مويىنىڭىزدا قارىزىڭىز بولسا, ەلدەن اتتاپ شىعا المايسىز. استانالىق سوت ورىنداۋشىلارى شەكارا اسىپ تىنىعىپ قايتۋعا نەمەسە باسقا دا سەبەپتەرمەن شەتەلگە اتتانۋعا بەل بۋعان بورىشكەرلەردى قىسپاققا الىپ, ورتا جولدان كەرى قايتارىپ جاتىر. الايدا بۇعان دا قاراماستان, مىڭ ءتۇرلى سىلتاۋ ايتىپ, ەسكەرتۋگە قۇلاق اسپاي, قارىزىن وتەمەي جۇرگەندەر كوبەيىپ كەتىپتى. وسىعان بايلانىستى استانا قالالىق پروكۋراتۋراسى مەن ىشكى ىستەر دەپارتامەنتىنىڭ ماماندارى جانە جەكە سوت ورىنداۋشىلارى بورىشكەرلەردىڭ ارتىنان شام الىپ تۇسە باستادى.
پروكۋراتۋرا ماماندارىنىڭ ايتۋىنشا, مويىنىنا مىنگەن قارىزىنا بولا شەتەلگە شىعۋ قۇقىنان شەكتەلىپ وتىرعان استانالىقتاردىڭ سانى 16 مىڭعا جەتكەن. استانا قالاسىندا سوت ورىنداۋشىلار كۇنىنە 30-عا جۋىق ازاماتتىڭ شەتەلگە شىعۋىن شەكتەپ, اۋەجايلار مەن ۆوكزالداردان كەرى قايتارادى ەكەن. مۇنىمەن عانا شەكتەلىپ قالماي, ەكىنشى دەڭگەيدەگى بانكتەردەگى ەسەپشوتتارى دا تۇتقىنعا الىنادى. الايدا سوعان قاراماستان, ايىپپۇل, نەسيە قارىزى مەن بەرەشەگىن تولەمەي جۇرگەن بورىشكەرلەردىڭ سانى كوبەيمەسە, ازايماي وتىر. وسىنىڭ سالدارىنان بۇگىندە قالالىق بيۋدجەتكە تۇسپەي وتىرعان قارجىنىڭ كولەمى 615 ملن تەڭگەدەن اسىپ جىعىلعان. ال سوت ورىنداۋشىلارىنىڭ الدىندا قارىزىن ءوندىرىپ الۋ تۋرالى تاعى 37 مىڭعا جۋىق ءىس جاتىر. وكىنىشتىسى سول, بۇل كورسەتكىش كۇن ساناپ ارتىپ كەلەدى.
ەلىمىزدىڭ زاڭى بويىنشا تەك اليمەنت نەمەسە جول ايىپپۇلدارىن تولەمەگەن ادامدار عانا ەمەس, قالانىڭ كوممۋنالدىق قىزمەتتەرىنە دە قارىزى بار تۇلعالار بورىشكەر دەپ تانىلادى. ياعني سوت ارقىلى ءوندىرۋ شەشىمى شىعارىلعان كەز كەلگەن تۇلعا قارا تىزىمگە ەنگىزىلەدى. ولارعا سوت ارقىلى سانكتسيالانىپ, سوت ورىنداۋشىسىنىڭ قاۋلىسى قوسىلادى. بۇل قاۋلىنىڭ ءبىر كوشىرمەسى بورىشكەرگە بەرىلىپ, تاعى ءبىر داناسى قازاقستان رەسپۋبليكاسى ۇقك شەكارا قىزمەتىنە جىبەرىلەدى. بورىشكەر شەتەلگە ۇشار كەزدە ءدال وسى قىزمەتتىڭ قىزمەتكەرلەرى ورتاق بازادا قارىزى تولەندى دەگەن بەلگى شىقپايىنشا, شەكارادان ەشقايدا وتكىزبەيدى.
مۇنداي ءتاسىل ەلىمىزدە 2010 جىلدان بەرى قولدانىلىپ كەلەدى. «الىس-جاقىن شەت ەلدەردە كەڭىنەن قولدانىلاتىن بۇل ءتاسىل بورىشكەرلەردىڭ قارىزدارىن دەر كەزىندە تولەۋىنە ىقپال ەتەدى. كەز كەلگەن ازامات مەملەكەت الدىندا قارىزى نەمەسە ايىپپۇلى بار-جوعىن تەكسەرىپ الۋعا شاقىرامىز», – دەيدى پروكۋراتۋرا ماماندارى.
مۇنداي كەلەڭسىز جايتقا تۇسپەس ءۇشىن كەز كەلگەن تۇرعىن الدىمەن قارىزىنىڭ بار-جوعىن تەكسەرىپ الۋ ءتيىس. قارىزدار بولعان جاعدايدا, بورىشىڭىزدى «اكىمشىلىك قۇقىق بۇزۋشىلىق تۋرالى» كودەكسىنە سايكەس, سوتتىڭ شەشىمى ماجبۇرلەپ ورىنداۋعا تۇسكەن كۇننەن باستاپ 30 كۇن ىشىندە ەرىكتى تولەي الاسىز. سونىمەن قاتار, اتالمىش كودەكستە جەتى كۇن ىشىندە جالپى ايىپپۇل سوماسىنىڭ ەلۋ پايىزىن تولەۋ ءتارتىبى قاراستىرىلعان.
بۇركىت نۇراسىل
