ءبىر ءمينيستردىڭ ورىنباسارى ەسىلدىڭ سول جاعالاۋىنداعى مينيسترلىكتەر ءۇيىنىڭ ىشىنەن اقشا جىمقىرعان دەي مە… ونى ۇستاپ الىپ, قوينى-قونىشىنداعىسىن ەرىنبەي-جالىقپاي ساناپ شىققان قارجى پوليتسەيلەرىنىڭ ەسەبىنە ۇڭىلسەم, سۇمدىق! اناۋ ميلليوندارعا مەن قالا شەتىنەن ون سوتىق جەر الىپ, ول جەرگە اكە-شەشەمە سۋ جاڭا اعاش-تاستان ءۇي سالىپ بەرىپ, ول ءۇيدىڭ ءىشى-سىرتىن ءمارمارلاپ, اينالاسىن قىمبات تەمىر دۋالمەن قورشاپ, تۇركىمەننىڭ الابايى مەن قالى كىلەمىن تاپسىرىسپەن الدىرتىپ… قىسقاسى, وسىنداي-وسىنداي تۇرمىستىق جاعدايىمدى تۇگەل جاساپ العاننان كەيىن, قالعان اقشانى جەتىمدەر مەن قارتتار ۇيىنە اۋدارا سالار ەدىم. قاتىنىمنىڭ قاسارىسقانىنا قاراماستان! راس ايتام…
وڭەشىنىڭ كەڭىن-اااي! مۇنداي جالماۋىز بولار ما؟!. وۋ, سول سياقتىلار كەزىندە بىزگە: «اۋىلدا قاشانعى مالمەن مال بولىپ جۇرە بەرەسىڭدەر؟! مىڭعىرعان شۋاش-شۋاش قويلارىڭدى, دالا شاڭىمەن ەكولوگيامىزدى لاستاعان جىلقىلارىڭدى, ساسىق سيىرلارىڭدى تىپ-تيپىل ەتىپ قۇرتىڭدار, ءايدا! ونداي ماسىلداردىڭ ورنىنا ءبىز شەتتەن ءجۇنى جۇلىنعان تاۋىق اكەپ بەرەمىز. سونىڭ ەتىن جەسەڭدەر دە اشتان قىرىلمايسىڭدار!» دەپ دىكىلدەگەن جوق پا؟! ە دەپ, كەيىنگى قۇس تۇماۋىنان دا قورىقپاستان, «بۋشتىڭ بۇتىن» وڭەشتەن وتكىزۋگە بەيىمدەلە بەرگەندە, وزدەرىنىڭ ىستەپ وتىرعاندارى مىناۋ! سونىڭ دامدەۋىشتەرىنە كەتەتىن تيىنىمىزدى قالتالارىنا سۇڭگىتىپ جىبەرىپ! سوسىن, وزدەرى ەكران الدىندا تۇك كورمەگەندەي ماڭقيادى دا قالادى-ەي!..
قايتا, ماعان «بۇتىن» ۇستاتىپ قويعان بۋشقا راحمەت! ويتپەگەندە, تەك جىلقىنىڭ ەتىن جەپ ۇيرەنگەن اكەم دە «تىشقانشىلايمىز با, قايتەمىز؟..» دەپ مىڭگىرلەي باستاعان. ول بايعۇس كەزىندە اۋىلدىڭ باس جىلقىشىسى ەدى. كليچكاسى – كەنتاۆر (تاڭنان كەشكە دەيىن ات ۇستىنەن تۇسپەيتىن داۋرەنىندە كلاستاسى ءشاشتىباي قويعان).
الگى… ۆيتسە-مينيستر دەۋشى مە ەدى قازىر… سول ءوز تىلىندە وقىپ, جازا دا المايدى دەيدى بىلەتىندەر. مەن تانىمايمىن. جارايدى, مايشەلپەكتى تاسادا وتىرىپ الىپ وپىراتىن وبىرلىعى بار ەكەن, تىم قۇرىسا, سونىڭ ءدامىن قازاق تىلىمەن تاتىپ كورسە, قايتەدى؟ شاشالىپ قالا ما؟ مۇمكىن ەمەس! قارجى پوليتسەيلەرىنىڭ ساناپ شىققانى – ءوزىمىزدىڭ ۇلتتىق ۆاليۋتا. قالتاداعى تيىندارى ءبىزدىڭ قىتايلىق كاستومدى ءبىر جاعىنا قاراي قيسايتىپ جۇرگەن تەڭگە!..
وزدەرىڭىز شەتتەن الدىرتقان اكاراشكىنىڭ سۇيەگىن شۇكىرشىلىكپەن مۇجىگەن مەن قامسىزبىن قازىر. ىڭعايسىز ەستىلسە دە, بار مالىنان ايىرىلعان اكەم «كەمپىر, بۇگىن «بۋشتىڭ بۇتىن» جەيىكشى!..» دەپ جالعىز ءتىسىن تىلىمەن يتەرىپ وتىرۋعا ابدەن توسەلىپ الدى. ال, سىزدەر… وسىندايدى قويۋ كەرەك قوي, جىگىتتەر!
ەركەعالي بەيسەنوۆ
