ورتالىق كوممۋنيكاتسيالار قىزمەتىندە وتكەن بريفينگتە ءبىلىم جانە عىلىم ءمينيسترى اسلان ءسارىنجىپوۆ ءبىلىم بەرۋ قىزمەتكەرلەرىنىڭ تامىز كەڭەسىنىڭ قورىتىندىلارىنا توقتالىپ, جاڭا وقۋ جىلىنا دايىندىق بارىسىنان حابار بەردى.
بيىل تامىز كەڭەسىنىڭ تاقىرىبى «ءبىلىم بەرۋدىڭ يننوۆاتسيالىق ستراتەگياسى – مەملەكەتتىڭ, قوعامنىڭ جانە جەكە تۇلعانىڭ دامۋىنىڭ فاكتورى» بولعانى بەلگىلى. ءوز ءسوزىن وسىدان باستاعان مينيستر «ءبىلىم بەرۋدەگى تەحنولوگيالىق يننوۆاتسيا – وقۋ باعدارلاماسىنا ەنگىزىلەتىن جاڭالىقتاردىڭ سانىنا ەمەس, ساپاسىنا, مازمۇنىنا بايلانىستى. ەلدىڭ ينتەللەكتۋالدىق بولاشاعى تەك قانا بىلىمدە. سوندىقتان, قارقىندى دامىپ جاتقان قوعامدا ءتالىم الىپ جاتقان وقۋشى كەلەشەكتە العان ءبىلىمىن قولدانا ءبىلۋى قاجەت. ءبىلىم – قوعام تالابىنا, جۇمىس بەرۋشى تالابىنا ساي بولۋى كەرەك» دەپ اتاپ ءوتتى.
ودان كەيىن بىرنەشە جىلدان بەرى وزەكتى بولىپ كەلە جاتقان بالالاردى بالاباقشامەن قامتۋ ماسەلەسىنە ويىستى. اسلان باكەنۇلىنىڭ ايتۋىنشا, بۇرىنعىمەن سالىستىرعاندا قازىردە اتالعان تاراپتاعى جاعداي جاقسى جاعىنا وزگەرگەن. بالالاردى مەكتەپكە دەيىنگى بىلىممەن قامتۋ بويىنشا قازاقستان اۆستراليا, كانادا, فينليانديا, پولشا, شۆەيتساريا جانە تۇركيا سىندى مەملەكەتتەرمەن ءبىر ساتىعا ورنالاسىپ, 3-6 جاس بالالاردىڭ 73 پايىزى بالاباقشاعا بارادى.
مۇمكىندىگى شەكتەۋلى بالالار دا نازاردان تىس قالماي كەلەدى. ولاردىڭ 35 مىڭىنا, ياعني 25 پايىزىنا وقۋعا جاعداي جاسالعان. مۇگەدەك بالالاردىڭ 3,7 مىڭى ون ەكى مۇشەسى ساۋ قۇرداستارىمەن بىرگە وقيدى, ياعني ينكليۋزيۆتى ءبىلىم الىپ جاتسا, 10,1 مىڭى ۇيدەن وقيدى.
ءدۋالدى وقىتۋ جۇيەسى جايلى مينيستر مۇنداي جۇيە ەلىمىزدىڭ 176 كوللەدجىنە ەنگىزىلىپ جاتقانىن جەتكىزدى. ونىڭ مالىمدەۋىنشە, قوسارلى جۇيەمەن وقىتاتىن كوللەدجدەردىڭ ۇلەس سالماعىن 2016 جىلعا تامان 20-دان 50 %-عا دەيىن ۇلعايتۋ جوسپارلانىپ وتىر.
مينيستر ستۋدەنتتەر مەن ولاردىڭ اتا-انالارى ءۇشىن جاعىمدى جاڭالىقتان دا حاباردار قىلدى. جوعارى وقۋ ورىندارى جىل سايىن وقۋ اقىسىن كوتەرىپ جاتادى. اسلان ءسارىنجىپوۆتىڭ سوزىنە سەنسەك, بيىل وقۋ اقىسى قىمباتتامايدى.
امانعالي قالجانوۆ
