استانادا ەكى جارىم جىل ۋاقىت ىشىندە كورەرمەن كوڭىلىنەن شىققان 17 قويىلىم قويىپ, ەلوردا عانا ەمەس, ەلىمىزدىڭ مادەني ومىرىندە وزىندىك ورنىن ايشىقتاپ العان ونەر ورداسى – مۋزىكالىق جاس كورەرمەندەر تەاترى ەرەكشە ءىس-شارا ۇيىمداستىردى.
قازىرگى تاڭدا استانا قالاسى اكىمدىگىنىڭ مۋزىكالىق جاس كورەرمەندەر تەاترىندا ومىردە دە, ونەردە دە جاراسىمدى جۇپتار – 14 وتباسى جەمىستى ەڭبەك ەتىپ جاتىر.
بۇل وتباسى يەلەرى – تەاتر مەن كينو الەمىندە كوركەم بەينەلەر سومداپ جۇرگەن, ونەر كەڭىستىگىندە وزىندىك قولتاڭباسى بار جاندار. جاس وتباسىلاردىڭ ونەگەلى ءومىرىن, شىعارماشىلىعىن دارىپتەۋ ماقساتىندا ارنايى «باقىتتى شاڭىراق يەلەرى» اتتى ءىس-شارا ۇيىمداستىرىلىپ, مەرەكەلىك كەزدەسۋ بارىسىندا قازاقتىڭ سالت-داستۇرلەرىنىڭ ءبىرى «تۇساۋكەسەر» ءراسىمى جاسالدى.
تەاتردىڭ بەلدى اكتەرى سالامات مۇقاشەۆ پەن تەاتر قىزمەتكەرى ايدانا ەڭگەبايدىڭ ۇلى ءالي-احمەتتىڭ تۇساۋكەسەرى تاتۋ ۇجىمنىڭ ورتاسىندا, شاڭىراق كۇنىندە سالتاناتتى تۇردە ءوتتى. ۇلتتىق داستۇرگە ساي شاشۋ شاشىلىپ, حالىق ايرىقشا قابىلداعان كەش بولدى.
تەاتردىڭ ديرەكتورى, جاستاردىڭ رۋحاني اكەسى اسحات ماەميروۆ پەن جارى نۇرگۇل ءسابيدىڭ تۇساۋىن كەسىپ, بالاپانعا اق جول تىلەدى. بولاشاققا ءتاي-ءتاي باسقان ءسابيدىڭ قادامى, ونەر يەلەرىنىڭ العاۋسىز اق تىلەگى توڭىرەكتى قۋانىشقا تولتىرىپ, ءار بوساعاعا اپپاق نيەتىمەن كىرگەلى وتىرعان ناۋرىز مەيرامىنىڭ شىرايىن كەلتىردى, اينالاسىن شاتتىق پەن شۋاققا بولەدى.
جاس كورەرمەندەر تەاترىنداعى وتباسى قۇندىلىعى دارىپتەلىپ, جاستاردىڭ كىرشىكسىز سەزىمىن, ءمولدىر ماحابباتىن, ۇرپاقتار ساباقتاستىعىن پاش ەتكەن بۇل ءىس-شارا, شىنىندا دا, شاڭىراق ۇلتىمىزدا كيەلى ۇعىم ەكەنىن, ۋىعى مەن كەرەگەسى مىقتى, شاڭىراعى بيىك بولسا, ۇلتىمىزدىڭ دا بولاشاعى جارقىن, كەلەشەگى كەمەل بولارىن بايقاتتى. ونەردە دە, ومىردە دە قول ۇستاسقان ونەر يەلەرى وزگە جاستارعا وسىلايشا ۇلگى كورسەتتى, تاماشا توسىنسىي كورسەتتى.
