وسىدان ءۇش جىل بۇرىن باس قالادا قىزىلشامەن اۋىرعان 396 ادام انىقتالىپ, دارىگەرلەردىڭ توبە شاشىن تىك تۇرعىزعانى ەسىمىزدە. ول سوڭعى بەس جىلداعى رەكوردتىق كورسەتكىش بولاتىن. ەندى مىنە, قىزىلشانىڭ قاۋىپى بيىل تاعى بايقالۋدا. قاراشا ايىنىڭ باسىنان بەرى قىزىلشا جۇقتىردى دەگەن كۇدىكپەن 38 ادام تىركەۋگە الىنىپتى. سونىڭ ىشىندە 20-سى – 1 جاسقا دەيىنگى اۋرۋعا قارسى ەگىلمەگەن بالالار, 8-ءى – 1-دەن 6 جاسقا دەيىنگى بۇلدىرشىندەر. سول 20-نىڭ 5-ءۋىنىڭ اتا-انالارى ۆاكتسينادان ءوز ەرىكتەرىمەن باس تارتقاندار ەكەن. مۇنداي اقپاراتتى استانا قالاسىنىڭ قوعامدىق دەنساۋلىق ساقتاۋ دەپارتامەنتى ءمالىم ەتتى.
قۇزىرلى مەكەمە باسشىسى سادۋاقاس بايعابىلوۆ قىزىلشانىڭ جىلدا كۇزگى-قىسقى مەزگىلدە پايدا بولاتىنىن ايتادى. ونىڭ ءمالىمەتىنشە, قاۋىپتى دەرتپەن اۋىراتىنداردىڭ 90 پايىزىن 1 جاسقا دەيىن ەگىلمەگەن جانە 1-6 جاس ارالىعىنداعى بالالار قۇرايدى. سونداي-اق جۇكتى ايەلدەردىڭ دە قىزىلشانى جۇقتىرۋ قاۋپى زور.
اعىمداعى جىلدىڭ 10 ايىندا استانا قالاسىندا قىزىلشاعا قارسى 34 364 بالا ەگىلگەن. بۇعان قوسا, ەكپەنىڭ 25 342 دوزالىق قورى بار. ەكپەنىڭ بارلىعى ساپالى, قازاقستاندا سەرتيفيكاتتالعان. سوعان قاراماستان, ەلورداداعى بالالاردىڭ جۇقپالى اۋرۋلاراۋرۋحاناسىندا
35 بالا ەم-دوم الۋدا. ونىڭ ۇشەۋى تولىق جازىلىپ, ۇيلەرىنە قايتىپتى. 15-ءنىڭ قىزىلشا جۇقتىردى دەگەن دياگنوزى راستالىپ وتىر. اۋىرعان بالالارمەن قارىم-قاتىناس جاساعان 37 ادامعا دا ەكپە ەگىلگەن. اتالعان اۋرۋدىڭ جاس تالعامايتىنىنىڭ ءبىر دالەلى, 31 جاستاعى ەر ادامنىڭ اۋرۋحاناعا ءتۇسۋى.
الاپات اۋرۋدىڭ ەلورداداعى ءار جىلدارداعى ستاتيستيكاسى مىناداي: 2013 جىلى – 8 وقيعا, 2014 جىلى – 50, 2015 جىلى – 396, 2016 جىلى – 6. قىزىلشا – بۇل ناۋقاستان اۋاداعى تامشىلار ارقىلى بەرىلەتىن جۇقپالى اۋرۋ. ونىڭ نەگىزگى بەلگىسى – ادامنىڭ دەنە قىزۋىنىڭ 38-40 س-قا دەيىن كوتەرىلۋى. 4 كۇننەن 7 كۇنگە دەيىن تابەتىڭىز قاشىپ, السىزدىك باسىپ, قۇرعاق جوتەلىڭىز كۇشەيسە, كوزىڭىز قىزارىپ, تەرىڭىز تۇسە باستاسا, بىردەن دارىگەرگە بارعانىڭىز ابزال.
