كەشە استانا قالاسىنىڭ ىشكى ىستەر دەپارتامەنتىنىڭ 200-دەن استام پوليتسيا قىزمەتكەرى تۇڭعىش پرەزيدەنت كۇنىنە ارنالعان «پرەزيدەنتتىك ميل» ءداستۇرلى بۇقارالىق جۇگىرۋگە قاتىستى.
«قازاق ەلى» مونۋمەنتىنەن باستالعان جۇگىرۋدى استانا قالاسى ءىىد باستىعى پوليتسيا گەنەرال-مايورى امانتاي اۋباكىروۆ باستاپ شىقتى.
قالا كوشەلەرىمەن جۇگىرگەن پوليتسيا قىزمەتكەرلەرىنە ۇيىمداستىرۋشىلار تاراپىنان قويىلعان مۋزىكا اۋەنى, سونىمەن قاتار ارىپتەستەرى مەن ولاردىڭ وتباسى مۇشەلەرى دەمەۋ بەرىپ وتىردى. كوشە بويىندا جۇرگەن قالا جۇرتشىلىعى دا جۇگىرۋشىلەرگە قول سوعىپ, قولداۋ ءبىلدىردى.
«پرەزيدەنتتىك ميل» مارەسىنە جەتىسىمەن, ءتارتىپ ساقشىلارى ءبىرىن-ءبىرى تۇڭعىش پرەزيدەنت كۇنىمەن قۇتتىقتاپ, كوتەرىڭكى كوڭىل-كۇيمەن ءبولىستى.
«مەملەكەتتىك مەرەكەلەر قارساڭىندا پوليتسيا قىزمەتكەرلەرى اراسىندا بۇقارالىق سپورت شارالارىن وتكىزۋ داستۇرىمىزگە اينالعان. بۇل مەرەكە – ەرەكشە. تۇڭعىش پرەزيدەنتىمىز – نۇرسۇلتان نازارباەۆتىڭ ەسىمى تاۋەلسىز مەملەكەتىمىزدىڭ قالىپتاسۋىمەن تىعىز بايلانىستى. ەلباسىمىزدىڭ ساليقالى ساياساتىنىڭ ارقاسىندا ەلىمىزدىڭ ەكونوميكالىق جانە الەۋمەتتىك جاعدايى وركەندەپ, جۇرتشىلىقتىڭ تۇرمىسى جاقسارىپ كەلەدى. تۇڭعىش پرەزيدەنت كۇنى مەملەكەتتىك مەرەكەسىن تويلاۋ بىرلىكتىڭ ارتۋىنا, مەملەكەت باسشىسىنىڭ جولداۋىندا ايقىندالعان ماقساتتار مەن مۇراتتارعا جەتۋگە, پاتريوتتىق سەزىمدى نىعايتۋعا سەرپىن بەرەدى. بۇگىنگى جۇگىرۋىمىز دە سول بەرەكەلى بىرلىك پەن ەڭبەكتىڭ ءبىر كورىنىسى دەپ ويلايمىن» دەپ اتاپ ءوتتى شارانى تۇيىندەگەن ىشكى ىستەر دەپارتامەنتىنىڭ باستىعى ا.اۋباكىروۆ.
ارمان ورالۇلى
