كەشە «وتان قورعاۋشىلار» الاڭىندا مەرزىمدى اسكەري مىندەتىن اتقارۋعا اتتانعان 50 استانالىق ازاماتتى شىعارىپ سالۋعا ارنالعان «ەلدى قورعاۋ – ۇرپاق مىندەتى» اتتى اسكەري-پاتريوتتىق شارا ءوتتى. ۇلى جەڭىستىڭ 70 جىلدىعىنا وراي ۇيىمداستىرىلعان سالتاناتتى شارا مەملەكەتتىك كۇزەت قىزمەتىنىڭ پرەزيدەنتتىك وركەسترى ورىنداعان انۇرانمەن اشىلدى. استانا قالاسى اكىمدىگى مەن قورعانىس مينيسترلىگى اتىنان مايداندا قازا تاپقان جاۋىنگەرلەرگە تاعزىم گۇلى قويىلدى.
قازاقستان قارۋلى كۇشتەرىنىڭ قاتارىن تولىقتىراتىن اسكەرگە شاقىرۋشىلاردى ۇلى وتان سوعىسىنىڭ مايدانگەرلەرى,
جاۋىنگەر-ينتەرناتسيوناليستەر, مەملەكەتتىك جانە قوعامدىق ۇيىمداردىڭ وكىلدەرى, اتا-انالارى, تۋىسقاندارى, دوس-جاراندارى شىعارىپ سالدى. وتان الدىنداعى بورىشىن وتەۋگە اتتانىپ بارا جاتقان جىگىتتەرگە ۇلى وتان سوعىسىنىڭ مايدانگەرى الەكسەي فرولوۆ, «حالىق قاھارمانى», ءماجىلىس دەپۋتاتى باقىتجان ەرتاەۆ, استانا قالاسى اكىمىنىڭ ورىنباسارى ەرمەك امانشاەۆ, قالالىق ارداگەرلەر كەڭەسىنىڭ توراعاسى امانگەلدى سىزدىقوۆ جاستارعا تىلەكتەرىن ايتتى.
– قۇرمەتتى جاستار, بۇگىن سىزدەر وتان الدىنداعى ابىرويلى مىندەتتى ورىنداۋعا اتتانىپ باراسىزدار. اسكەرگە بارۋ – ەلدى قورعاۋ. بۇل ەر جىگىتتىڭ ەل-جۇرتىنىڭ الدىنداعى قاسيەتتى بورىشى بولىپ سانالادى. سوندىقتان دا كوماندير رەتىندە ايتارىم, جاۋىنگەرلىك انتقا ادال بولىپ, مارتەبەلى مىندەتتەرىڭدى ابىرويمەن اتقارىپ كەلۋلەرىڭە تىلەكتەسپىن, – دەدى ب.ەرتاەۆ.
سالتاناتتى شارا اياسىندا جاستارعا اسكەري تەحنيكا كورسەتىلدى. «جەلكەن» ساحناسىندا اسكەري-پاتريوتتىق اندەر شىرقالدى. وسىلايشا اسكەر قاتارىنا الىنعان استانالىق جاستار پاتريوتتىق رۋحتارى كوتەرىلىپ, وتان الدىنداعى مىندەتتەرىن ورىنداۋعا اتتاندى.
عالىم قوجابەكوۆ
