استانا قالاسىنىڭ قوعامدىق كەڭەسى اتقارۋشى ورگانداردىڭ قوعامدىق كولىكتىڭ جۇمىسىن جاقسارتۋ, كوشە-جول جەلىسىن جانە تۇراق ينفراقۇرىلىمى وبەكتىلەرىن دامىتۋ جونىندەگى جۇمىسى بويىنشا قوعامدىق تىڭدالىم وتكىزدى.
باسقارما باسشىلارى ەلورداداعى جولاۋشىلار تاسىمالىن جاقسارتۋ, اۆتوبۋستار مەن قالالىق تاكسيلەردىڭ جۇمىسى, جول ءجۇرۋ اقىسىن تولەۋدىڭ ەلەكتروندىق جۇيەسىن ەنگىزۋ, ورىنتۇراق ينفراقۇرىلىمىن دامىتۋ, اقىلى ورىنتۇراقتار ەنگىزۋ, ءبىر باعىتتى قوزعالىستى ۇيىمداستىرۋ, قالالىق كوشە-جول جەلىسىن دامىتۋ سياقتى ماڭىزدى ماسەلەلەر بويىنشا بايانداما جاساپ, جينالعان كوپشىلىكتىڭ سۇراقتارىنا جاۋاپ بەردى.
قالاداعى قوعامدىق كولىكتىڭ دامۋ پەرسپەكتيۆاسىنا شولۋ جاساعان استانا قالاسى اكىمىنىڭ ءبىرىنشى ورىنباسارى سەرگەي حوروشۋن الداعى ۋاقىتتا وسى قىزمەتتى پايدالاناتىن تۇرعىندار سانىنىڭ ۇلەسىن 33 پايىزدان 45 پايىزعا ارتتىرۋدى كوزدەپ وتىرعانىن جەتكىزدى. قازىرگى احۋالدى ساراپتاي كەلە, بىرقاتار ەلدەردىڭ تاجىريبەسى مەن قوعامدىق كولىكتى پايدالانۋ كورسەتكىشىنە توقتالدى. ۆەنادا قوعامدىق كولىك قىزمەتىن پايدالانۋشىلار – 35 پايىز, سينگاپۋردا 63 پايىز بولسا, ماسكەۋدە حالىقتىڭ 66 پايىزى, نيۋ-يوركتە 54,3 پايىزى وسى قىزمەتتى پايدالانادى ەكەن. «سونداي-اق, ءبىز كوشە-جول جەلىسىنىڭ وتكىزۋ قابىلەتتىگىن 37,5 مىڭ كق/ساعاتتان 43 مىڭ كق/ساعاتقا دەيىن جوعارىلاتۋعا ۇمتىلامىز» دەدى س.م. حوروشۋن.
«بىرجاقتى قوزعالىس» جوباسىنىڭ ەكى كەزەڭىنىڭ جۇزەگە اسقانىنا كوپ بولا قويعان جوق. حالىققا كورسەتىلەتىن قىزمەتتىڭ ساپاسىن ارتتىرۋ ماقساتىندا «Bus Lane» اۆتوبۋس جولاقتارى قالامىزدىڭ ون ءبىر كوشەسىندە بەلگىلەندى. جالپى ۇزىندىعى 38,4 شاقىرىمدى الىپ جاتقان ءتيىمدى ءادىس اۆتوبۋستاردىڭ ورتاشا جىلدامدىعىن 12-15 پايىزعا ارتتىردى.
قوعامدىق كولىك قىزمەتىنىڭ وڭ ناتيجەسىن جولاۋشىلار كولىگى باسقارماسىنىڭ باسشىسى ەدىل سۇلەيمەنوۆ بايانداپ ءوتتى. قالادا قوعامدىق كولىك سالاسىنىڭ 9 وپەراتورى بار. بارلىق باعدارلار سانى – 85 بىرلىكتى قۇرايدى, ونىڭ ىشىندە 67 بىرلىك – قالا ىشىندە, 4 ەكسپرەسس-مارشرۋت, ال قالا ماڭىنا 14 باعدار بويىنشا قاتىنايدى. كولىكتەردى جاڭعىرتۋ 1025 بىرلىككە جەتىپ, كورسەتكىش 40 پايىزعا ارتقان. جولاۋشىلار اعىنى تاۋلىگىنە 850 مىڭ جولاۋشى بولسا, قوعامدىق كولىك قىزمەتىن پايدالانۋشىلار كولەمى 33 پايىزعا جەتىپ وتىر.
كەلەلى جيىننىڭ كەلەسى تىڭدالىمى ورىنتۇراق ينفراقۇرىلىمىن دامىتۋ, اقىلى ورىنتۇراقتار ەنگىزۋ ماسەلەرىن قامتىدى.
ايتا كەتۋ كەرەك, باس قالامىزداعى كولىك قۇرالدارى سانىنىڭ ارتۋى جىلىنا 10 پايىزعا جەتىپ, مىڭ استانالىققا 340 كولىكتەن كەلىپ تۇر. بۇل قالانىڭ كولىكتىك جۇيەسىنە اسەر ەتەدى. قوعامدىق كولىكتىڭ تارتىمدىلىعىن ارتتىرۋدىڭ ماڭىزى زور ەكەنىنە توقتالعان جيىنعا قاتىسۋشىلار قىزمەت ساپاسىنا قاتىستى ۇسىنىس-پىكىرلەرىمەن دە ءبولىستى.
ايگۇل ۋايسوۆا
