جىل دەنە شىنىقتىرۋ كابينەتىنىڭ مەڭگەرۋشىسى قىزمەتىن ابىرويمەن اتقاردى. بالالار ورتاسىندا جۇرگەندى جانى قالايتىن ايسۇلتان اعا قايتادان مەكتەپكە ورالعاندى ءجون سانادى. سودان بەرى, ياعني 1994 جىلدان بەرى قالا مەكتەپتەرىندە مۇعالىم بولىپ جەمىستى ەڭبەك ەتۋدە. جوعارى ساناتتى ادىسكەر اتاندى.
– ايسۇلتان اعا بىزگە ارىپتەس ءارى ونەگە بولىپ جۇرگەن ازامات. جاسى جەتپىسكە تولىپ وتىرسا دا, جۇمىستان قول ۇزگەن ادام ەمەس. قاشان كورسەڭىز دە وقۋشىلاردىڭ ورتاسىندا جۇرەدى. بالالار دا ونى جاقسى كورەدى. ءويتكەنى, ول ۋاقىتپەن ساناسپاي جۇمىس ءىستەيدى. ول تەك قانا ساباق بەرىپ قويمايدى, بوكستان باپكەر, توعىزقۇمالاقتان ادىسكەر بولىپ تا ۇلگەرىپ ءجۇر. وسىنداي ەڭبەكقور اعامەن بىرگە جۇمىس ىستەۋدىڭ ءوزى ءبىر عانيبەت دەپ ايتار ەدىم, – دەيدى №62 مەكتەپ-گيمنازيانىڭ مۇعالىمى سايىن قۇندىباەۆ.
ءيا, ايسۇلتان تۇسىپبەكۇلىنىڭ ءبىز ءالى ايتپاعان تاعى ءبىر قىرى بار. ول – باپكەرلىگى. 1962-1965 جىلدارى بەلارۋس اسكەري وكرۋگىندە اسكەري قىزمەتىن اتقارىپ ءجۇرگەندە بوكسقا قاتىسىپ, بىرقاتار جارىستاردا جۇلدەگەر اتانعانى بار. اسكەردەن كەيىن دە بىلعارى قولعاپتى تاستاماي رەسپۋبليكالىق جارىستاردا ولجا سالىپ ءجۇردى. وسى بوكستا جيناعان ءتاجىريبەسى باپكەرلىككە دە جەتەلەدى. كوپتەگەن شاكىرتتەرى ەلگە تانىلدى. ماسەلەن, بوكستىڭ الىپپەسىن ايسۇلتان اعادان ءۇيرەنگەن د.ەلۋباەۆا, ن.ومىرباەۆا, ل.ابدراحمانوۆا, ا.جۇماعۇلوۆا سىندى بوكسشى قىزدار بۇگىندە رەسپۋبليكالىق جانە حالىقارالىق جارىستاردا جۇلدەگەرلەر قاتارىنان كورىنىپ ءجۇر.
ۇلتتىق سپورتقا دا ايرىقشا قارايتىن ۇلاعاتتى ۇستاز توعىزقۇمالاق پەن اسىق اتۋ سپورتىن دا جانداندىرۋعا ايتارلىقتاي اتسالىسىپ ءجۇر. مەكتەپتە ۇيىرمە ءجۇرگىزىپ, شاكىرتتەرىن جارىسقا قوسادى.
تاعى ءبىر قوسارىمىز, ايسۇلتان اعا ەلوردامىزدا ءوتىپ تۇراتىن بۇقارالىق سپورت شارالارىنا بەلسەندى قاتىسۋشىلاردىڭ ءبىرى. قىستا شاڭعى, جازدا جۇگىرۋ جارىستارىنان ءبىر قالمايدى. وسىنداي سپورتقا دەگەن قۇشتارلىعى جانە جاستارعا كورسەتىپ جۇرگەن ونەگەسى ءۇشىن استانا قالاسىنىڭ تۋريزم, دەنە تاربيەسى جانە سپورت باسقارماسى مەن ءبىلىم باسقارماسى ايسۇلتان تۇسىپبەكۇلىنا بىرنەشە مارتە العىس جاريالاپ, ماراپات كورسەتتى.
ايسۇلتان اعا – ۇلاعاتتى ۇستاز عانا ەمەس, بالالارىنا ونەگەلى اكە, نەمەرەلەرىنە ارداقتى اتا بولىپ وتىرعان جايدارلى جان. قۇداي قوسقان جارى گۇلنار ەكەۋى ۇلدارىن ۇياسىنا, قىزدارىن قياسىنا قوندىرعان باقىتتى جاندار.
جەتپىسكە كەلسە دە جاستار مەن بالالاردىڭ ورتاسىندا ءجۇرىپ, ەڭبەكتەن قول ۇزبەي كەلە جاتقان ايسۇلتان اعانىڭ ۇستانعان ءومىر سالتى كىمگە بولسا دا ونەگە بولاتىنىنا سەنىمدىمىز.
عالىم قوجابەكوۆ
