«استانا» كومانداسىنىڭ يتاليالىق ۆەلوشاباندوزى ۆينتسەنتسو نيبالي «تۋر دە فرانس» ءتۋرنيرىنىڭ جەڭىمپازى اتاندى. جارىستىڭ جالپى قورىتىندىسى بويىنشا, ودان كەيىنگى ورىندارعا قوس فرانتسۋز جان-كريستوف پەرو («AG2R») مەن تيبو پينو («FDJ») ورنالاستى.
وسى جەڭىسىنە وراي «استانا» كومانداسىنىڭ سپورتشىسىنا ەلباسى نۇرسۇلتان نازارباەۆ قۇتتىقتاۋ جەدەلحاتىن جولدادى. وندا «ءسىزدىڭ ەڭبەگىڭىز بەن جەڭىسكە دەگەن جىگەرىڭىز بارلىق كەزەڭدە ءبىزدىڭ ۆەلوكومانداعا قازاقستاننىڭ سپورتتىق جەتىستىكتەرىن تاعى دا تانىتۋعا مۇمكىندىك بەردى» دەلىنگەن.
سوڭعى 21-ءىنشى كەزەڭدە «Giant-Shimano» كومانداسىنىڭ وكىلى نەمىس مارسەل كيتتەل مارە سىزىعىن ءبىرىنشى بولىپ كەستى. ەكىنشى جانە ءۇشىنشى ورىنداردى الەكساندر كريستوفف («كاتيۋشا») پەن رامۋناس ناۆارداۋسكاس («Garmin-Sharp») يەلەندى. سونداي-اق, ۆينچەنتسونىڭ بارلىق كەزەڭ بويىنا سارى جەيدەسىنەن ايىرىلىپ قالماعانى – ءبىز ءۇشىن ماقتانىش.
از-كەم انىقتاما
گراند-تۋر مارەگەرلەرى
«دجيرو د’يتاليانى» 5 رەت, «تۋر دە فرانستى» 5 رەت جانە «ۆۋەلتا» كوپكۇندىگىن 1 رەت باعىندىرعان ەددي مەركسكە تەڭ كەلەر ەشكىم جوق. بەلگيالىق سپورتشى وسىلايشا گراند-تۋرلاردى 11 مارتە جەڭىپ العان. ودان كەيىنگى ورىنداردا بەرنار ينو (3-5-2 / 10), جاك انكەتيل (2-5-1/ 8), فەليچە دجيموندي (3-1-1/ 5), البەرتو كونتادور (1-2-2 / 5), ۆينچەنتسو نيبالي (1-1-1 / 3) ورنالاسقان.
وسى ناتيجەسىنەن كەيىن نيبالي تاريحتاعى ءۇش گراند-تۋردى ۇتقان التىنشى سپورتشى بولىپ تىركەلدى. ول بۇعان دەيىن «Liquigas» ۆەلوكومانداسىندا ءجۇرىپ يسپانيانىڭ ۆۋەلتا كوپكۇندىگىن 2010 جىلى ۇتسا, «دجيرو د’يتاليا» جارىسىندا جەڭىمپاز اتانعانىنا ءبىر-اق جىل بولعان ەدى. ەندى, مىنە, «تۋر دە فرانستى» 29 جاسىندا «استانا» ساپىندا باعىندىرىپ وتىر.
دايىنداعان: نۇريسلام قۇسپانعالي
