الماتىدا قازاقستان رەسپۋبليكاسى پرەزيدەنتىنىڭ كۋبوگى جولىنداعى ءداستۇرلى حالىقارالىق جارىس اياقتالدى. بالۋان شولاق اتىنداعى سپورت سارايىندا ون سالماق بويىنشا وتكەن باسەكەدە ءبىرجان جاقىپوۆ, قايرات ەراليەۆ, بەرىك ءابدىراحمانوۆ, دانيار ەلەۋسىنوۆ, جانىبەك ءالىمحانۇلى, ادىلبەك نيازىمبەتوۆ جانە يۆان دىچكو سىندى جىگىتتەر التىننان القا تاعىپ, كۇللى قازاق ەلىنىڭ مەرەيىن ۇستەم ەتتى.
وسىلايشا جەتى التىن, ءتورت كۇمىس, التى قولا مەدال ەنشىلەپ, بارلىعى 17 جۇلدەمەن ءبىرىنشى ورىنعا يە بولعان قازاقستانمەن تەڭدەسەر ەشكىم بولمادى. ال قالعان ءۇش سالماق بويىنشا التىن جۇلدەنى وزبەكستان, تايلاند جانە كۋبا بوكسشىلارى ءبىر-بىردەن ەنشىلەدى. ءسويتىپ, ءتورتىنشى رەت ۇيىمداستىرىلعان ءداستۇرلى تۋرنيردە قازاقستان قۇراماسى داستۇردەن جاڭىلىسپاي, جالپى ەسەپتىڭ تىزگىنىن ەشكىمگە بەرمەدى.
49 كەلى سالماقتا ونەر كورسەتكەن ءبىرجان جاقىپوۆ اقتىق سىندا وزبەكستاندىق حاسانباي دۋسماتوۆتان 2:1 ەسەبىمەن ايلاسىن اسىرسا, ءۇشىنشى ورىنعا تاعى ءبىر قانداسىمىز جومارت ەرجان مەن رەسەيلىك راسۋل ساليەۆ تابان تىرەدى.
ال 52 كەلى تارتاتىن بوكسشىلار اراسىنان وزبەك ەلىنىڭ وكىلى شاحوبيددين زويروۆ الدىنا جان سالماسا, فيليپپيندىك رەي سالۋدار كۇمىسپەن كۇپتەلدى. ءبىزدىڭ ءىلياس سۇلەيمەنوۆ پەن رەسەي بوكسشىسى گاۆريل پوپوۆ تيىسىنشە قوس قولانى قاناعات ەتۋگە ءماجبۇر بولدى.
56 كەلى تارتاتىن بوكسشىلار اراسىنان قايرات ەراليەۆ ءبارىمىزدىڭ ءۇمىتىمىزدى اقتاپ, بيىكتەن كورىنە ءبىلدى. ول فينالدا تاعى ءبىر جەرلەسىمىز جانبولات تىلەگەنۇلىن 3:0 ەسەبىمەن ۇتسا, جارتىلاي فينالدا سۇرىنگەن موڭعوليالىق تۋگتسوگت نۋيامبايار مەن رەسەيلىك زينات جاندىباەۆ ۇشتىكتى قورىتىندىلادى.
قازاقستاننىڭ قورجىنىنا كەزەكتى التىندى سالعان بەرىك ءابدىراحمانوۆ سوڭعى كەزدەسۋدە فيليپپين ەلىنەن كەلگەن چارلي سۋارەستى ايقىن باسىمدىقپەن جەڭسە, وسى 60 كەلىلىك بوكسشىلار اراسىنان وزبەكستاندىق ەلنۇر ءابدىرايىموۆ پەن موڭعوليالىق وتگوندالاي دا جۇلدەگەر اتاندى.
ال 64 كەلىدەگى الماسبەك الىبەكوۆ ۇلتتىق قۇرامامىزدىڭ قورجىنىنا قولا جۇلدە سالدى. ونىڭ ءالى جاس ەكەنىن ەسكەرسەك, بولاشاعىنا سەنىممەن قاراۋعا بولادى. بۇل سالماقتا تايلاند بوكسشىسى ۆۋتتيچاي ماسۋك اقتىق سىندا كۋبالىق لۋيس وليۆا گەنەردى ۇتىپ, جەڭىمپاز اتانسا, ەكىنشى قولانى موڭعول باتتارسۋگ چينزورينگ يەلەندى.
سونداي-اق, 69, 75, 81 جانە +91 كەلى سالماق دارەجەلەرى بويىنشا قازاقستاندىق بوكسشىلار التىننان القا تاقتى. دانيار ەلەۋسىنوۆ, جانىبەك ءالىمحانۇلى, ادىلبەك نيازىمبەتوۆ, يۆان دىچكو سىندى جىگىتتەرىمىز ەل نامىسىن ابىرويمەن قورعاپ شىقتى. تەك 91 كەلى تارتاتىن انتون پينچۋك قانا فينالدا كۋبالىق رۋيس كوردوۆا حەريحتەن ايلاسىن اسىرا المادى. ونىڭ سالماعىنداعى قازاقستاندىق اسقار ابدۋللاەۆ پەن وزبەكستاندىق رۋستام تۋلاگانوۆ ءۇشىنشى ورىندى مىسە تۇتتى. ال دانياردىڭ سالماعىندا ءوزىمىزدىڭ ساعادات راحمانقۇلوۆ كۇمىس السا, كۋبا جانە وزبەكستاننان كەلگەن اريسنويديس ديسپەين مەن يسرايل مادريموۆ قولاعا قول جەتكىزدى. جانىبەكتىڭ سالماعىنداعى كۇمىستىڭ يەسى – ۋكراينالىق دميتري ميتروفانوۆ. ءۇشىنشى ورىنعا كۋبالىق ارلەن لوپەز كاردونا مەن وزبەك جىگىتى حۋرشيدبەك نورماتوۆ كوتەرىلدى.
«كۇمىسبەك» اتانىپ كەتكەن بوكس-شىمىز ادىلبەك نيازىمبەتوۆ وسىلايشا كوپتەن كۇتكەن التىن جۇلدەگە يە بولدى. وعان فينالدا استانالىق داۋرەن ەلەۋسىنوۆ ايتارلىقتاي قارسىلىق كورسەتە المادى. ال ۋكراينادان كەلگەن قوناق الەكساندر گانزۋليا مەن كۋبالىق قارا مارجان ەممانۋەل رەيەس ۇزدىك ۇشتىكتەن كورىندى.
بۇدان بولەك, اسا اۋىر سالماقتاعى ايقاستاردا الدىنا قارا سالماعان يۆان دىچكودان كەيىنگى ورىندارعا يواندي ورتەگا (كۋبا), نۇرجان بەكزاتوۆ جانە قامشىبەك قوڭقاباەۆ (ەكەۋى دە – قازاقستاندىق) ورنالاس-تى.
جارىس قورىتىندىسى بويىنشا, جەڭىمپازدارعا 4000 اقش دوللارى ۇسىنىلسا, ءار «التىن» بوكسشىنىڭ باپكەرى 2000 دوللار كولەمىندەگى سىياقىنى قالتاعا باستى. سونىمەن قاتار, ۇيىمداستىرۋشىلار تاراپىنان ەكىنشى, ءۇشىنشى ورىن يەلەنگەندەر ءۇشىن 2000 جانە 1000 اقش دوللارى بەرىلدى.
