ەرتەڭ ەلوردامىزدا ءححى رەسپۋبليكالىق «جاس قانات – 2012» جاس ورىنداۋشىلار بايقاۋى باستالادى. ءۇش كۇنگە سوزىلاتىن بۇل بايقاۋعا ەلىمىزدىڭ ءار وڭىرىنەن 16 ونەرپاز قاتىسىپ, ءۇش كۇن بويى ۇلكەن ساحنادا باپتارى مەن باقتارىن قاتار سىناماق. دەي تۇرعانمەن, قاتىسۋشىلار, مەجەلى كۇنگە دەيىن داستۇرگە اينالعان «بەيرەسمي» راسىمدەر مەن بايقاۋدىڭ اجىراماس بولىگى سانالاتىن شارالارعا قاتىستى.
«ءوزارا قورقىسۋ كەشى»
«جاسقاناتتىقتاردىڭ» ءوزارا تانىسۋ, ءبىلىسۋ ءداستۇرى وسىلاي اتالادى.ءبىر-ءبىرىن قورقىتىپ ءھام ءبىر-بىرىنەن قورقىپ بولعاننان سوڭ, قاتىسۋشىلار ءبىرىنشى جيىنعا قاتىستى: كوستيۋمدەردى تەكسەرۋ, ساحناعا شىعۋ رەپەتيتسياسى, رەپەرتۋاردى اقتىق رەت قايتالاۋ.
كەلەسى كۇنى دە, جاس ونەرپازدارعا وزدەرىن بارىنشا «جۇلدىز» سەزىنۋگە جاعداياتتار جاسالدى: قالانى ارالاۋ, تەلەارنا ءۇشىن «جاس قانات كۇندەلىگى» تۇسىرىلىمىنە قاتىسۋ, بەلگىلى راديوستان- تسيالاردا تىكەلەي ەفيرگە شىعۋ.
ەفيردەگى ەركىن اڭگىمە
«استانا» راديوسىندا بەلگىلى راديوجۇرگىزۋشىلەرمەن بىرگە ءبىر ساعات كولەمىندە تىكەلەي ەفيردە ءان الەمىندەگى الەمدىك سوڭعى ترەندتەردى تالقىلاپ, وزدەرىنىڭ «مۋزىكا پىرلەرى» تۋرالى سۇحبات قۇردى.
حابارلاسقان راديوتىڭدارمانداردىڭ سۇراقتارىنا جاۋاپ بەرگەن گۇلنار داماەۆا, مەرۋەرت جەلدىباەۆا جانە يبراگيم جانتۋلين تىكەلەي ەفيردە ءارتۇرلى سايىستاردى وتكىزىپ, تىڭدارمانداردارعا ءان ايتۋ جونىندە كەڭەس بەردى.
سول كۇنى اتالعان راديوتولقىندا, قاتىسۋشىلاردىڭ پىرلەرى ۆeyonce, Whitney Houston, Bryan McKnight, Christina Aguilera كومپوزيتسيالارىمەن قاتار, جاسقاناتتىقتاردىڭ ءوز ورىنداۋلارىنداعى اندەرى دە شىرقالدى.
استانا اتىنان – مەرۋەرت پەن گۇلنار
ايتۋلى بايقاۋعا ەلوردا اتىنان ىلگەرىدە ايتىپ وتكەن مەرۋەرت جەلدىباەۆا مەن گۇلنار داماەۆا قاتىسادى.
21 جاستاعى مەرۋەرت «جاس قاناتقا» قاتىسۋ ونىڭ اتالعان بايقاۋعا گاۋھار قاسپاقوۆا قاتىسقاننان بەرگى ماقساتى بولىپ كەلگەنىن ايتادى. سول كەزدە, 5-6 جاسار كىشكەنە ءبۇلدىرشىن مەرۋەرت, بۇگىندە قازاق ۇلتتىق ونەر ۋنيۆەرسيتەتىنىڭ ستۋدەنتى. دومبىرا ماماندىعى بويىنشا ءبىلىم الىپ جاتقان ول ءۇشىن ءان ونەرىنىڭ بارلىق باعىتتارى قىزىق.
ال, گۇلنار بولسا, وتاندىق شوۋبيزنەستىڭ بەل ورتاسىنا كىرۋگە بۇعان دەيىن دە ءبىراز قادام جاساعان. بيىل 24 جاسقا كەلەتىن گۇلنار 2006 جىلى Super Star KZ جوباسىنا قاتىسسا, 2007 جىلى «شابىت» شىعارماشىل جاستاردىڭ حالىقارالىق فەستيۆالىندە باعىن سىناعان. ال, وتكەن جىلدىڭ سوڭىندا, قازاقستان ەستراداسىنىڭ وكىلى يۆان برەۋسوۆ جازىپ بەرگەن «مينۋتا ليۋبۆي» تۋىندىسى گۇلناردىڭ رەپەرتۋارىنداعى العاشقى ءتول كومپوزيتسياسى.
دەي تۇرعانمەن, ول «جاس قانات» بايقاۋىنا قاتىسۋ بۇعان دەيىنگى جەتىستىكتەرىنىڭ بارلىعىنان دا بيىك ەكەنىن ايتادى.
ءبىرىنشى, ەكىنشى, …ون التىنشى!
كەشە جاسقاناتتىقتار, بايقاۋ الدىنداعى سوڭعى راسىمدەردىڭ بىرىنە قاتىستى. ولار, «بايتەرەك» باسىندا ساحناعا شىعۋ رەتتىك نومىرلەرىن تاڭدادى. وسىلايشا, جەرەبەگە اياگوزدەن ايدىن ءابدىجۇسىپوۆ, اقتوبەدەن نۇربولات ابدۋللين مەن ديماش قۇدايبەرگەن, قىزىلوردادان اقمارجان باينازاروۆا, پاۆلوداردان ەلدانا دۇيسەنوۆا مەن قامسىزباي قۇرمەت, استانادان مەرۋەرت جەلدىبەۆا مەن گۇلنار داماەۆا, كۋرچاتوۆتان كۇلايىم قايىرباەۆا, تارازدان اينا قالماعانبەتوۆا, سەمەيدەن «كەربەز» دۋەتىن قۇرعان جادىرا مەن جۇلدىز سارسەمباەۆالار, پەتروپاۆلدان ءادىلحان ماكين, قاراعاندىدان گۇلسىم مىرزابەكوۆا, ورالدان باقىتجان وراحاەۆ, ءنازيرا حيباشەۆا جانە يبراگيم جانتۋلين قاتىستى.
وسىلايشا, ءوز رەتتىك نومىرلەرىن تاڭداعان قاتىسۋشىلارعا بايقاۋدى ۇيىمداستىرۋشىلار ەرتەڭگى سايىستا ساتتىلىك تىلەدى.
تانىتقان تالاي تالانتتى
1992 جىلدان بەرى 300-دەن اسا جاس ونەرپاز قاتىسقان بۇل بايقاۋ قازاقستاننىڭ ءان ونەرىنە تالاي تالانتتاردى تانىتتى. ولاردىڭ اراسىندا – مەدەۋ ارىنباەۆ مەن ەرلان كوكەەۆ, جاننا ورىنباساروۆا مەن باقىت شاداەۆا, كۇرماش ماحان, مايرا داۋلەتباقوۆا مەن باقىتجان قاجىمۇقانوۆ, باۋىرجان يساەۆ پەن گاۋھار قاسپاقوۆا, سەيفۋللين جولبارىس پەن نۇرلان ابدۋللين, بەيبىت قورعان مەن مارجان اراپباەۆا, ءمادينا سادۋاقاسوۆا جانە «ۇركەر»مەن «دەرۆيشي» توپتارى.
وسى جولعى قاتىسۋشىلار اراسىنان دا قازاقستاننىڭ ءان ونەرىندە وزىندىك ورنى بار ورىنداۋشىلار شىعادى دەگەن ۇمىتتەمىز.
نۇربەرگەن ماقىم
