ءوز سالاسىنىڭ ۇزدىك ماماندارىن انىقتايتىن «استانا تاڭداۋى-2013» بايقاۋىنا ۇسىنىلعانداردىڭ ءبىرى – نۇرلان سىزدىقوۆ.
نۇرلان ەركەنۇلى 1958 جىلى سەمەي وبلىسىنىڭ بەسقاراعاي اۋدانىنا قاراستى بەگەن اۋىلىندا دۇنيەگە كەلگەن. 1985 جىلى تومسك قالاسىنداعى اسكەري-مەديتسينالىق ينستيتۋتتى تاماماداعان. ماماندىعى – اسكەري دارىگەر. «قازاقستان رەسپۋبليكاسى دەنساۋلىق ساقتاۋ ءىسىنىڭ ۇزدىگى», «قۇرمەتتى شەكاراشى». 2011 جىلى زەينەتكە شىعىپ, بۇگىندە جەكە كاسىپكەرلىكپەن اينالىسادى.
«اكەمىز ءوز قىزمەتىن اشحاباد قالاسىنا جاقىن باحاردەن كەنتىنەن باستاعان. سول جەردەگى شەكارا جاساعىنىڭ مەديتسينالىق كومەك كورسەتۋ پۋنكتىندە دارىگەر بولدى. 1986 جىلى ءبىر جىلعا جۋىق ۋاقىتىن اۋعانستانمەن شەكارالاس تاحتا-بازار قالاسىندا ورنالاسقان شەكارا جاساعىندا ءىسساپاردا وتكىزدى. ۋاقىتشا قۇرىلعان ينجەنەرلىك قۇراما جاساقتا اسكەري-مەديتسينا قىزمەتىن باسقاردى. ءوزىنىڭ قىزمەتتىك مىندەتتەرىنەن تىس سول اۋماقتا ورنالاسقان شەكارا بەكەتتەرىنىڭ جەكە قۇرامدارىنا دارىگەرلىك كومەك كورسەتتى. سول شالعاي قاراقۇمدا گەولوگيالىق بارلاۋ جاساپ جۇرگەن ماماندار جاراقات العاندا, اكەم ەمدەگەن. 1988 جىلى اكەمىزدى دۋشانبە قالاسىنداعى اسكەري بولىمگە اسكەري-مەديتسينالىق قىزمەتتى باسقارۋعا اۋىستىرعان. 1989 جىلدىڭ اياعىنا تامان باستالعان توتەنشە جاعداي كەزىندە باسىنان جاراقات الىپ, ميى شايقالعان وفيتسەردى گوسپيتالعا اپارۋعا مۇمكىندىك بولماي قالعان كەزدە, ول ون كۇن بويى ەم جاساعان ەكەن. 1990 جىلى اسكەري قىزمەتىن پەتروپاۆلوۆسك-كامچاتسكيدە جالعاستىردى. تىنىق مۇحيتىنداعى كۋريل, كاماندور سياقتى ارالداردا ورنالاسقان شەكارا بەكەتتەرىندەگى ساربازدارعا دارىگەرلىك تەكسەرۋلەر جاساپ, ەۆاكۋاتسيالاۋدى ۇيىمداستىرىپ وتىردى. ەلىمىز تاۋەلسىزدىك الاردىڭ الدىندا قىزمەت جاعدايىمەن الماتى قالاسىنا اۋىستى. الماتى قالاسىنداعى بورالداي گارنيزونىندا, قازىرگى شەكارا اكادەمياسىندا, اسكەري جوندەۋ زاۋىتتارىندا قىزمەت اتقاردى» دەيدى اكەسىنىڭ ءومىر جولى تۋرالى سىر شەرتكەن باۋىرجان سىزدىقوۆ.
قۇرمەتتى شەكاراشى ون جىلعا جۋىق قر ۇقك شەكارا قىزمەتىنىڭ سانيتارلىق-ەپيدەميولوگيالىق جاساعىندا ەپيدەميولوگيا ءبولىمىنىڭ باستىعى قىزمەتىن اتقارعان. ىندەتكە قارسى شارالاردى ۇيىمداستىرىپ, كوپتەگەن ينفەكتسيالىق وشاقتاردى جويۋعا تىكەلەي ارالاسقان. زەينەت جاسىنا شىققانعا دەيىن استانا قالاسىنداعى ۇقك شەكارا قىزمەتىنىڭ ورتالىق اپپاراتىندا باس سانيتارلىق دارىگەر مىندەتىن ابىرويمەن اتقاردى.
بۇگىندە وتباسىندا ءتورت بالا تاربيەلەپ, ەكى نەمەرە ءسۇيىپ وتىرعان نۇرلان ەركەنۇلىن ۇل-قىزدارى ماقتان ەتەدى. «ءبىز اكەمىزدىڭ ءومىرى ونەگەلى, ەڭبەگى ۇلگى بولاتىنداي, جاۋاپكەرشىلىگى مول كاسىپ يەسى بولدى دەپ سانايمىز. وعان دالەل وتكەن ءومىر جولدارى» دەيدى قىزى ينديرا سىزدىقوۆا.
گۇلميرا ايماعانبەت
