قادىرلى اعايىن, قۇرمەتتى وتانداستار! ايلاردىڭ سۇلتانى, بارشا مۇسىلمان حالقى ءۇشىن قاسيەتتى رامازان ايى ساتىمەن ءتامامدالدى. بۇگىن ورازا ايتى باستالدى.
قاسيەتتى رامازان ايىندا جەر-جەردە مۇسىلمان قاۋىمى ماۋسىمنىڭ اپتابىنا مويىماستان ورازاسىن ۇستاپ, قاسيەتتى ايدى قۇلشىلىقپەن وتكىزدى, جاراتقاننان جاقسىلىق تىلەپ, دۇعا ەتىپ, عيباداتتان قول ۇزبەدى. كۇننىڭ اپتاپتى ىستىعى مەن كەزدەسكەن قيىنشىلىقتارعا مويىماستان, اللانىڭ مەيىرىم-شاپاعاتىنان ءۇمىت ەتىپ, اۋىز بەكىتكەن مۇسىلمان ۇممەتىن پايعامبار سۇيىنشىلەگەن مول ساۋاپتار مەن جاقسىلىقتار كۇتەدى دەپ سەنەمىز.
اۋەلى بارشامىزدىڭ رامازان ايىن امان-ەسەن وتكەرىپ, ورازا ايت مەرەكەسىنە ءتورت كوزىمىزدى تۇگەل, اعايىن-تۋعاننىڭ ورتاسىندا جەتكىزگەن اللا تاعالاعا سانسىز شۇكىرلەر مەن ماداقتار بولسىن. رامازان – قۇلشىلىق پەن سابىردىڭ, مەيىرىم مەن راحىمنىڭ, قايىرىمدىلىق پەن بەرەكەنىڭ ايى بولسا, وسى ايدا ساۋاپ الۋ ماقساتىمەن كوپتەگەن مۇسىلمان باۋىرلارىمىز ۇلكەندى-كىشىلى قايىرىمدى ىستەرگە حال-قادەرىنشە اتسالىسىپ, رامازان ايىن حالىقتىق دەڭگەيدە وتكىزۋگە ءوز ۇلەستەرىن قوسىپ وتىر. ەل مۇسىلماندارى رامازان ايىنىڭ ەرەكشەلىگىن سەزىنىپ, ءبىر اي بويى رۋحاني جىگەرگە بولەندى.
اللا ەلشىسىنىڭ (س.ع.س) ساحيح حاديستەرىندە ايت مەيرامىنا تاماق جەپ, سۋسىن ءىشۋ, اللانى ەسكە الۋ, قوناق كۇتۋ, سىرقات ادامداردىڭ كوڭىلىن سۇراۋ مەن جوق-جىتىك, كەمباعالدارعا ساداقا بەرۋ ءتان ەكەندىگى ايتىلعان. ولاي بولسا, ايت كۇندەرىن ىزگى امالدارىمىزدى كەمىتپەستەن, كوتەرىڭكى مەرەكەلىك كوڭىل-كۇيمەن جانە باسقا دا ساۋابى مول ىستەرمەن وتكىزگەن ماقۇل.
پايعامبارىمىز (س.ع.س) مەككەدەن ءمادينا قالاسىنا قونىس اۋدارعاندا, جەرگىلىكتى حالىقتىڭ ءبىر مەيرامدى اتاپ ءوتىپ جاتقانىن كورىپ: «بۇل قانداي مەرەكە؟» دەپ سۇرايدى. ولار: «بۇل – ءبىزدىڭ يسلامعا دەيىنگى تويلاپ كەلە جاتقان مەرەكەمىز» دەپ جاۋاپ بەرەدى. سوندا اللا ەلشىسى (س.ع.س): «اللا سىزدەرگە مۇنان دا ۇلىق ەكى مەرەكە بەردى. ولار – رامازان جانە قۇربان ايتتارى» دەپ, وسى ەكى مۇباراك مەيرامداردىڭ ۇلىقتىعىن سەزدىرگەن.
ايت مەرەكەسىندە اتا-انا مەن قاريالارعا سالەم بەرىپ, باتاسىن الۋ, سىرقات كىسىلەردىڭ ۇيىنە (اۋرۋحاناعا) زيارات ەتىپ, كوڭىلىن سۇراۋ دا ىزگى امالدار قاتارىنا جاتادى.
ارازداسىپ قالعان كىسىلەرمەن تاتۋلاسىپ, قاتىناس ۇزىلگەن تۋىستاردىڭ ۇيلەرىن ارالاۋدىڭ دا ماڭىزى ەرەكشە. ويتكەنى, اللا تاعالا: «سەن, كەشىرىم جولىن ۇستان, جاقسىلىققا بۇيىر, ناداندىقتان بەت بۇر» («اعراف» سۇرەسى, 199-ايات) دەپ, مومىن مۇسىلمانداردى بارىنشا كەشىرىمدى بولۋعا ۇندەگەن. كوڭىلى جابىرقاۋ, قامقورلىققا مۇقتاج جاندار مەن جوق-جىتىكتەر ايت كۇندەرىندە كوبىرەك كومەك-قولداۋ قاجەت ەتەرى, ساداقا كۇتىپ, ءبىر جاقسىلىقتان ءۇمىت ەتەرى حاق. سوندىقتان, مۇباراك مەيرامدا مۇنداي جاندارعا قايىر-ساداقا ۇلەستىرىپ, كوڭىلدەرىنە دەمەۋ بولعانىمىز ابزال.
ورازا ايت ادامداردى باۋىرمالدىلىق پەن كىشىپەيىلدىلىككە, كەشىرىمدىلىك پەن سۇيىسپەنشىلىككە شاقىرادى. بۇل كۇندەرى ءۇي-ۇيدە مەرەكەلىك داستارقان جايىلىپ, تۋعان-تۋىس, دوس-جاران, كورشى-قولاڭ ءبىر-ءبىرىن ارالاپ, ءدام تاتىسىپ, مارە-سارە بولادى.
قۇرمەتتى اعايىن! بارشاڭىزدى ەڭ قاسيەتتى دە ۇلىق مەرەكە – ورازا ايت مەيرامىنىڭ كەلۋىمەن شىن جۇرەكتەن قۇتتىقتايمىن! بارشا جۇرتتى قۋانىشقا بولەيتىن بۇل مەيرام ەلىمىزگە, جەرىمىزگە قۇت-بەرەكە مەن ىنتىماعىن, ىرىسى مەن بەرەكەسىن الا كەلسىن دەپ تىلەيمىز. اللا تاعالا بارشامىزدىڭ تۇتقان ورازامىز بەن جاساعان قۇلشىلىق-عيباداتتارىمىزدى جانە ساۋاپتى ىستەرىمىزدى قابىل ەتىپ, كەلەر جىلعى رامازان ايىنا امان-ەسەن جەتۋىمىزدى ءناسىپ ەتكەي. حالقىمىزدىڭ ىنتىماق-بىرلىگىن ارتتىرىپ, ىرىس-نەسىبەسىن ادالىنان مولايتقاي! دىنىمىزگە قۋات, حالقىمىزعا يمان بايلىعىن بەرگەي! اۋىزبىرشىلىگىمىزدى ارتتىرىپ, تىنىشتىعىمىزدى تۇراقتى قىلعاي! ءاۋمين!
ناۋرىزباي قاجى تاعانۇلى,
قمدب-نىڭ نايب ءمۇفتيى
