كەشە دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا استاناداعى قارتتار ۇيىنە بارىپ, ۇلى وتان سوعىسىنىڭ ارداگەرلەرى مەن تىل ەڭبەككەرلەرىن جەڭىس كۇنىمەن قۇتتىقتادى. يگى شاراعا ەلوردا اكىمىنىڭ ورىنباسارى اندرەي لۋكين, رەسپۋبليكالىق ارداگەرلەر ۇيىمى ورتالىق كەڭەسىنىڭ توراعاسى ومىرزاق وزعانباەۆ جانە پارلامەنت دەپۋتاتتارى قاتىستى.
– 1945 جىلدىڭ 9 مامىرى شەجىرە پاراقتارىنا جازىلىپ, تاريحقا اينالدى. سىزدەر مايدان شەبىندە ەل ىرگەسىن قورعاپ, جاۋدى جەڭدىڭىزدەر. سوعىستان كەيىن قيراعان شارۋاشىلىقتى قايتا قالپىنا كەلتىردىڭىزدەر. وسىلايشا ءپاتريوتيزمنىڭ ناعىز ۇلگىسىن كورسەتىپ, تاۋەلسىز قازاقستاننىڭ بەرىك نەگىزىن قالادىڭىزدار. سول ءۇشىن سىزدەرگە ماڭگى قارىزدارمىز. وسكەلەڭ ۇرپاق ەرلىكتەرىڭىزدى ەشقاشان ۇمىتپايدى, – دەدى تامارا دۇيسەنوۆا.
قارتتار مەن مۇگەدەكتەرگە ارنالعان مەديتسينالىق-الەۋمەتتىك مەكەمەنىڭ ديرەكتورى كەنجەبولات باپىشەۆتىڭ ايتۋىنشا, بۇگىندە مۇندا 304 كىسى تۇرادى. ونىڭ 4-ەۋى – ۇلى وتان سوعىسىنىڭ ارداگەرلەرى, 16-سى – ولارعا تەڭەستىرىلگەن ازاماتتار, ال 34-ءى – تىل ەڭبەككەرلەرى. قاريالار جىل سايىن جەڭىس كۇنىن تويلاپ, «ارداگەر» اللەياسىنا كوشەت وتىرعىزۋدى ۇردىسكە اينالدىرىپتى. بۇل جولى دا ىزگى ءداستۇر ۇمىتىلمادى. سالتاناتتى جيىننان كەيىن قوناقتار مەن جاۋىنگەر اتا-اجەلەر اعاش ەگۋگە كىرىستى. العاشقى شىبىقتى مينيستر مەن ۇلى وتان سوعىسىنىڭ ارداگەرى ولەگ ليننيك قادادى.
كەزدەسۋ سوڭىندا ساربازدار مەن ستۋدەنتتەر اسپانعا جەڭىس شارلارىن ۇشىردى. ال «ناز» مەملەكەتتىك بي تەاترىنىڭ ارتىستەرى, ۇرمەلى وركەستر جانە №17 مەكتەپ-گيمنازيانىڭ شاكىرتتەرى مەرەكەلىك كونتسەرت قويدى.
بوتاگوز ماراتقىزى
