ەندى ەلوردالىقتار ءۇشىن جۇمىس ىزدەۋدىڭ الەگى جەڭىلدەيدى. كۇنى كەشە ىسكە قوسىلعان «CZ Astana» ءموبيلدى قوسىمشاسى ارقىلى قولدانۋشىلار قالانىڭ ەڭبەك نارىعىنا قاجەتتى بوس ورىندارمەن تانىسا الادى.
Google Play مەن App Store ينتەرنەت-دۇكەندەرىنەن تەگىن جۇكتەلەتىن باعدارلامانىڭ بىرنەشە قىزمەتى بار. «شارالار» ءبولىمى جۇمىسپەن قامتۋ ورتالىعى ۇيىمداستىراتىن جارمەڭكە, كاسىبي كۋرس, شەبەرلىك ساباقتارى, پسيحولوگيالىق ترەنينگتەر, شاعىن اۋكتسيوندار جايلى حابارلاندىرۋلاردى قامتيدى. سونداي-اق, ازاماتتاردىڭ ءموبيلدى قوسىمشاداعى تەستىلەۋدەن ءوتىپ, ناتيجە بويىنشا ءوزىنىڭ سالالىق بەيىمدىلىگىن, قاي ماماندىققا قابىلەتتى ەكەنىن انىقتاۋعا مۇمكىندىگى بار.
قولدانۋشىنىڭ تاڭداۋ ەركىندىگىنە قاراي باعدارلاما قازاق جانە ورىس تىلىندە دايىندالعان.
ءموبيلدى قوسىمشانىڭ اۆتورى – قازاق اگروتەحنيكالىق ۋنيۆەرسيتەتىن پروگرامميست ماماندىعى بويىنشا تامامداعان استانالىق جاس ومىرسەرىك تۇياقباەۆ. ول كەزىندە جۇمىسپەن قامتۋ ورتالىعىنىڭ تالداۋ بولىمىندە قىزمەت ەتكەن.
– ورتالىق كومەگىنە كۇنىنە 300-دەن اسا ازامات جۇگىنەدى. وكىنىشكە قاراي, كوپشىلىگى تۇيىندەمە تولتىرىپ, ءوزىنىڭ بىلىكتىلىگىن كورسەتۋ ءۇشىن دۇرىس سۇحباتتاسۋ ءتاسىلىن بىلمەي جاتادى. بايقاعان دۇنيەلەردى ەسكەرىپ, قوسىمشانى ءبىر ايعا جۋىق ۋاقىتتا قۇراستىردىم. جۇمىس بەرۋشى مەن جۇمىس ىزدەۋشىگە پايدالى بولادى-اۋ دەگەن قىزمەتتەردى ەنگىزۋگە تىرىستىم, – دەيدى ومىرسەرىك.
ياعني, قوسىمشادا تۇيىندەمەنى قالاي جازۋ كەرەك, اڭگىمەلەسۋ كەزىندەگى سۇراقتارعا قالاي جاۋاپ بەرۋ كەرەك, جۇمىس بەرۋشىلەردىڭ زاڭ الدىنداعى قۇقىقتارى مەن مىندەتتەرى سەكىلدى فۋنكتسيالار قاراستىرىلعان. سونىمەن بىرگە, مۇندا جۇمىسپەن قامتۋ ورتالىعىنىڭ ورنالاسۋ مەكەنجايىن انىقتاۋعا مۇمكىندىك بەرەتىن گەولوكاتسياسى بار كارتا ەنگىزىلگەن.
قازىرگى كەزدە ءموبيلدى قوسىمشادا 20 شاقتى ۆاكانسيا كورسەتىلگەن. ولاردىڭ ىشىندە اعىلشىن ءتىلىنىڭ اۋدارماشىسى, مەدبيكە, ديەتولوگ, دارىگەرلەر, ساۋدا ماركەتينگى بويىنشا جەتەكشى مامان, ينجەنەر ەلەكترونشى سەكىلدى بىرقاتار سۇرانىسقا يە ماماندىقتار بار. ال, جۇمىسپەن قامتۋ ورتالىعىنىڭ بازاسىندا 3,5 مىڭداي بوس جۇمىس ورنى تىركەلگەن.
استانا قالاسى اكىمدىگىنە قاراستى جۇمىسپەن قامتۋ ورتالىعىنىڭ ديرەكتورى ولجاس وماردىڭ ايتۋىنشا, ۆاكانسيالار جايلى مالىمەت اپتاسىنا ەكى رەت جاڭارتىلادى. الداعى ۋاقىتتا ءموبيلدى قوسىمشادا جاريالاناتىن بوس ورىندار ءتىزىمى كوبەيەدى. سونداي-اق, قولدانۋشىنىڭ وزىنە كەرەك ماماندىقتى ىزدەۋگە مۇمكىندىك بەرەتىن قىزمەت تە جاسالاتىن بولادى.
ءمادينا قايراتقىزى
