قازاقستان بوكس فەدەراتسياسى كۋبوگىنىڭ شيرەك فينالدىق جارىستارى باستالدى. شارشى الاڭعا ءبىرىنشى بولىپ «شىعىس» ديۆيزيونى كوماندالارى شىقتى. ەلوردا تورىندە وتكەن باسەكەدە الماتى وبلىسى, پاۆلودار وبلىسى, شىعىس قازاقستان وبلىسى جانە استانا قالاسىنىڭ قۇرامالارى ءوزارا مىقتىنى انىقتادى.
جارىستىڭ ءبىرىنشى كۇنى استانا بوكسشىلارى پاۆلودار وبلىسى قۇراماسىن 8: 2 ەسەبىمەن تىزە بۇكتىردى. الاڭ يەلەرى قاتارىنان ازات حامزين (49 كگ), ءىلياس سۇلەيمەنوۆ (52 كگ), مەيىربولات تويتوۆ (56 كگ), دارحان جۇمساقباەۆ (60 كگ), مەيىرىم نۇرسۇلتانوۆ (69 كگ), باقىتجان قوجابەكوۆ (75 كگ), داۋرەن ەلەۋسىنوۆ (81كگ) جانە ۆاسيلي لەۆيت (91 كگ) ءوز قارسىلاستارىنان باسىم ءتۇستى. الماتى وبلىسىنىڭ بىلعارى قولعاپ شەبەرلەرى شىعىس قازاقستان وبلىسى كومانداسىن 7:3 ەسەبىمەن جەڭدى.
ەكىنشى كۇنى استانا قۇراماسى شىعىس قازاقستان بوكسشىلارىن 9:1 ەسەبىمەن ۇتسا, ءدال وسىنداي ەسەپپەن الماتىلىقتار پاۆلودار وبلىسى بوكسشىلارىن تىزە بۇكتىردى. وسىلايشا, فەدەراتسيا كۋبوگىنىڭ جارتىلاي فينالىنا شىعۋ ءۇشىن الماتى وبلىسى مەن استانا قۇرامالارىندا بىردەي مۇمكىندىك بولدى. وسى ەكى كوماندا اراسىندا وتەتىن جەكپە-جەكتەر ناتيجەسى جارتىلاي فينالعا شىعاتىن قۇرامانى انىقتايتىن بولدى.
ال سول شەشۋشى باسەكەدە استانا بوكسشىلارى 6:4 ەسەبىمەن جەڭىسكە جەتىپ, ءبىرىنشى بولىپ قازاقستان بوكس فەدەراتسياسىنىڭ جارتىلاي فينالىنا شىقتى. شىمكەنت قالاسىندا ءوتىپ جاتقان «وڭتۇستىك» ديۆيزيونى بويىنشا جەڭىمپاز كوماندا بۇگىن انىقتالادى. اقتوبەدە وتەتىن «باتىس» جانە قاراعاندىدا وتەتىن «سولتۇستىك» ديۆيزيوندارىنىڭ جەڭىمپازدارى 29 شىلدە كۇنى بەلگىلى بولادى.
قازاقستان بوكس فەدەراتسياسىنىڭ جارتىلاي فينالدارى استانا قالاسىندا 14 جەلتوقسان كۇنى, ال فينالدىق جەكپە-جەكتەر 15 جەلتوقسان كۇنى وتەدى.
ەربول جانات
