كەشە ورتالىق كوممۋنيكاتسيالار قىزمەتىنىڭ بريفينگىنە كەلگەن پارلامەنت ءماجىلىسىنىڭ دەپۋتاتى, «اق جول» دەموكراتيالىق پارتياسىنىڭ فراكتسيا جەتەكشىسى ازات پەرۋاشەۆتىڭ پىكىرىنشە, ەۋرازيالىق ەكونوميكالىق وداق جاڭا جۇمىس ورىندارىنىڭ اشىلۋىنا, كاسىپورىندار تابىسىنىڭ ۇلعايۋىنا جانە جالاقىنىڭ وسۋىنە نەگىز بەرەدى.
ونىڭ ايتۋىنشا, ەۋرازيالىق ەكونوميكالىق وداق اياسىندا باعا ساياساتى قايتسە دە تۇزەتىلەدى. قازاقستاندىق كاسىپورىنداردىڭ رەسەيگە جانە بەلورۋس رەسپۋبليكاسىنا ونىمدەرىن وتكىزۋگە جول اشىلادى. ارينە, تابىس قۋعان ولار قۋاتتىلىقتارىن دا ارتتىرۋعا ءماجبۇر بولادى. ال, ول قوسىمشا جۇمىس قولدارىن قاجەت ەتەدى. تابىس مولايعاندا, كاسىپورىن جۇمىسشىلارىنىڭ دا جالاقىسى كوتەرىلەدى. سونىمەن بىرگە ەل ىشىندە ساتىلاتىن تاۋارلار قىمباتتاتۋى مۇمكىن. تۇتىنۋشىعا اۋىر تيمەس ءۇشىن جالپى جۇرتتىڭ دا جالاقىسى وسىرىلەدى.
بۇل جونىندە: «باعا 10 پايىزعا, ال, جالاقى 50 پايىزعا وسسە, قورقاتىن ەشتەڭەسى جوق. ينفلياتسيانىڭ دا اكەلەر پايداسى بار. ول 3-4% شەگىندە بولسا, ۇتىلمايمىز. ول ءۇشىن ۇكىمەت ءتيىستى جۇمىستى اتقارادى دەپ ويلايمىن» دەدى ا. پەرۋاشەۆ.
حالىق قالاۋلىسىنىڭ ەسەپتەۋىنشە, ەاەو باسەكەلەستىك ءۇشىن كەرەك. قازىردە ەكونوميكالىق وداق اياسىندا وزگە ەلدەردەن قالىپ كەلە جاتقانىمىزدى جاسىرماعان ول بۇل ماسەلە بويىنشا ۇلتتىق ينستيتۋتسيونالدى پالاتانىڭ ساراپتاماسىن العا تارتتى. وعان سەنسەك, 2012 جىلدان بەرى ەكسپورت پەن يمپورت جاعىنان ۇتىلۋدامىز. «قازاقستان تاۋەلسىزدىك العان جىلداردان بەرى وڭدەۋشى سەكتوردى اياققا تۇرعىزا الماي كەلەدى» دەدى دەپۋتات.
ءماجىلىس دەپۋتاتى ونىڭ سەبەبىن سول جىلداردان باستاپ نارىعىمىزدى بارلىق ەلدەرگە ايقارا اشىپ قويعانىمىزبەن ءتۇسىندىردى. وزگە ەلدەردىڭ تاۋارىن تۇتىنا باستاعان ءبىز ءوز ءوندىرىسىمىزدى ۇمىتتىق. وتاندىق كاسىپكەرلەر شەتەلدىكتەرمەن باسەكەلەسە المادى. بىراق, ەۋرازيالىق ەكونوميكالىق وداق سول ولقىلىقتى تۇزەتۋگە مۇمكىندىك بەرىپ وتىر. «ەۋرازيالىق ەكونوميكالىق وداقتىڭ قۇرىلۋى – بۇگىنگى كۇننىڭ تالابى. مۇنىڭ جۇمىسى ساۋاتتى جۇرگىزىلسە, كۇتەتىن ناتيجەگە ءسوزسىز جەتەمىز» دەيدى ا. پەرۋاشەۆ.
امانعالي شميتۇلى
